तीन मन्त्रालय पाए एकीकृत समाजवादीबाट यी हुन् सम्भावित मन्त्री

A+ A A-

शुक्रबार उपराष्ट्रपतिको चुनाव हुँदै गर्दा एकीकृत समाजवादीका उपाध्यक्ष राजेन्द्र पाण्डेले भनेका थिए, ‘हाम्रो पार्टी रोजा मन्त्रालय लिएर सरकारमा जान्छ ।’ कांग्रेसले राष्ट्रपति, माओवादीले प्रधानमन्त्री र जसपाले उपराष्ट्रपति रोजेको र एकीकृत समाजवादीले केही नलिएकाले सरकारमा रोजेको मन्त्रालय पाउने उनको भनाइ थियो ।

पार्टीले गृह मन्त्रालय दाबी गर्ने र त्यसमा उनी जाने चर्चा छ । तर, एकीकृत समाजवादीलाई रोजेको मन्त्रालo पाउन गाह्रो छ । अर्थ, गृह र परराष्ट्र मन्त्रालय उसले पाउने सम्भावना कम छ । सो पार्टीले धेरै मागेको सत्ता गठबन्धनको अन्य दलहरूको आरोप छ ।

उपाध्यक्ष पाण्डेले राजकाज चलाउनेदेखि विकास गर्ने मन्त्रालयको संयोजन मिलाएर पार्टीले दाबी गर्ने बताएका छन् ।

पार्टीले संस्कृति पर्यटन तथा नागरिक उड्ययन, ऊर्जा जलस्रोत तथा सिचाई र शहरी विकास मन्त्रालय दाबी गर्ने एक सचिवालय सदस्यले शिलापत्रलाई जानकारी दिए । ती नेताका अनुसार उपाध्यक्ष पाण्डे र उपमहासचिव प्रकाश ज्वालामध्ये एक जना मन्त्री हुनेछन् । पाण्डे मन्त्री भए ऊर्जा र ज्वाला मन्त्री भए अर्थमा सम्भावना रहेको उनले बताए ।

भूगोलको हिसाबमा सल्यानका ज्वाला मन्त्री बनेमा डाेल्पाका धनबहादुर बुढाले यसपटक पनि अवसर पाउने छैनन् । बुढा चुनाव अघिको सरकारमा पनि मन्त्री बन्ने लाइनमा रहेर अन्तिम समयमा बाहिरिएका थिए । उनको सम्भावना पाण्डे मन्त्री बनेको अवस्थामा मात्र रहनेछ । बुढा मन्त्री भएमा पर्यटन मन्त्रालयमा उनको रुची छ ।

शहरी विकासमा मेटमणि चौधरीले दाबी गरेका छन् । पार्टीको संगठन कमजोर देखिएको दाङ १ बाट उनले चुनाव जितेका थिए । पार्टीबाट भानुभक्त जोशी पनि मन्त्री बन्ने लाइनमा छन् । चुनावअघिको सरकारमा समेत मन्त्री बन्न आकांक्षा राखेका जोशी यसपटक मन्त्री बन्ने दौडमा देखिएका छन् ।

अर्को चुनावसम्ममा एकपटक पार्टीले सरकारको नेतृत्व गर्ने अवसर पाउने भएकाले यी आकांक्षीको व्यवस्थापन हुन सक्ने ती पदाधिकारी बताए । तीनपटकसम्म मन्त्री बन्ने पालो आउने भएकाले क्रमैसँग मन्त्री बनाउने नीति एकीकृत समाजवादीको छ ।

पार्टीले राज्यमन्त्री भाग पाए दैलेखबाट निर्वाचित अम्मरबहादुर थापाले अवसर पाउने चर्चा छ ।

प्रकाशित मिति: शनिबार, चैत ४, २०७९ १८:००