कांग्रेस इतर समूहको छलफल, मन्त्री पठाउनेबारे छलफल गर्न ५ चैतपछि फेरि बस्ने

A+ A A-

बिहीबार कांग्रेस संस्थापनइतर समूहको भेला काठमाडौंको नक्सालस्थिति एक होटलमा भयो । बैठकमा मन्त्रीमण्डलमा को जाने ? पठाउने मापदण्ड के हुनेबारे छलफल भयो । तर, निश्कर्ष आएन । किनकी यो अपडेट भेला थियो । भेलाको संयोजन सांसद दीपक गिरीले गरेका थिए ।

भेलामा इतर समूहका पदाधिकारी, सांसद र केन्द्रीय सदस्य सहभागी थिए । छलफलमा मन्त्री बनाउने मापदण्ड, योग्यता लगायतका विषयमा छलफल भएको सहभागी एक नेताले शिलापत्रई जानकारी दिए ।

भेलामा नेता शेखर कोइरालाले ५ चैतपछि फेरि बस्ने भनेको ती नेताले बताए । ‘अज निश्कर्ष आउने कुरा थिएन । शेखर दाईले ५ गतेपपछि बस्ने भन्नुभएको छ,’ ती नेताले भने ।

५ गते प्रतिनिधिसभा बैठक बस्दैछ । सो दिनसम्म उपराष्ट्रपतिको चुनावको आचारसंहिता लागू हुने भएकाले मन्त्रीमण्डल विस्तार गर्न मिल्दैन । शुक्रबार उपराष्ट्रपतिको चुनाव हुँदैछ ।

इतर समूहबाट मन्त्री बन्ने सम्भावना भएका नेताहरूमा उपसभापति धनराज गुरुङ, सहमहामन्त्रीद्वय बद्री पाण्डे र जीवन परियारको चर्चा हुने गर्छ । यस्तै, दिपक गिरी, सञ्जयकुमार यादव, तेजुलाल चौधरी, राजेन्द्र बजगाईं, डिगबहादुर लिम्बु, सुनील शर्मा, सुरेन्द्रराज आचार्य, सरिता प्रसाईं प्रतिमा गौतमलगायतका नेताहरू मन्त्रीका आकांक्षी छन् ।

तीमध्ये कम्तीमा तीन मन्त्रालय इतर समूहले पाउनुपर्ने उनीहरू बताउँछन् । आकांक्षीमध्ये प्रतिमा र राजेन्द्रले नयाँ अनुहारले पालो पाउनुपर्ने र योग्यता परीक्षणको अवसर हुनुपर्ने बताउँदै आएका छन् । कांग्रेस सरकारमा सहभागी हुँदा कम्तीमा आठ मन्त्रालय पाउने निश्चित छ ।

इतर समूहले छलफल गरिरहँदा पार्टीभित्र भने यस विषयले औपचारिक प्रवेश पाएको छैन । पार्टी प्रवक्ता डा. प्रकाशशरण महत प्रधानमन्त्रीले विश्वासको मत लिइसकेपछि सरकार विस्तार हुने बताउँछन् । ‘अहिले यो विषय छलफलमा प्रवेश गरेको छैन । विश्वासको मत लिइसकेपछि सबै कुराहरू अगाडि बढ्छ,’ उनले भने ।

प्रकाशित मिति: बिहीबार, चैत २, २०७९ २०:०४