मधेश प्रदेशबाट पछिल्लो ८ महिनामा २८ सय फरार प्रतिवादी पक्राउ

A+ A A-

मधेश प्रदेश प्रहरीले पछिल्लो ८ महिनामा विभिन्न मुद्दामा लामो समयदेखि फरार रहेका २ हजार ८ सय १६ जना प्रतिवादीलाई पक्राउ गरेको छ । चालु आर्थिक वर्षको साउनदेखि २० फागुनसम्म प्रदेशका ८ वटै जिल्लाबाट उनीहरूलाई प्रहरीले पक्राउ गरेको हो ।

मधेश प्रहरी कार्यालयको तथ्याङ्कअनुसार सबभन्दा बढी जिल्ला प्रहरी कार्यालय पर्साले ४५४ जनालाई पक्राउ गरेको छ भने सबभन्दा कम सिरहा प्रहरीले २८३ प्रतिवादीलाई पक्राउ गरेको छ ।

त्यस्तै, धनुषा प्रहरीले ३५५, महोत्तरी प्रहरीले ३०३, सप्तरी प्रहरीले ३२६, सर्लाही प्रहरीले ३००, रौतहट प्रहरीले ३४६ र बारा प्रहरी ४४९ जना प्रतिवादीलाई पक्राउ गरिएको प्रदेश प्रहरीको तथ्यांकमा उल्लेख छ ।

मधेश प्रदेश प्रहरी कार्यालयका वरिष्ठ प्रहरी उपरीक्षक मनोज यादवले प्रहरी प्रधान कार्यालयको निर्देशनअनुसार मधेशमा अभियान सञ्चालन गरी फरार प्रतिवादी पक्राउ गरिएको जानकारी दिए । शान्ति सुरक्षा चुस्त बनाउन विभिन्न मुद्दामा लामो समयदेखि फरार प्रतिवादीलाई पक्राउ गर्ने अभियान चलाइएको उनले बताए ।

विभिन्न अपराधिक क्रियाकलापमा संलग्न भई दोषी ठहर भएर उम्किएकाहरूलाई कानुनी दायमा ल्याउनु प्रहरीको दायित्व रहेको यादवले बताए । ‘यसले प्रहरीप्रतिको सर्वसधारणको विश्वास झन् बढ्ने र सर्वसाधरणले कानुनी राज्यको अनुभूति गर्न पाउनेछन् । अपराधिक तत्त्वहरूलाई एक प्रकारको डर उत्पन्न हुनेछ,’ उनले भने ।