मकवानपुर क्याम्पसमा ४१ वर्षपछि अनेरास्ववियुको हार, कुन क्याम्पसमा कसले जिते ?

मकवानपुर क्याम्पसमा ४१ वर्षपछि अनेरास्ववियुको हार, कुन क्याम्पसमा कसले जिते ?

A+ A A-

मकवानपुरको सबैभन्दा ठूलो शैक्षिक संस्था मकवानपुर बहुमुखी क्याम्पसको स्ववियु निर्वाचनमा नेकपा माओवादी केन्द्रनिकट अखिल (क्रान्तिकारी) ले जित निकालेको छ ।

मकवानपुर क्याम्पसको स्ववियु निर्वाचनको इतिहासमा पहिलोपटक अखिल विजयी बनेको हो । आइतबार भएको निर्वाचनमा नेकपा (एमाले) निकट अनेरास्ववियुका सभापति उम्मेदवार नवराज शर्मा पौडेललाई हराउँदै क्रान्तिकारीका छोइसाङ लामा विजयी भएका हुन् ।

लामाले ८ सय १३ मत ल्याउँदा पौडेलले ६ सय ८२ मत पाए । क्रान्तिकारीले नेपाली कांग्रेसनिकट नेपाल विद्यार्थी संघ (नेविसंघ) र राप्रपानिकट राष्ट्रिय प्रजातान्त्रिक विद्यार्थी संघ (राप्रविसंघ)बीच गठबन्धन बनाएर निर्वाचनमा गएको थियो ।

अनेरास्ववियुले नेकपा (एकीकृत समाजवादी) निकट अनेरास्ववियु र नेत्रविक्रम चन्द 'विप्लव' नेतृत्वको अखिल (क्रान्तिकारी) बीच गठबन्धन बनाएको थियो । यी ६ संगठनले जिल्लाका ८ वटा क्याम्पसमध्ये पालुङ क्याम्पसबाहेक ७ वटामा गठबन्धन बनाएर निर्वाचन लडेका थिए । थाहा नगरपालिकास्थित पालुङ क्याम्पसबाहेक मकवानपुर बहुमुखी क्याम्पस, हेटौँडा क्याम्पस, हटियाको जनप्रिय, चौघडाको वंशगोपाल, मनहरीको मनहरी क्याम्पस, वनविज्ञान अध्ययन संस्थान (फरेष्ट्री क्याम्पस) र बस्तिपुरको निर्मल बहुमुखी क्याम्पसमा आइतबार स्ववियु निर्वाचन भएको हो ।

पालुङ क्याम्पसमा भने अनेरास्ववियु, क्रान्तिकारी, नेविसंघ र राप्रविसंघ मिलेर एकल प्यानल बनाउँदै उम्मेदवारी दिएपछि निर्वाचन समितिले सर्वसम्मत गरेको थियो ।

जिल्लाका ८ क्याम्पसमध्ये मकवानपुर बहुमुखी क्याम्पस सबैभन्दा ठूला हो । ३ हजार बढी मतदाता भएको मकवानपुर क्याम्पसमा आधाले मतदान गरेका थिए । क्याम्पसमा अखिल क्रान्तिकारीका लामाले जित निकालेसँगै अनेरास्ववियुको ४१ वर्षसम्मको बिरासत ढलेको छ । मकवानपुर बहुमुखी क्याम्पस नेकपा एमालेको नेता उत्पादन गर्ने कारखानको रुपमा परिचित थियो । यही क्याम्पसमा दुई पटक स्ववियु सभापति भएका महेश बर्तौला एमालेको प्रतिनिधिसभा सचेतक छन् । क्याम्पसमै राजनीतिक गरेका अधिकांश नेता यतिबेला एमाले मकवानपुरको नेतृत्वदायी भूमिका छन् ।

