यसपटक कांग्रेसले मधेसलाई महत्त्व दिएन भने विलीन हुन्छ : महेन्द्रकुमार राय (अन्तर्वार्ता)

यसपटक कांग्रेसले मधेसलाई महत्त्व दिएन भने विलीन हुन्छ : महेन्द्रकुमार राय (अन्तर्वार्ता)

A+ A A-

नेपाली कांग्रेसका केन्द्रीय सदस्य तथा महोत्तरी क्षेत्र नम्बर ४ बाट प्रतिनिधिसभा सदस्य निर्वाचित महेन्द्रकुमार रायसँग शिलापत्रका वाहिद हदीसले गरेको कुराकानी :

उपराष्ट्रपतिमा निर्वाचन सकिएकाे छ । भाेलि प्रधानमन्त्रीले विश्वासकाे मत लिँदै हुनुहुन्छ । अहिलेकाे गठबन्धन कायम रहन्छ कि के हुन्छ ?

उपराष्ट्रपति निर्वाचनका क्रममा आठदलीय गठबन्धनभित्रैका तीन दल जनमत पार्टी, लोकतान्त्रिक समाजवादी पार्टी र नागरिक उन्मुक्ति पार्टीको अलग्गै गठबन्धन बन्याे । तर, ती दलहरूले विपक्षी दलका उम्मेदवारलाई सहयोग गरेनन्, बरु मित्रवत् प्रतिस्पर्धा भयाे । त्यस कारण अहिलेकाे गठबन्धन एक भएर जान्छ । यसमा विवाद छैन ।

उपराष्ट्रपति निर्वाचनमा अगल भएका तीन दललाई सरकारमा राख्नुपर्दैन भनेर गठबन्धनभित्रै आवाज सुनिन्छ नि ?

हो, तर उनीहरूले विश्वासको मत दिए भने सरकारमा सहभागी पनि गराउनुपर्छ ।

तीन दल विशेष गरी लाेसपालाई कांग्रेसले बाेक्न चाहेकाे आराेपबारे के भन्नुहुन्छ ?

कुनै बाध्यता होइन । कांग्रेसले लोसपालाई मात्रै होइन, माओवादी र जसपालाई पनि बोकेको छ । ठूलो पार्टी भएपछि सबैको नेतृत्व कांग्रेसले गरिरहेको कुरा मात्रै हाे ।

द्वन्द्वकालीन मुद्दाहरूकाे अहिलेसम्म छिनाेफानाे भएकाे छैन । कसरी समाधान हुन्छ ?

द्वन्द्वकालीन मुद्दाहरू लामो समयदेखि समाधान भएका छैनन् । त्याेबाहेक नागरिकताको विषय पनि लामाे समयदेखि टुंगाे लागेकाे छैन । यसमा हामी छलफल गरिरहेका छाैँ । सबै विषय टु‌ंगाेमा पुग्दै जान्छन् ।

कांग्रेस अब सरकारमा जाँदैछ । तपाईं मन्त्री बन्ने हाे ?

सांसद भएपछि सबै सांसदले मन्त्री हुन चाहन्छन् । अब पार्टीले दियो भने ठीकै छ । दिएन भने आत्तिने छैन । पहिला सरकार बनोस्, राम्रो मान्छेहरू सरकारमा जाऊन् भन्ने चाहना छ ।

पार्टीले मन्त्री बनाउँदा नयाँ व्यक्तिलाई प्राथमिकता दिन्छ कि पुरानै दाेहाेरिन्छन् ?

यो पार्टीको नेतृत्वले विचार गर्ने कुरो हो । तर, पार्टीभित्र पटक–पटक मन्त्री भएकाहरूलाई नपठाउने चर्चा चहिलरहेको छ । विगतमा उनीहरूले सरकारमा रहँदा जनताको चाहनाअनुसार काम गर्न नसकेकाे कुरा पनि छ । फेरि उनीहरूलाई नै मन्त्री बनाउँदा पार्टीप्रति नकारात्मक सन्देश जान्छ ।

केन्द्रमा सत्ता समीकरण फेरिएपछि मधेसमा के हुन्छ ?

प्रदेशकाे समीकरण पनि फेरिन्छ नै । नेतृत्वको विषयमा अहिलेसम्म कुनै सहमति भएको छैन । अब छलफल हाेला ।

कांग्रेसको आधारभूमि मधेस हो । तर, मधेसलाई कांग्रेसले सधैँ उपेक्षा गरेकाे आराेप कति सत्य हाे ?

यसपटक कांग्रेसले मधेसलाई महत्त्व दिएन भने विलीन हुन्छ । यो महसुस हाम्रो नेतृत्वलाई भइसकेको हो । मधेसमा जुन किसिमले विकास गर्नुपर्ने हाे, त्याे गर्न नसके मधेसमा फेरि क्षेत्रीय पार्टीहरू हाबी हुन्छन् ।

प्रदेश सरकारको कामबाट कत्तिकाे सन्तुष्ट हुनुहुन्छ ?

पक्टकै होइन । प्रदेश सरकारले विकासभन्दा पनि भष्टाचारमा ध्यान दिएकाे देखियाे । संघीयतालाई संस्थागत गर्न सकेन । अबकाे सरकारले विगतको कमजोरीलाई सच्याएर अगाडि बढ्नुपर्छ ।

प्रकाशित मिति: आइतबार, चैत ५, २०७९ १३:५२