साना व्यवसायीको समस्या राम्रोसँग बुझेको छु: अञ्जन श्रेष्ठ (भिडियो)

A+ A A-

अहिले नेपाल उद्योग वाणिज्य महासंघअन्तर्गतका उद्योगी व्यवसायीलाई चुनाव लागेको छ । चैत २८, २९ र ३० गते काठमाडौंमा हुने नेपाल उद्योग वाणिज्य महासंघको साधारणसभा तथा निर्वाचनका लागि विभिन्न पदका आकांक्षीहरू देश दौडाहामा छन् । व्यवसायी अञ्जन श्रेष्ठ महासंघको वरिष्ठ उपाध्यक्षका आकांक्षी हुन् । विगत ३० वर्षदेखि उद्योग व्यवसायमा लागेका श्रेष्ठ २० वर्षदेखि महासंघका विभिन्न जिम्मेवारी रहेर काम गरिसकेका छन् । वरिष्ठ उपाध्यक्षको रूपमा आफूलाई अघि सार्नुको उद्देश्य, नेतृत्वमा पुगेपछिको योजनालगायतका विषयमा शिलापत्रका सुधिर भण्डारीले अञ्जन श्रेष्ठसँग गरेको कुराकानीको सम्पादित अंश:

नेपाल उद्योग वाणिज्य महासंघको वरिष्ठ उपाध्यक्षमा तपाईंको आकांक्षा किन ?

म उद्योग वाणिज्य महासंघमा आबद्ध भएको २० वर्ष भयो । सुरुमा म समितिको सदस्यको रूपमा महासंघमा प्रवेश गरेँ । कार्यसमितिमा आबद्ध भएको १५ वर्ष भयो । एक कार्यकाल पदाधिकारी भएको छु । महासंघमा बस्दा मैले विभिन्न मुख्य–मुख्य समितिमा रहेर काम गरेँ । उद्योग समितिमा सदस्य भएँ, वाणिज्य समितिमा सदस्य भएँ, राजस्व समितिमा दुईपटक सह–सभापति भएँ, रोजगारदाता परिसरमा ९ वर्ष बसेँ र पछिल्लोपटक उद्योग समितिको सभापति थिएँ । अहिले म वस्तुगत क्षेत्रबाट उपाध्यक्ष भएको छु । महासंघमा मेरो २० वर्षको आबद्धताले मलाई निजीक्षेत्रको समस्या, आकांक्षा, चुनौतीलगायतका बारेमा जानकार बनाएको छ । र, मेरो आफ्नो ३० वर्षको व्यावसायिक अनुभवले गर्दा पनि अबचाहिँ म नेतृत्वउन्मुख भएर अगाडि जान सक्छु र निजीक्षेत्रको हकहितका लागि काम गर्न सक्छु । त्यसको अर्थ लगानीको वातावरण बनाउने, व्यावसायिक वातावरण बनाउने, लगानीको सुरक्षा गर्ने कुरामा मैले भूमिका खेल्न सक्छु भन्ने हिसाबले र अब यो २१औँ शताब्दीमा व्यवसाय नयाँ–नयाँ किसिमको आइरहेको छ । हिजोको युग एउटा थियो भने अहिले डिजिटल युग अगाडि आइसकेको छ । यो नयाँ परिवर्तनलाई आत्मसात् गरेर लानुपर्ने अवस्था छ । अहिले मुलुक चुनौतीपूर्ण अवस्थामा छ । सरकारले अर्थतन्त्रमा केही समस्या छ भनिरहेको छ, हामी व्यवसायी के भन्छौँ भने उद्योग, व्यापार, व्यवसायमा ठूलो समस्या छ । यी समस्याहरूलाई हामीले चिनुपर्नेछ । समाधान गर्नुपर्नेछ । जर्जर भएको अर्थतन्त्रमा, सुकेको व्यापार, घटेको उत्पादन, कटौती भएको रोजगारीलाई पुनर्जीवित गर्नु छ । यो चुनौतीको सामना गरेर नयाँ ढंगले समस्याको समाधानका लागि पहल गर्छु भनेर अगाडि बढ्न खोजेको हुँ ।

वरिष्ठ उपाध्यक्षको पदमा तपाईंबाहेकका अरु ३ जनाले पनि आकांक्षा देखाउनुभएको छ । उहाँहरूभन्दा तपाईंमा फरक के ?

