झञ्झटिलो प्रक्रियाका कारण खाद्य व्यवस्था कम्पनी जनकपुरलाई लक्ष्यअनुसारको धान खरिद गर्न धौधौ

झञ्झटिलो प्रक्रियाका कारण खाद्य व्यवस्था कम्पनी जनकपुरलाई लक्ष्यअनुसारको धान खरिद गर्न धौधौ

A+ A A-

खाद्य व्यवस्था तथा व्यापार कम्पनी लिमिटेड प्रादेशिक कार्यालय जनकपुरले लक्ष्यअनुसार धान खरिद गर्न सकेको छैन । सरकारले यस वर्ष १५ हजार क्विन्टल धान खरिद गर्ने लक्ष्य दिएकोमा कार्यालयले हालसम्म ९६४.२५ क्विन्टल धान खरिद गरेको छ ।

कार्यालयका अनुसार यस वर्ष अहिलेसम्म ३० लाख १६ हजार १७४ मूल्यबराबरको धान मात्रै खरिद भएको छ ।

यस वर्ष खरिद पक्रिया झञ्झटिलो रहेकाले लक्ष्यअनुसार धान खरिद गर्न नसकिएको कार्यालयका कर्मचारीहरू बताउँछन् । कृषि ज्ञान केन्द्र धनुषाका प्रमुख शंकर साहको संयोजकत्वमा गठित समितिले धान खरिद गर्दा किसानहरूले जग्गाधनी लालपुर्जा र बैंकमा खाता खोलेको हुनुपर्ने नियम लागू गरेको थियो । किसानहरूले झञ्झटिलो प्रक्रियाका कारण निजी गल्ला व्यापारीलाई धान बेचेकाले लक्ष्य पूरा गर्न नसकेको कार्यालयका सूचना अधिकारी रामपुकार मण्डल बताउँछन् ।

सुरुवातमा भने कार्यालयले गत वर्ष खरिद गरेको धान गोदाममै रहेको भन्दै किसानहरूको धान किनेको थिएन । कार्यालयले धान नकिनेपछि किसानहरू व्यापारीहरूलाई कम मूल्यमा धान बेच्न बाध्य भएका थिए । अघिल्लो आर्थिक वर्षमा कार्यालयले १५ हजार क्विन्टल धान खरिद गर्ने लक्ष्य लिएकोमा १६ हजार ६६८ क्विन्टल धान खरिद भएको थियो ।

किसानहरूका अनुसार व्यापारीले उधारोमा धान किन्ने गरेका छन् भने कार्यालयले नगदमै खरिद गर्ने गर्दछ । तर, यस वर्ष झञ्झटिलो प्रक्रियाका कारण किसानहरू व्यापारीलाई धान बेच्न बाध्य भएका हुन् । अन्य जिल्लामा रहेका कम्पनीका कार्यालयहरूले भने एक किसानसँग बढीमा ६५ क्विन्टलसम्म धान खरिद गरेको किसानहरू बताउँछन् ।