रिक्त तीन क्षेत्रमा १० वैशाखमा उपनिर्वाचन सम्भव छ ?

A+ A A-

निर्वाचन आयोगले चितवन क्षेत्र नम्बर २, तनहुँ १ र बारा २ मा एकैपटक उपनिर्वाचन गर्ने तयारी गरेको छ । १० वैशाखमा चितवन २ मा उपनिर्वाचन गर्न लागेको आयोगले राष्ट्रपतिको निर्वाचनपछि रिक्त भएको तनहुँ र बारामा पनि सोही मितिमा चुनाव गर्ने तयारी गरेको हो ।

‘संसद सचिवालयबाट रिक्त भएको औपचारिक जानकारी आएपछि आयोगले उपनिर्वाचनको मितिको सन्दर्भमा आवश्यक निर्णय गर्छ,’ आयोगका प्रवक्ता शालिग्राम शर्मा पौडेलले भने । चितवन २ को निर्वाचन कार्यक्रम अगाडि बढिसकेकाले तनहुँ र बाराका लागि पनि निर्वाचन कार्यक्रम तय गर्नुपर्ने हुन्छ ।

समय थोरै भएकाले केही दिन तलमाथि पनि हुनसक्ने आयोगका अधिकारीहरू बताउँछन् । गत ४ मंसिरमा भएको निर्वाचनमा चितवन २ बाट राष्ट्रिय स्वतन्त्र पार्टीका सभापति रवि लामिछाने निर्वाचित भएका थिए । तर, नागरिकता प्रकरणमा उनको सांसद पद गुमेपछि क्षेत्र रिक्त भएको थियो ।

त्यसैगरी तनहुँ १ बाट कांग्रेसका रामचन्द्र पौडेल र बारा २ बाट जसपाका रामसहाय यादव विजयी भएका थिए । पौडेल राष्ट्रपतिमा र यादव उपराष्ट्रपति बनेसँगै उक्त क्षेत्र रिक्त भएको हो ।

प्रकाशित मिति: आइतबार, चैत ५, २०७९ १८:४९