क्रिकेटमा ‘डीएल मेथड’ के हो ?

A+ A A-

क्रिकेट अन्य खेलहरुभन्दा बढी नियम भएको खेल हो । क्रिकेटमा धेरै नियम भएकै कारण सम्भावनाहरु हर समय जीवितै हुन्छन् । क्रिकेटकै एउटा डकवर्थ–लुइस नियम (डीएल) अनुसार आज नेपालले यूएईविरुद्धको खेल जितेको छ ।

३११ को विशाल लक्ष्य पछ्याउँदै ब्याटिङमा उत्रिएको नेपालले ६ विकेटको क्षतिमा ४४ ओभरमा २६९ रन बनाएको थियो । नेपालले खेल जित्ने सम्भावना कायमै रहेको अवस्थामा अम्पाएरहरूले खराब प्रकाशका कारण खेल अगाडि बढ्न नसक्ने निर्णय लिए । खेलको नतिजा ‘डिएल मेथड’बाट निकालियो । जसअनुसार नेपाल ९ रनले विजयी भयो ।

के हो ‘डीएल मेथड’ ?

कतिपयलाई डीएल मेथडबारे जानकारी नहुन सक्छ । तर क्रिकेटका फ्यानहरूलाई यो नियमबारे जानकारी हुनसक्छ । यो नियम सुरुमा १९९७ मा जिम्बाबे र इंग्ल्यान्डबीचको खेलमा लागू गरिएको थियो । पछि अन्तराष्ट्रिय क्रिकेट परिषद् आईसीसीले सन् १९९९ मा यो नियमलाई औपचारिक रुपमा लागू गरेको हो ।

भौगोलिक तथा प्राकृतिक कारणले खेलमा प्रभाव पारेको खण्डमा खेललाई निर्णयसम्म पुर्‍याउन डकवर्थ लुइसको प्रयोग गरिन्छ । सोही नियम बिहीबार त्रिवि क्रिकेट मैदानमा नेपाल र यूएईबीचको खेलको नतिजा घोषणाा गरिएको हो ।

यस पद्धतिमा पहिले ब्याटिङ गर्ने टोलीलाई आर १ तथा दोस्रो इनिङ्समा ब्याटिङ गर्ने टोलीलाई आर २ का रुपमा मानिन्छ ।

निर्णयका लागि विभिन्न तीन फरक पद्धतिबाट यसको गणना गरिन्छ । टिम २ को रन औषत टिम १ को भन्दा कमजोर रहेको अवस्थामा पावर प्लेमा प्रहार गरेको रनरेटको औषतलाई समेत गणना गरी विकेटको अवस्थालाई पनि हिसाबको पाटोको रुपमा गणना गरिन्छ ।

डीएल मेथड ५ देखि ५० ओभरको खेलमा प्रयोग गरिन्छ । जसका लागि शेष विकेट महत्वपूर्ण पाटोका रुपमा रहेको हुन्छ ।

टोनी लुईस र फ्रान्क डकवर्थले संयुक्त रुपमा यो नियमको प्रतिपादन गरेका थिए । लुइसले डकवर्थसँगको सहकार्यकामा लिमिटेड ओभरको क्रिकेटमा वर्षाले प्रभावित भएमा नयाँ लक्ष्य दिनका लागि डकवर्थ एण्ड लुइसको नियम बनाएका हुन् ।

प्रकाशित मिति: बिहीबार, चैत २, २०७९ १८:४१