२०३८ सालदेखि स्ववियुमा जित्दै आएको अनेरास्ववियुले २०७९ को निर्वाचनमा आएर पहिलोपटक हार व्यहोरेको हो । २०३८ सालमा रामकृष्ण श्रेष्ठ सर्वसम्मत स्ववियु सभापति भए । २०६० सालमा नवीन सिग्देल (हाल पार्टी सचिव तथा ४ नम्बर वडाध्यक्ष) सभापति भएका थिए । सिग्देलको नेतृत्वमा स्ववियु गठन भएपछि २९ दिनसम्म निरन्तर आन्दोलन गरेर क्याम्पस समितिमार्फत घोषणा गर्न लगाइएको थियो । माओवादीको द्वन्द्वकालीन अवस्थामा क्याम्पस समितिले स्ववियु घोषणा गर्न डराउँदा अनेरास्ववियु २९ दिनसम्म निरन्तर आन्दोलन गरेको सिग्देलले सम्झिए ।

२०६० सम्म जिल्लाका कुनै पनि सामुदायिक क्याम्पसहरुमा स्ववियु निर्वाचन हुँदैनथ्यो । मकवानपुर क्याम्पसकै आन्दोलनले जिल्लाका क्याम्पसहरूमा पनि स्ववियु निर्वाचन गर्ने बाटो तय गरेको सिग्देल बताउँछन् । मकवानपुर क्याम्पसमा २०६२ र २०६५ मा गरेर दुईपटक महेश बर्तौला स्ववियु सभापतिमा निर्वाचित भएका थिए ।

अनेरास्ववियुले विगतका हरेक निर्वाचनमा एक्लै लड्दै आएको थियो । तर, २०७९ को स्ववियु निर्वाचनमा दुई संगठनको साथ पाउँदा पनि अनेरास्ववियुले हार व्यहोरेको छ । मकवानपुर क्याम्पसमा हार व्यहोरे पनि अनेरास्ववियु जिल्लाका तीन क्याम्पसभा सभापति जित्दै जिल्लाको ठूलो विद्यार्थी संगठन बनेको छ ।

अखिल क्रान्तिकारीले एक सर्वसम्मतसहित १ निर्वाचनबाट, एकीकृत समाजवादी निकट अनेरास्ववियूले दुई सभापति, नेविसंघ तथा विप्लव नेतृत्वको नेकपा निकट अखिल क्रान्तिकारीले १–१ सभापति जितेका छन् ।

पाँच क्याम्पसमा वाम विद्यार्थी गठबन्धनको जित

स्ववियु निर्वाचनअन्तर्गत मकवानपुरको ८ वटा क्याम्पसमध्ये ५ वटा क्याम्पसमा वाम विद्यार्थी गठबन्धनका उम्मेदवारहरू विजयी भएका छन् ।

जिल्लाका पाँच क्याम्पसहरू हेटौँडा क्याम्पस, चौघडाको बंशगोपाल बहुमुखी क्याम्पस, हटियाको जनप्रिय बहुमुखी क्याम्पस, मनहरी बहुमुखी क्याम्पस र बस्तिपुरको निर्मल बहुमुखी क्याम्पसमा अनेरास्ववियुको नेतृत्वमा एकीकृत समाजवादी निकट अनेरास्ववियू र विप्लव नेतृत्वको अखिल क्रान्तिकारीबीचको वाम विद्यार्थी गठबन्धन विजयी भएका हुन् ।

वाम विद्यार्थी गठबन्धनले हेटौँडा क्याम्पस, वंशगोपाल, जनप्रिय र निर्मलमा विपरीत गठबन्धनलाई ‘क्लिन स्वीप’ गरेका छन् । नेविसंघले वनविज्ञान अध्ययन संस्थान (फरेष्ट्री क्याम्पस) र अखिल क्रान्तिकारीले मकवानपुर क्याम्पसमा जितेको हो । जिल्लाको पश्चिमी क्षेत्रस्थित मनहरी क्याम्पसमा भने सचिव नेविसंघबाट निर्विरोध हँदा सभापतिसहित बाँकी पदमा पनि बाम विद्यार्थी गठबन्धनको प्यानल नै विजयी बनेको छ ।

प्रकाशित मिति: सोमबार, चैत ६, २०७९ १४:३१