हानको चेतावनी- होटल व्यवसायीका समस्या समाधान नगरे व्यवसाय बन्द गर्छौं

A+ A A-

होटल संघ नेपालले होटल व्यवसायीका समस्या समाधानका लागि पहल नगरे व्यवसाय बन्द गर्ने चेतावनी दिएको छ ।

सोमबार ललितपुरमा पत्रकार सम्मेलन गरी हानले बिग्रिँदो अर्थतन्त्रसँगै मुलुकको होटल क्षेत्र धरासायी बनेको भन्दै व्यवसायीहरूको समस्या समाधानका लागि सरकारले पहल नगरेर होटल बन्द गर्ने चेतावनी दिएको हो । हानले सरकारलाई होटल व्यवसायीहरूका समस्या समाधानका लागि ध्यानाकर्षण गराउँदा समेत समस्या समाधानका लागि पहल नगरेकाले व्यवसाय बन्द गर्नुपर्ने अवस्था आएको बताएको छ ।

हानका प्रथम उपाध्यक्ष विनायक साहले बैंक तथा वित्तीय संस्थाहरूबाट होटल व्यवसाय प्रवद्र्धन र विकासका लागि प्रवाह भएका ऋणका साँवा ब्याज भुक्तानीमा थेग्नै नसकिने अवस्था आएको बताए । उनले सरकारका नीति निर्माताहरू, सम्वद्ध सरकारी निकायलगायत नेपाल राष्ट्र बैंक, बैंक तथा वित्तीय संस्थाहरूमा बढ्दै गएको समस्या समाधानका लागि गरिएको पटक–पटकको बैठक, ज्ञापनपत्र, सुनुवाइलगायतका प्रयास बाट हालसम्म कुनै वाञ्छित नतिजा नआएको बताए ।

उनले पछिल्लो समय चालु खर्चसमेत धान्न नसक्ने गरी होटलहरू घाटामा सञ्चालित रहेको बताए । उनले राष्ट्रिय वार्षिक बजेटभन्दा बढी परिमाणको लगानी भइसकेको नेपाली होटल क्षेत्रलाई नेपाल सरकारले हालसम्म पनि उद्योगसरहको मान्यता समेत नदिनु खेदजनक रहेको बताए । उनले पछिल्लो समय होटलको अकुपेन्सी २५ प्रतिशत मात्रै रहेको बताए ।

संघका अध्यक्ष सिर्जना राणाले सरकारले बनाउने नीति नियमले होटल क्षेत्रलाई उपेक्षा गरेको बताइन् । उनले सरकारले कोरोना महामारीको कारण थला परेको होटल क्षेत्रमैत्री नीति नबनाउँदा होटल व्यवसाय घाटामा सञ्चालन गर्नुपर्ने अवस्था रहेको बताइन् । उनले नेपालको पर्यटन क्षेत्र ५० प्रतिशत मात्रै लयमा आएकाले पर्यटक क्षेत्रको विकासमा चुनौती रहेको बताइन् ।

अध्यक्ष राणाले सरकारले होटल व्यवसाय सबै फस्टाएर पर्यटन व्यवसाय सामान्य अवस्था आयो भनेपनि सामान्य अवस्थामा नआएको बताइन् । पर्यटन क्षेत्रलाई सरकारले उद्योगको मान्यता नदिएको भन्दै होटल क्षेत्रलाई उद्योगको मान्यता दिनुपर्ने उनको माग छ ।

प्रकाशित मिति: सोमबार, चैत ६, २०७९ १५:५८