पशुपतिको जग्गामा मारवाडी समितिकाे मनपरी, सम्झाैताविपरीत गाईपालन र २० व्यापारिक सटर भाडामा

पशुपतिको जग्गामा मारवाडी समितिकाे मनपरी, सम्झाैताविपरीत गाईपालन र २० व्यापारिक सटर भाडामा

A+ A A-

पशुपति क्षेत्र विकास कोषसँग भएको सम्झौताविपरीत मारवाडी सेवा समितिले भौतिक संरचना बनाउने गरेको र बहाल करमा पनि समस्या सिर्जना गरेको आरोप लागेको छ ।

कोषसँग भएको सम्झौताविपरीत व्यापारिक प्रयोजनका लागि सटर बनाएको, भवनहरू निर्माण गरेको तथा बहाल कर सम्झौता संशोधनका लागि बैठकमै नआउने गरेको काेषकाे आरोप छ ।

५ जेठ १९९९ मा पशुपतिको अमालकोट कचहरीले पशुपतिमा छाडिएका दूध कटुवा नन्दी (साढे) हरूको संरक्षणका लागि र जुनेलो घाँस लगाउन मारवाडी समुदायका हरिनारायण भन्ने रामकुमार मारवाडीलाई १ रोपनी २ आना जग्गा दिएकाे थियाे । त्यतिबेलाकाे सहमतिअनुसार मारवाडी सेवा समितिले पछिल्लाेपटक २०६० सालमा अर्काे सम्झौताअनुसार वार्षिक ५१ हजार बहाल तिर्नेगरी ९ रोपनी ९ आना जग्गा भाडामा लिएकाे छ ।

सम्झौतापत्रमा समितिले कोषलाई वार्षिक ५१ हजार सहयोग रकम उपलब्ध गराउने र दुवै पक्षको सहमतिमा सो रकममा संशोधन गरिने सम्झौता भए तापनि संशोधनका लागि छलफलमा बोलाउँदा बेवास्ता गरिरहेको छ ।सम्झौताअनुसार २५ वटा कटुवा साढे पाल्ने भए पनि सम्झौताविपरीत काम भइरहेको पाइएको छ ।

त्यस्तै, नन्दी (साढे) मात्रै पाल्ने भनिएकोमा २ सयभन्दा धेरै गाई, साढे र बाच्छा छन् । साढे मात्रै पाल्ने भनिए पनि समितिले गाईको दूध बिक्री गरिरहेको छ । हाल उक्त ठाउँमा व्यापारिक प्रयोजनका लागि २० वटाभन्दा धेरै सटर छन्, जसमा एउटा सटरकै भाडा ३५ हजारदेखि ६३ हजारसम्म छ । ती सटरका पसल, होटललगायत सञ्चालनमा छन् ।

समितिले जग्गाधनी अमालकोट कचहरीको स्वीकृतिबिना संरचना निर्माण गरेको हो र त्यस्तै समितिले तलो थप्दासमेत स्वीकृति लिएको छैन । समितिले संरचना निर्माण गर्दा नक्सा पाससमेत गरेको छैन ।

मारवाडी सेवा समितिले कोषलाई नटेरी मनलाग्दी गरिरहेको काठमाडौं महानगरपालिकाका सम्पदा समितिका संयोजक तथा वडा नम्बर ८ का अध्यक्ष आशामान संगतले बताए । 'उनीहरूले गरेको काम आवरणमा सेवा जस्तो देखिन्छ तर संरचना बनाउँदा स्वीकृति लिएको छैन, तला थप्दा स्वीकृति लिएको छैन, सटर भाडामा लगाएर पैसा कमाइरहेको छ, नन्दी पाल्ने सम्झौतामा जर्सी गाई पालेर दूध बेचिरहेको छ,’ उनले भने ।

सम्झौताविपरीत काम गरेकाले वडाले सम्झौतामा के-के छ भनी प्रमाण मागेर महानगरमा पठाएको संगतले बताए । ‘हामीले २४ घण्टे अल्टिमेटन दिएर के-के गर्न पाउने र के-के गर्‍यो भन्ने कागजपत्र मागेका थियौँ । उनीहरूले वडामा पठाएको कागजपत्र हामीले महानगरमा पठाएका छौँ । त्यो अध्ययन गरेर थप कुरा अघि बढाउँछौं,’ उनले भने ।

मारवाडी सेवा समितिका महासचिव महावीर घिराइयाले भने सम्झाैताविपरीत काम भएकाे आराेप आधारहीन भएको बताउँछन् । ‘पहिलो कुरा त मोही नै समिती हो । दोस्रो हामीले दैनिक २९ लिटर दूध भगवान्‌लाई चढाउन पठाउँछौँ । हामीले नि:शुल्क मिर्गौला डायलाइसिस र वार्षिक २ सय जनालाई कृत्रिम खुट्टा लगाइदिने गरेका छाैं,’ उनले भने ।

त्यहाँबाट उठेको पैसा खर्चको छेउ पनि नपर्ने उनी तर्क गर्छन् । ‘एउटा गाईकै लागि महिनामा ३० हजार खर्च लाग्छ । ४ सयवटा गाईमध्ये ६० वटा मात्रै दुहुना छन् । हामीले ती गाईलाई अन्त कहाँ लगेर राख्ने र ?,’ उनले भने ।

प्रकाशित मिति: बुधबार, फागुन २४, २०७९ १४:५२