खस्कँदो विभागीय टिम, नयाँ क्लबको स्तरीय प्रदर्शन

A+ A A-

शहीद स्मारक ए डिभिजन लिग फुटबलमा नयाँ टिमले उत्कृष्ट प्रदर्शन गर्दा विभागीय टिम र गर्विलो इतिहास बोकेका क्लबको प्रदर्शन भने खस्कँदो देखिएको छ ।

ए डिभिजन लिगमा पाँचौँ राउन्डका खेल सकिएको छ । अब छैटौँ राउन्डका खेल चैत २० गतेदेखि सुरु हुनेछन् । पाँचौँ राउन्डका खेल सकिँदासम्म केही टिमले उत्कृष्ट प्रदर्शन गरेका छन् भने केही टिमले नसोचेको हार ब्यहोरेका छन् ।

पाँचौँ राउन्डका खेल सकिँदासम्म यस्तो बनेको छ अंक तालिकाः

सातदोबाटोको च्याम्पियन लय

ए डिभिजन लिगमा सबैभन्दा उत्कृष्ट प्रदर्शन गरिरहेको टिम हो, सातदोबाटो युथ क्लब । सातदोबाटो युथ क्लबमा राष्ट्रिय टिमबाट खेलिरहेका र स्टार फुटबलर छैनन् ।

मिश्रित टिम बनाएको सातदोबाटोले नतिजा भने दमदार निकालेको छ । पाँच खेलमध्ये चार खेलमा जित सातदोबाटोका लागि उत्कृष्ट नतिजा हो । सातदोबाटोले आफ्नो पहिलो खेलमा एनआरटीलाई २–१ गोलले हराएको थियो । दोस्रो खेलमा नेपाल एपीएफलाई १–० ले हराएको सातदोबाटोले तेस्रो खेलमा फ्रेन्ड्स क्लबलाई १–० ले नै हराएको थियो ।

चौथो खेलमा थ्रीस्टारसँग १–० ले हारेको सातदोबाटोले पाँचौँ खेलमा खुमलटारलाई २–१ ले हराएको थियो ।

मनाङ लयमा फर्किंदै

ए डिभिजन लिग सुरु हुनुअघि एकपछि अर्को खेलाडी मनाङ मर्स्याङ्दी क्लबबाट बाहिरिएपछि टिम नै संकटमा आएको थियो । धेरैले मनाङ अब सकियो भने पनि । तर, मनाङले पाँचौँ राउन्डका खेल सकिँदासम्म आफूलाई दोस्रो स्थानमा उभ्याएको छ ।

पहिलो खेलमा नै हिमालयन शेर्पासँग १–१ गोलको बराबरी खेलेको मनाङले आफ्नो दोस्रो खेलमा संकटा क्लबलाई १–० ले हराएको थियो । तेस्रो खेलमा मछिन्द्र क्लबसँग गोलरहित बराबरी खेलेको मनाङले चौथो खेलमा एनआरटीलाई ३–१ गोलले पाखा लगाएको थियो । पाँचौँ खेलमा मनाङले एपीएफलाई २–१ गोलले हराउन सफल भयो ।

संकटमा पुलिस

एकपछि अर्को खेलाडी विदेशिएसँगै ए डिभिजन लिगका क्लबहरू संकटमा परे । खेलाडीको अभावमा क्लबले राम्रो टिम बनाउन नसकेको पक्का हो ।

लिग सुरु भएसँगै थ्रीस्टार क्लबका मुख्य प्रशिक्षक मेघराज केसीको भनाइले पनि पुष्टि गर्छ । एपीएफसँग २–० गोले थ्रीस्टार पराजित भएपछि भनेका थिए, ‘हामीसँग खेलाडी नै छैन । खेलाडीकै अभावमा राम्रो टिम बनाउन सकिएन ।’

यता, हिमालयन शेर्पासँग दशरथ रंगशालामा पुलिस १–० ले हार्‍यो । टिम हारेसँगै राष्ट्रिय टिम तथा पुलिसका पूर्वखेलाडी रविन श्रेष्ठले खेलाडी अभावकै कारण यस्तो नतिजा आएको बताए ।

नेपाली फुटबलमा एउटा गर्विलो इतिहास बनाएको पुलिस पाँचौँ राउन्डका खेलहरू सकिँदासम्म रेलिगेसन जोनमा छ । पुलिसले सोचेको जस्तो नतिजा निकाल्न सकिरहेको छैन । पुलिसले लगातार चार खेलमा हार ब्यहोर्न पुग्यो ।

आफ्नो पहिलो खेलमा चर्च ब्वाइजसँग २–१ ले हारेको पुलिस त्यसपछि हिमालयन शेर्पासँग १–०, संकटासँग ३–० र मछिन्द्रसँग २–१ ले हार्न पुग्यो । पाँचौँ राउन्डको खेलमा भने पुलिसले एनआरटीसँग १–१ गोलको बराबरी खेल्दै अंक बाँड्यो ।

लगातार चार खेलमा हार ब्यहोर्दै अंकविहीन बनेको पुलिसले ए डिभिजन लिगमा एक अंक बटुल्न पनि पाँचौँ खेल कुर्नुपर्‍यो । यसरी नै खराब प्रदर्शन गर्दै जाने हो भने पुलिस रेलिगेसनमा पर्ने पक्काजस्तै छ ।

प्रकाशित मिति: आइतबार, चैत ५, २०७९ २०:०३