उद्योग वाणिज्य महासंघमा चुनावी सरगर्मी : वरिष्ठ उपाध्यक्षका लागि चार जना दाबेदार

उद्योग वाणिज्य महासंघमा चुनावी सरगर्मी : वरिष्ठ उपाध्यक्षका लागि चार जना दाबेदार

A+ A A-

नेपाल उद्योग वाणिज्य महासंघ नयाँ नेतृत्वको सम्मुख रहेको छ । मुलुक आर्थिक संकटमा परेका बेलामा उद्योगी, व्यापारी तथा व्यवसायी नयाँ नेतृत्व चुन्न लागेका हुन् । अध्यक्ष शेखर गोल्छाको कार्यकाल २८ चैतमा सकिँदैछ ।

गोल्छापछि महासंघको अध्यक्षमा वरिष्ठ उपाध्यक्ष चन्द्रप्रसाद ढकाल चयन हुनेछन् । महासंघको विधानले वरिष्ठ उपाध्यक्ष स्वतः अध्यक्ष हुने व्यवस्था गरेका कारण ढकाल अध्यक्ष हुन लागेका हुन् । र, गोल्छा पनि त्यसरी नै अध्यक्ष भएका हुन् ।

महासंघमा अब वरिष्ठ उपाध्यक्षका लागि भने निर्वाचिन हुँदैछ । २८ चैतबाट सुरु हुने महासंघको अधिवेशनले सन् २०२६–२९ को अध्यक्षका लागि अहिले वरिष्ठ उपाध्यक्ष निर्वाचित गर्दैछ । महासंघको इतिहासमा पहिलोपटक महिला अध्यक्ष हुने सम्भावना भएपछि वरिष्ठ उपाध्यक्ष स्वतः अध्यक्ष हुने व्यवस्था गरिएको हो । राणा वरिष्ठ उपाध्यक्ष थिइन् । उनी अध्यक्षमा निर्वाचित हुने सम्भावना कम भएपछि स्वतः अध्यक्ष हुने गरी विधान संशोधन भएको थियो । त्यसैले पहिला अध्यक्षका लागि हुने चुनावी प्रतिस्पर्धा अहिले वरिष्ठ उपाध्यक्षमा हुन थालेको छ ।

अहिले उद्योगी, व्यापारीहरू वरिष्ठ उपाध्यक्षको चुनावी माहोलमा लागेका छन् । आकांक्षीहरू प्यानल बनाउनेदेखि देश दौडाहामा पनि लागिसकेका छन् । अध्यक्षमा ढकाल निश्चित भएपछि भविष्यको अध्यक्षको सपना देखेर वरिष्ठ उपाध्यक्षका लागि चुनावी मैदानमा आउन चार जना आकांक्षी देखिएका छन् । त्यसरी आकांक्षा राख्नेमा बहालवाला उपाध्यक्ष नै तीन जना छन् भने एक जना अघिल्लो चुनावमा पराजित रहेका छन् ।

उद्योगी व्यवसायीहरूको भनाइमा वरिष्ठ उपाध्यक्षमा दिनेश श्रेष्ठ, अञ्जन श्रेष्ठ, रामचन्द्र संघाई र उमेशलाल श्रेष्ठ रहेका छन् । दिनेश श्रेष्ठ महासंघमा उद्योगतर्फका उपाध्यक्ष हुन् भने अञ्जन श्रेष्ठ वस्तुगततर्फको उपाध्यक्ष रहेका छन् ।

त्यसैगरी, सांघाई एशोसिएटतफका उपाध्यक्ष हुन् । उमेशलाल श्रेष्ठ भने अघिल्लोपटक ढकालसँग वरिष्ठ उपाध्यक्षमा पराजित भएका थिए । उनीहरूका चुनावी एजेन्डा भने अहिलेको आर्थिक संकटसँग जोडिएका छन् । उनीहरूले तरलताको समस्या, बैंकको व्याजदर, साना व्यापारी, उद्योगीका समस्यालाई प्राथमिकतामा राखेका छन् ।

महासंघले सार्वजनिक गरेको निर्वाचन कार्यतालिका अनुसार २८ र २९ चैतमा साधारणसभा र निर्वाचन हुनेछ । २८ चैतमा होटल याक एण्ड यतीमा साधारणसभा सकेर चुनाव चाहिँ २९ चैतमा नेपाल प्रज्ञा प्रतिष्ठान कमलादीमा हुनेछ ।

महासंघको चुनावका लागि उम्मेवार बन्न २१ चैत साँझ ५ बजेसम्म मनोनयन दर्ता गराउनुपर्नेछ । उम्मेदवारी र मनोनयन अनलाइनबाट समेत दर्ता गर्न सकिने व्यवस्था गरेको छ । महासंघका अनुसार वरिष्ठ उपाध्यक्षको लागि मनोनयन शुल्क ५ लाख, उपाध्यक्षका लागि ३ लाख र कार्यकारिणी सदस्यका लागि ७५ हजार रुपैयाँ तोकिएको छ । वरिष्ठ उपाध्यक्षसहित अन्य पदाधिकारी र सदस्यका लागि हुने चुनावमा देशभरबाट उद्योग,व्यवसायी काठमाडौं भेला हुनेछन् ।

प्रकाशित मिति: आइतबार, फागुन २८, २०७९ ०९:१३