विवादस्पद छवीकी ममता झा कसरी बनिन् जनमत पार्टीबाट उपराष्ट्रपतिको उम्मेदवार ?

विवादस्पद छवीकी ममता झा कसरी बनिन् जनमत पार्टीबाट उपराष्ट्रपतिको उम्मेदवार ?

A+ A A-

जनमत पार्टीले सप्तरीकी ममता झालाई उपराष्ट्रपतिको उम्मेदवार बनाएपछि सर्वसाधरणले उनको बारेमा चासो लिएका छन् । गत स्थानीय तहको निर्वाचनमा जनमत पार्टीमा प्रवेश गरेकी ममतालाई पार्टीले सप्तरी जिल्ला इन्चाजको जिम्मेवारीसमेत दिएको छ ।

सप्तरीको महादेवा गाउँपालिकाको मधवापुर निवासी ममता अहिले राजविराज नगरपालिका–६ मा बस्दै आएकी छन् । तत्कालीन सगरमाथा अञ्चलका अञ्चलाधिश जगदिश झाकी छोरी हुन् ममता झा । १ छोरा ३ तीन छोरीकी आमासमेत रहेकी ममता झा श्रीमान बिनोद झासँग सम्बन्ध विच्छेद गरेर लामो समयदेखि एक्कलै बस्दै आएकी छन् ।

कानुन व्यवसायीसमेत रहेकी झा नेपाल बार एसोसिएसन सप्तरी शाखा अध्यक्ष पनि भएकी थिइन् । सप्तरी शाखाको अध्यक्ष हुदाँ उनी विभिन्न पार्टीका नेताहरुसँग राम्रो सम्बन्ध बनाउन सफल भइन् । गजेन्द्रनायाण सिंहको सद्भावना पार्टीसँग जोडिएर राजनीतिक यात्रा सुरु गरेकी उनी समय र परिवेशअनुसार पार्टी परिर्वतन गर्दै अगाडि बढ्दै गएको स्थानीयहरु बताउँछन् । उनी नेकपा एमालेको भ्रातृ संगठन अखिल नेपाल महिला संघमा पनि केही वर्ष आवद्ध भएकी थिइन् ।

तत्कालीन मधेसी जनअधिकार फोरमबाट विजय गच्छेदारले पार्टी फोडेर फोरम लोकतान्त्रिक गठन गरी सरकारमा गएपश्चात तत्कालीन कृषि तथा सहकारीमन्त्री मृगेन्द्रकुमार सिंह यादवले झालाई साझा प्रकाशनको अध्यक्षमा नियुक्त गरेका थिए  ।

त्यतिखेर सरकारले संस्थाको केन्द्रीय भवन निर्माण गर्न २०६६ सालमा ४ करोड रुपैयाँ अनुदान दियो । तर रकम अपुग भएको भन्दै अध्यक्ष झाले थप ३ करोड ५० लाख अनुदान माग गरी चार तले जोडी भवनको बाहिरी संरचना निर्माण गराइन् । उक्त भवनको ४२ प्रतिशत मात्र काम हुदाँ विनियोजन गरिएको ७ करोड ५० लाखको ७५ प्रतिशत रकम खर्च भइसकेको थियो । पछि बाँकी रहेको काम पूरा गर्न थप ७ करोड रकम आवश्यक देखियो ।

त्यसपछि भवन निर्माणमा आर्थिक अनियमिता देखिएको महालेखा परीक्षकले प्रतिवेदन सार्वजनिक गरेपछि अख्तियार दुरुपयोग आयोगले साझामा छापा मारेर भवन निर्माणसम्बन्धी सम्र्पूा कागजात आफ्नो नियन्त्रणमा लिएपछि उनी पदबाट निलम्बित हुन पुगिन् । आयोगले त्यो प्रकरणको छानबिन गरे पनि त्यसको किनारा लागेको छैन ।

पछिल्लो समय जनमत पार्टीसँग आवद्ध भई राजविराज नगरपालिकाको मेयरमा उम्मेदवारी दिँदा उनी ९ सय २२ मत ल्याएर सातौँ स्थानमा थिइन् । सो पालिकामा जसपाका भिमराज यादव ९ हजार ६२४ मत ल्याएर मेयरमा निर्वाचित भएका थिए ।

प्रकाशित मिति: शनिबार, फागुन २७, २०७९ १६:२२