राष्ट्रपति र उपराष्ट्रपति चुनावले मन्त्रिपरिषद् विस्तार धकेलियो, चैत ८ सम्म ‘होमवर्क टाइम’

राष्ट्रपति र उपराष्ट्रपति चुनावले मन्त्रिपरिषद् विस्तार धकेलियो, चैत ८ सम्म ‘होमवर्क टाइम’

A+ A A-

चैत ३ को उपराष्ट्रपतिको चुनावअघिसम्म सत्ता गठबन्धनका दलभित्र मन्त्री छान्ने होमवर्कको समय छ । गठबन्धनका दलभित्र उपराष्ट्रपतिको चुनावपछि प्रधानमन्त्री पुष्पकमल दाहाल 'प्रचण्ड'ले विश्वासको मत लिने र त्यसपछि मात्र सरकार विस्तार गर्ने सहमति भएको छ । सो समयसम्म दलले पाउने मन्त्रालय र मन्त्रीका बारेमा पार्टीभित्र छलफल गर्न समय हुनेछ ।

हाल १६ मन्त्रालयको कार्यभार प्रधानमन्त्री स्वयंले सम्हालेका छन् । राष्ट्रपति चुनावले पुस १० को गठबन्धन भत्कियो । १३ माघमा राप्रपाले सरकारबाट बाहिरिँदै विश्वासको मत फिर्ता लियो । त्यसको तीन दिनपछि एमालेले विश्वासको मत फिर्ता लियो । जसका कारण १३ चैतभित्र प्रतिनिधिसभाबाट विश्वासको मत लिइसक्नुपर्ने बाध्यतामा छन् प्रचण्ड ।

५ चैतमा प्रतिनिधिसभाको बैठक डाकिएको छ । प्रधानमन्त्रीले ८ चैतमा विश्वासको मत लिने छलफल भइरहेको छ । तर, फाइनल भएको छैन । ‘प्रधानमन्त्रीज्यूले चैतको ८ गते विश्वसको मत लिनुहुन्छ होला । गठबन्धनमा छलफल भइरहेको छ,’ एकीकृत समाजवादीका एक पदाधिकारीले शिलापत्रसँग भने ।

माओवादी उपमहासचिव शक्तिबहादुर बस्नेत सरकार विस्तारको विषय उपराष्ट्रपति निर्वाचनपछि मात्र प्राथमिकतामा हुने बताउँछन् । ‘अहिले सरकार विस्तारको विषयमा छफल भएको छैन । यो कोही एक व्यक्तिले चाहेर मात्र हुने हैन । गठबन्धनभित्र छलफल हुनपर्छ,’ बस्नेतले शिलापत्रसँग भने, ‘राष्ट्रपति निर्वाचन सकियो । उपराष्ट्रपति निर्वाचन चैत ३ मा छ, हामी अहिले त्यसतर्फ केन्द्रित छौँ । त्यसपश्चात् विश्वासको मत उहाँले लिनुहुन्छ । अनि सरकार विस्तारमा छलफल हुन्छ ।’

यस्तै, जवाफ कांग्रेस उपसभापति पूर्णबहादुर खड्काको पनि छ । कांग्रेसले ९ मन्त्रालयको दाबी गरिरहेको छ । यसबारे छलफल उपपराष्ट्रपतिको चुनावपछि मात्र छलफल हुनेछ । ‘राष्ट्रपति चुनाव सम्पन्न भयो, उपपराष्ट्रपतिको बाँकी छ । समीकरण पनि फेरिएको छ । पार्टीभित्र मन्त्रीका बारेमा र गठबन्धनभित्र मन्त्रालयका बारेमा छलफल प्रधानमन्त्रीको विश्वासको मतपछि मात्र हुन्छ,’ उनले शिलापत्रसँग भने ।

गठबन्धनमा आठ दल मुख्य रूपमा देखिएका छन् । माओ‌वादी केन्द्रसहित कांग्रेस, एकीकृत समाजवादी, जसपा, लोसपा, जनमत पार्टी, नागरिक उन्मुक्ति, राष्ट्रिय जनमोर्चा गठबन्धनमा छन् ।

एकीकृत समाजवादीले ४ मन्त्रालयमा दाबी गरिरहेको छ । कम्तीमा दुई मन्त्रालय भए पनि तीन मन्त्री पाउनेमा पार्टीका नेताहरू ढुक्क छन् । सरकारमा कोको सहभागी हुने भन्नेबारे गठबन्धनमा उपराष्ट्रपति चुनावपछि मात्र तय हुने सांसद प्रकाश ज्वाला बताउँछन् । ‘गठबन्धनमा प्रधानमन्त्रीको विश्वासको मतपछि छलफल हुन्छ । हामी उपराष्ट्रपति चुनावमा केन्द्रित छौँ, ज्वालाले भने ।

आफ्ना मुद्दामा सरकारले सहमति नजनाए आफ्नो दल सरकार बाहिर रहने नागरिक उन्मुक्ति पार्टीकी अध्यक्ष रञ्जिता श्रेष्ठ बताउँछिन् । पार्टीका संस्थापक रेशम चौधरीको रिहाइ, टिकापुर घटनाका दोषिलाई माफी, राजनीतिक घटनालाई फौजदारी नबनाउन उसको माग छ ।

‘हामी सरकारमा सहभागी हुनका लागि हाम्रा माागको सम्बोधन हुनुपर्छ,’ श्रेष्ठले भनिन्, ‘सरकारमा सहभागी हुनैपर्छ भन्ने छैन ।’

सरकालाई समर्थन र विश्वासको मत दिए पनि मन्त्रालय बाँडफाँटमा असन्तुष्टि जनाएर जसपा सरकारमा सहभागी भएको थिएन । गठबन्धनबाट दुई मन्त्रालय पाए पनि उसले सहभागिता जनाएको थिएन । वन र खेलकुद मन्त्रालय जसपालाई राखेर प्रधानमन्त्री प्रचण्डले कामकाज चलाएका थिए ।

डेलिभरी गर्ने मन्त्रालय पार्टीलाई चाहिएको जसपाका प्रमुख सचेतक प्रदीप यादव बताउँछन् । ‘हामीलाई काम गर्ने विकाससम्बन्धी मन्त्रालय चाहिन्छ । हामी त्यो लिएर मात्र सरकारमा जान्छौँ,’ उनले भने, ‘अघिल्लोपटक परिणाम देखिने मन्त्रालय भएन । अब काम गरेर डेलिभरी दिने मन्त्रालय लिन्छौँ र सरकारमा जान्छौँ ।’

लोसपा पनि एक मन्त्रालय लिएर सरकारमा जाने भएको छ । लोसपाका एक नेता पार्टीले शरतसिंह भण्डारीलाई सरकारमा पठाउने र ऊर्जा मन्त्रालयमा दाबी गर्ने नेताहरू बताउँछन् । तर, भण्डारी भने मन्त्रालयका बारेमा छलफल नभएको बताउँछन् । ‘हामीले मात्र भनेर हुँदैन । गठबन्धनमा सहमति पनि हुनपर्छ,’ भण्डारीले भने ।

राष्ट्रपति चुनावमा गठबन्धनलाई सघाएको रास्वपा सरकारमा सहभागी हुने विषयमा छलफलमा छ । रास्वपा सभापति रवि लामिछानेले परिस्थिति नियालिरहेको जवाफ दिएका छन् । ‘छलफलमा छौँ । पार्टीभित्र फरक–फरक मत आइरहेको छ । निर्णय लिइसकेको छैन । सकारात्मक माहौल भए सरकारमा जान सकिन्छ,’ रास्वपाका एक सांसदले शिलापत्रसँग भने । रास्वपा सरकारमा सहभागी भए उसलाई दुईवटा मन्त्रालय दिन सकिने कांग्रेस नेताहरू बताउँछन् ।

प्रकाशित मिति: सोमबार, फागुन २९, २०७९ १९:२३