नेपालमै पहिलोपटक गणित पार्कको सुरुवात

$नेपालमै पहिलोपटक गणित पार्कको सुरुवात$

A+ A A-

विद्यार्थीलाई गणित विषय गाह्रो हुन्छ भन्ने मानसिकताबाट टाढा राख्न नेपालमा पहिलोपटक म्याथ पार्कको सुरुवात गरिएको छ । गणितलाई प्रयोगात्मक र जीवनोपयोगी बनाउने उद्देश्यले म्याथ पार्कको सुरुवात गरिएको हो ।

बूढानीलकण्ठमा रहेको इम्पेरियल वर्ल्ड स्कुलले स्थापना गरेको म्याथ पार्कको आज उद्घाटन गरिएको छ । पाई डे तथा अन्तर्राष्ट्रिय गणित दिवसको अवसर पारेर उक्त पार्कको आज उद्घाटन गरिएको हो । प्रमुख अतिथि विज्ञान प्रविधि सचिव प्रमिलादेवी वज्राचार्यले पार्कको उद्घाटन गरेकी हुन् ।

म्याथ पार्कमा विद्यार्थीहरूले म्याथलाई प्रयोग गरेर रमाउँदै सिक्ने अवसर प्राप्त गर्नेछन् । गणित विषय गाह्रो हुन्छ भन्ने मानसिकताबाट विद्यार्थीलाई टाढा राख्न म्याथ पार्कको भूमिका रहनेछ । साथै, शिक्षकको अनुपस्थितिमा पनि विद्यार्थीहरूले आफैँ म्याथ पार्कमा गणितका नयाँ कुराहरू सिक्न सक्छन्, जसले कक्षा कोठाको शिक्षणमा पनि सहयोग पुग्नेछ ।

विज्ञान प्रविधि सचिव प्रमिलादेवी वज्राचार्यले नेपालमा पहिलो म्याथ पार्क निर्माणले शिक्षाक्षेत्रमा नयाँ कुरा थपिएको बताइन् । उनले साइन्स र म्याथप्रति विद्यार्थीको आकर्षण कम हुने गरेको बताउँदै म्याथ पार्कले विद्यार्थीलाई सहज हुने धारणा राखिन् ।

मन्त्रालयले स्टिम शिक्षाका सामग्री तयार पार्ने कार्य भइरहेको जानकारी दिँदै पूरा भएपछि विद्यालयलाई वितरण गरेर शिक्षकहरूलाई यसबारे तालिम दिन तयारी गरेको समेत उनले जानकारी दिइन् ।

नेपाल शिक्षक महासंघकी अध्यक्ष कमला तुलाधरले यस्ता खालका पार्क सबै विद्यालयमा हुन आवश्यक रहेको बताइन् । म्याथका बारेमा किताब र कक्षा कोठामा मात्रै पढाइनेभन्दा पनि यसरी विद्यार्थीले प्रयोग नै गरेर पढ्न पाउँदा यसले शिक्षामा गुणस्तर कायम गर्न सहयोग पुन्ने उनको भनाइ थियो ।

अंग्रेजी जानी नजानी बोल्ने गरे पनि गणित आउँदैन भन्ने र यसलाई महत्त्वका साथ नहेरिएको काठमाडौं विश्वविद्यालय स्कुल अफ एजुकेशन, स्टिम विभागका प्रमुख विनोद पन्तले बताए । उनले भने, 'अंग्रेजी नजाने पनि बोल्ने प्रचलन छ । तर, गणित आउँदैन भन्ने र यसलाई महत्त्व नदिने गरेको पाइन्छ ।'

पन्तले गणितबिना कुनै पनि अध्ययन पूरा नहुने र साइन्स, फिजिक्स, कम्प्युटर साइन्सलगायतलाई अनिवार्य आवश्यक रहेकाले गणितको महत्त्व रहेको धारणा राखे । साथै, विद्यार्थीलाई गणित सिकाइ कक्षा कोठामा मात्र नभई पार्कसँगै लगेर जोड्नुपर्नेमा जोड् दिए ।

$Math Park (2)1678805051.jpg$

विद्यालयकी प्रिन्सिपल जुनिता शाही कार्कीले विद्यालयको म्याथ विभागका कारण म्याथ पार्क निर्माण गर्न सकिएको बताइन् । गणित विषय सबैका लागि कठिन हुने बताउँदै रमाइलो तरिकाले गणित पढ्नका लागि सहज होस् भन्ने उद्देश्यले यसको सुरु गरिएको बताइन् । कार्कीले आफ्ना विद्यार्थीले मात्रै नभएर निजी, सार्वजनिक जुनसुकै विद्यालयका विद्यार्थीहरूले पनि पार्कको अवलोकन गरेर गणित पढ्न सक्ने जानकारी दिइन् ।

प्रकाशित मिति: मंगलबार, फागुन ३०, २०७९ २०:२९