मसँग लामो समयदेखिको व्यावसायिक र संस्थागत दुवै अनुभव छ । संस्थाभित्र पनि मैले मुख्य–मुख्य निजीक्षेत्रको विधामा काम गरेको छु । व्यवसायको कुरा गर्नुहुन्छ भने हामी सानो व्यवसायबाट उठेको समुह हौँ । हाम्रो इतिहास हेर्ने हो भने हामीले २०३० सालमा ३ सय रुपैयाँबाट उद्योग सुरु गरेका थियौँ । यहाँसम्म आइपुग्दा हामी उत्पादन क्षेत्र, कृषि प्रशोधन क्षेत्र, प्याकेजिङ क्षेत्र, स्टिल म्यानुफ्याक्चर क्षेत्र, ट्रेडिङ क्षेत्रमा छौँ, खाद्यान्न क्षेत्रमा छौँ । त्यस्तै, पर्यटन क्षेत्रमा आउँदैछौँ, हाइड्रोमा आउने तयारीमा छौँ । समग्रमा हाम्रो व्यवसायमा विविधता छ । त्यस कारण निजीक्षेत्रका विभिन्न पक्षका समस्या र चुनौतीहरूलाई मैले राम्रोसँग बुझेको छु । त्यसकारण उहाँहरूभन्दा म यस क्षेत्रमा अनुभवी भएकाले पनि वरिष्ठ उपाध्यक्षका लागि मेरो दाबी उपयुक्त छजस्तो लाग्छ ।

तपाईंको जितको आधार के हो ?

मेरो जितको मुख्य आधार त अनुभव नै हो । त्यस्तै अर्को आधार मेरो आत्मबल हो ।

चुनाव नजिकिँदै जाँदा तपाईंको देश दौडाहा पनि बढेको छ । तपाईंले देशभरका साना तथा मझौला के प्रतिक्रिया पाउनुभएको छ र उनीहरूको के आशा पाउनुभयो ?

अहिलेको अवस्थामा साना तथा मझौला व्यवसायीहरू निकै पीडामा छन् । विशेषगरी बैंकको ब्याजदरको कुराले गर्दा मुख्य पीडामा छन् । बजार घटेर, व्यापार घटेर निकै समस्यामा छन् । व्यवसायीहरू आफ्नो खर्च पनि धान्न नसक्ने अवस्थामा छन् । पसलको भाडा तिर्न नसक्ने अवस्था छ । यी समस्याले गर्दा मानसिक पीडा थपिएको छ । त्यो पीडाबाट व्यवसायीहरूलाई बाहिर ल्याउनुपर्ने चुनौती हामीलाई छ । त्यसका लागि हामी प्रयास गर्छौं ।

तपाईं निर्वाचित भएपछिका योजनाहरू के–के छन् ?

यसका लागि हामीले योजना बनाइरहेका छौँ । छिट्टै बाचापत्र पनि सार्वजनिक गर्छौं । मुख्य कुरा हाम्रो संस्थाको आवाजलाई अझ सुनिने बनाउन, प्रभाव बढाउनु जरुरी छ । त्यसका म काम गर्नेछु । दोस्रो, निजीक्षेत्रको सम्मान र मर्यादाका कुराहरू गर्नु छ । निजीक्षेत्रप्रति हेर्ने, सोच्ने र बुझ्ने दृष्टिकोणलाई सम्मानित बनाउनु जरुरी छ । सम्मान खोजिरहँदा हामी जिम्मेवार छौँ भन्ने सन्देश पनि दिनुपर्छ । अर्को कुरा, संगठनात्मक सुधार गर्नुपर्छ । जिल्ला उद्योग वाणिज्य संघ, वस्तुगत संघ सुधार गर्नु छ । प्रदेशलाई अझ मजबुत बनाउनुपर्नेछ । कार्यक्रमहरूका लागि स्रोत व्यवस्थापन गर्नु जरुरी छ । त्यस्तै, सबैले माग गरिरहेको कुरा विधान संशोधनलगायतका कुराहरूलाई विशेष मनन गरेर अगाडि बढ्नुपर्ने स्थिति छ । समग्रमा भन्नुपर्दा व्यावसायिक वातावरण बनाउने र लगानी सुरक्षा गर्ने हाम्रो जिम्मेवारी हो । यो अहिलेका लागि मात्र होइन, भावी सन्ततिका लागि समेत गर्नुपर्नेछ ।

मुलुकलाई आर्थिक संकटबाट निकाल्न के गर्नुपर्ला ?

यसमा सरकार उदासीन भयो भन्ने हाम्रो कुरा हो । निजीक्षेत्रले आफ्नो काम त गर्छ नै । तरलता व्यवस्थापनको काम राज्यले गर्नुपर्ने हो । बजारलाई संकुचन गर्न हुँदैनथ्यो । अर्थतन्त्रलाई केही समस्या भयो भनेर बजारलाई संकुचन बनाइयो । यसले गर्दा अर्थतन्त्र समस्यामा छ । व्यापार सुकेको छ, उत्पादन घटेको छ, रोजगारी कटौती भइरहेको छ र अर्कोतर्फ सरकारले राजस्व गुमाएको छ । डेढ अर्ब राजस्व गुमाएको अवस्था छ । यो कुरालाई सुधार गर्नुपर्‍यो । यसका लागि निजीक्षेत्रलाई विश्वासमा लिनुपर्‍यो । सरकार जिम्मेवार हुनुपर्‍यो र उदासीन बनेर बस्नुभएन । निजीक्षेत्रसँग हातेमालो गरेर समाधान खोज्यो भने निश्चय पनि समस्या समाधान हुन्छ ।

एकातर्फ तरलताको समस्या छ, यो समस्या हटाउन आयात प्रतिबन्ध लगाउँदा राजस्वमा समस्या देखियो । दुवै समस्या हटाउने बीचको बाटोचाहिँ के छ ?

