नेतृत्वदायी भूमिकामै रहँदा दुर्व्यवहार भोग्दै आएकी राधा

A+ A A-

सानै उमेरमा शेयर बजारकी पक्का खेलाडी बनेकी राधा पोखरेल यतिबेला लगानीकर्ताको हकहितका लागि आवाज उठाउन व्यस्त छिन् । बर्दिया जिल्लामा २०५० सालमा जन्मेकी राधा उमेरले ३० पनि पुगेकी छैनन् तर उनको परिपक्व लगानी र लगानीकर्ताको समस्यामा खरो उत्रने बानीले गर्दा यतिबेला उनी लगानीकर्ताहरूको नेतृको रूपमा चिनिन पुगेकी छिन् ।

धितोपत्र बजारमा महिलाको उपस्थिति न्यून रहेका बेला राधा भने कहिले महिलालाई वित्तीय साक्षर बनाउन तल्लीन देखिन्छिन् त कहिले लगानीकर्ताको हकहितका लागि आन्दोलन गर्नदेखि नियामक निकायसम्मै पुगेर दबाब दिने काम गर्दै आएकी छिन् । र, यी काममा सधैँ अग्रपङ्क्तिमै भेटिन्छिन् उनी ।

पुँजीबजार लगानीकर्ता संघकी अध्यक्षको रूपमा कार्यभार सम्हालिरहेकी राधा सरकारीमातहतका कम्पनी विशाल बजार कम्पनीकी सञ्चालक पनि हुन् । गएको फागुन ४ मा मन्त्रीस्तरीय बैठकले राधालाई विशाल बजार कम्पनीको सञ्चालक पदमा नियुक्त गरेको हो ।

नेतृत्व तहमा पुगेर खरो रूपमा उत्रिने राधासँग महिला भएकै कारण आजसम्म पनि आफूले सामाजिक सञ्जालदेखि आफ्नै सहकर्मीहरूबाट भएका दुर्व्यवहारका तिता अनुभवहरू छन् । उनी भन्छिन्, 'लगानीकर्ता साथीहरूबाटै पनि महिला भएकै कारण दुर्व्यवहारहरू हुँदै आएका छन् । भर्खरै मात्र पनि म दुर्व्यवहारको उजुरी लिएर प्रहरीकहाँ पुगेकी थिएँ ।'

धितोपत्र बजारमा आफ्नै अग्रजहरूबाट समेत दुर्व्यवहार खेप्दै आएकी उनले अध्यक्ष पद सम्हालिरहँदा पनि आफ्नै सहकर्मीबाट हेपाहा व्यवहार भोगेको बताउँछिन् । उनी भन्छिन्, ‘अध्यक्ष पदमा बसेर काम गरिरहँदा पनि मभन्दा जुनियर साथीहरूले धम्क्याउने, खसाल्ने गर्नुहुन्थ्यो । उहाँहरूले गर्दा नै म यो पदमा पुगेको होजस्तो व्यवहार देखाउँदा मलाई नमीठो लाग्छ ।’

हुन त शेयरबजारमा राधालाई लिई धारणा बनाउनेहरूको कमी छैन । उमेर सानो भएकै विषयलाई लिएर होस् वा महिला भएकै कारण, सँगै बसेर कफी नखाएको रिसमा नै किन नहोस्, उनलाई प्रत्यक्ष वा अप्रत्यक्ष रुपमा टिप्पणी गर्नेदेखि चरित्रहत्या गर्नेसम्मका गतिविधि भइरहेका छन् बेलाबेलामा । 'लगानीकर्ताहरूले सोधीखोजी गर्दा होस् या सहयोग माग्दा, खुसी भएर तयार हुन्छु तर उहाँहरूले गलत रूपमा अर्थ्याइदिनुहुन्छ । कफी खान इन्कार गर्दा पनि मविरुद्ध आफ्ना कुण्ठाहरू पोख्ने गर्नुहुन्छ,’ उनी गुनासो गर्छिन् ।

राधा आफू महिला भएकै कारण पद र पावर हुँदा पनि महिलाले सहज वातावरणमा काम गर्ने अवस्था अझै बनिनसकेको स्वीकार्छिन् । भन्छिन्, ‘मेरै तहका पुरुष साथीहरू पदमा बसेर सजिलै काम गरिरहेका हुन्छन्, हामी महिला भने पदीय चुनौतीसँगै विभिन्न खालका दुर्व्यवहारसँग पनि लडिरहनुपर्ने अवस्था छ ।’

प्रकाशित मिति: बुधबार, फागुन २४, २०७९ १२:५७