यसमा बीचको बाटो होइन, सबैभन्दा पहिले बजारलाई चलायमान बनाउनुपर्छ । अर्थतन्त्रमा केही बाह्य समस्या आयो, कोभिडका कारण पनि केही समस्या आयो, युक्रेन–रसिया युद्धका कारण केही समस्या आयो । त्यो समस्या हुुँदा सबैतर्फबाट थुनछेक गर्ने नीति लिइयो । मध्यविन्दुको नीति अवलम्बन गरेको भए आज यो समस्या उत्पन्न नै हुन्थेन । विदेशतिर जनताको क्रयशक्ति भएन भने क्यापिटल इन्जेक्ट गरिन्छ । हामीले त्यो गरेको खै त ? त्यो गरिएको भए आज यो समस्या आउने नै थिएन । त्यसकारण अर्थतन्त्रमा देखिएको समस्या समाधानका लागि सरकारले क्यापिटल इन्जिेक्ट गर्नुपर्छ । कसरी भन्दा तीनवटा कुरा छन् । ऋणको पुनर्संरचना अथवा पुनर्तालिकीकरण गर्नुपर्‍यो, ब्याजदर घटाउनुपर्‍यो र पुन: लगानी गर्नुपर्‍यो । धसिन लागेको अर्थतन्त्रलाई माथि उठाउन सरकारले यी तीनवटा काम गर्नुपर्छ । यो गरेन भने बजार अझै खस्किन्छ र भोलि धान्नै नसक्ने अवस्थामा हामी पुग्न सक्छौँ ।

महासंघले साना तथा मझौता उद्योग व्यवसायको हितमा जति गर्नुपर्थ्यो, त्यति गरेन भन्ने छ नि ?

महासंघले काम नगरेको भने होइन । कोभिडका बेलामा २ प्रतिशतसम्म ब्याजदर घटाउने काम गर्‍यो । बढी लिएको प्रिमियम फिर्ता हुनुपर्छ भनेर लविङ गर्‍यो । अहिले पनि लविङ त गरिरहेको छ नि । रिजल्ट सोचेजस्तो नआएको मात्र हो । हामीले लविङ मात्र गर्ने न हो, हामी निणर्यकर्ता होइनौँ । हामीले आफ्नो कुरा सरकारलाई राख्ने हो, कन्भिन्स गराउने हो । त्यो काम हामी गर्छौं ।

ठूला व्यवसाय पनि समस्यामा छन् । समस्यामा परेका व्यवसाय जोगाउन यहाँले कस्ता योजनाहरू ल्याउनुभएको छ ?

साना–ठूला सबैलाई समस्या छ । रि–फाइन्यान्सिङ, रि–स्ट्रक्चरिङ नै गर्ने हो र क्यापिटल इन्जेक्ट गर्ने हो । यसका लागि सरकार जिम्मेवार भएर प्रस्तुत हुनुपर्‍यो । सरकारले निजीक्षेत्रलाई प्रोत्साहन गर्नुपर्‍यो, सम्मान गर्नुपर्‍यो, हेर्ने दृटिकोण परिर्वतन गर्नुपर्‍यो, निजीक्षेत्रलाई नीति निमार्णमा साक्षी राख्ने मात्र होइन कि सही सुझाव ग्रहण गरेर अघि बढ्नुपर्‍यो ।

सरकारले तपाईंहरूको सुझाव कत्तिको कार्यान्वयन गरेको छ ?

कतिपय गरेको छ, कतिपय गरेको छैन । केहीमा साक्षी राख्ने काम मात्र पनि गरेको छ । त्यस कारण पनि हाम्रो संगठनको प्रभाव बढाउन जरुरी छ । त्यो कसरी बढाउने भन्ने हामीले सोचिरहेका छौँ ।

देशभर रहेका उद्योगी व्यवसायीलाई के प्रतिबद्धता जनाउन चाहनुहुन्छ ?

निजीक्षेत्रको हकहितका लागि म सधैँ तत्पर भएर बस्छु । निजीक्षेत्रको हकहितका लागि, व्यावसायिक वातावरणका लागि, लगानी सुरक्षाका लागि काम गर्दा आजका लागि मात्र होइन, भोलिका सन्ततिका लागि समेत हुने गरी काम गर्छु । समयसापेक्ष परिर्वतन भएका, विश्वमा भएका परिवर्तनलाई आत्मसात् गरेर निजीक्षेत्रको हकहितमा लाग्ने मेरो प्रतिबद्धता हो ।

हेर्नुहोस् भिडियो: