राष्ट्रपतिको चुनावपछि कांग्रेसले पेल्ने नेकपा एस र जसपाको डर, अहिल्यै भागवण्डा टुंग्याउन नेताहरूको दबाब

राष्ट्रपतिको चुनावपछि कांग्रेसले पेल्ने नेकपा एस र जसपाको डर, अहिल्यै भागवण्डा टुंग्याउन नेताहरूको दबाब

A+ A A-

आठदलीय गठबन्धनबाट बनेको सरकारले राष्ट्रपतिको चुनावपछि मात्र पूर्णता पाउनेछ । २५ वटा मन्त्रालयमध्ये १६ वटा मन्त्रालयको जिम्मेवारी प्रधानमन्त्री पुष्पकमल दाहाल 'प्रचण्ड'ले सम्हालिरहेका छन् । मन्त्रालय बाँटफाँटमा झमेला भैरहे पनि नेताहरूले राष्ट्रपति चुनावपछि मात्र सो विषयमा कुरा हुने बताइरहेका छन् ।

फागुन १३ गते राप्रपा र १६ गते एमालेले सरकार छाडेका थिए । १३ गते राष्ट्रपति चुनावको मनोनयनसँगै एमाले, माओवादीसहितको गठबन्धन भत्किएर पुरानो गठबन्धनमा जनमत, नागरिक उन्मुक्ति पार्टी थपिएर आठदलीय गठबन्धन बनेको थियो ।

सरकारमा प्रधानमन्त्रीसहित माओवादी केन्द्रका ५ र जनमत पार्टीका १ जना मन्त्री मात्रै छन् । प्रत्यक्ष जनतासँग जोडिएका अर्थ, गृह, परराष्ट्र, स्वास्थ्य, शिक्षालगायतका महत्त्वपूर्ण मन्त्रालयहरू नेतृत्वविहीन छन् । मन्त्रालय बाँटफाँटको विषय जटिल भए पनि औपचारिक रूपमा २५ गते राष्ट्रपति चुनावपछि मात्र सो विषयमा छलफल हुने नेताहरू बताउँछन् ।

मन्त्री सरकारमा पठाउन ठिक्क परेका एकीकृत समाजवादी र जसापभित्र २५ फागुनअगावै मन्त्रालयसमेत किटेर सत्ता सम्झौता गर्न दर्न दबाब परेको छ । चुनावपछि कांग्रेस र माओवादीले सिट संख्या देखाएर कम सिट दिने डर सांसदहरूमा देखिएको छ ।

‘हामीले एकीकृत समाजवादी र जसपाका अध्यक्षहरूलाई भेटेर राष्ट्रपतिको चुनावअगाडि नै मन्त्रालय किटेर लिखित सम्झौता गर्न भनेका छौँ,’ एकीकृत समाजवादीका एक सांसदले शिलापत्रसँग भने, ‘त्यसो नगर्दासम्म हामीलाई २५ गतेपछि कांग्रेसले ८९ सिट र माओवादीले ३२ सिट भनेर पेल्छन् । त्यसो नगरी हुँदै हुँदैन ।’

राष्ट्रपतिमा सुरक्षित भैसकेपछि यति सिटे उति सिटे भनेर हिसाब देखाउँदै भाग नदिने खेल हुने ती नेताले बताए । पार्टीबाट ४ मन्त्रालयमा दाबी रहेको एक सांसदले भने । तीमध्ये गृह र अर्थमा पार्टीको जोड हुने नेताहरू बताउँछन् ।

पार्टीले गरेको योगदानको मूल्याकंन गरेर मन्त्रालय दिनुपर्ने सांसद मेटमणि चौधरी बताउँछन् । ‘चुनावअगाडिको सरकार बनाउँदा होस् वा चुनावी गठबन्धन होस् । अहिलेको गठबन्धन बनाउन पनि हाम्रो पार्टीको योगदान कति छ ? त्यसको मूल्याकंन होस्,’ उनले शिलापत्रसँग भने ।

एकीकृत समाजवादीका उपाध्यक्ष राजेन्द्र पाण्डे विषयगत मन्त्रालय र संख्याका बारेमा राष्ट्रपतिको चुनावपछि छलफल हुने बताउँछन् । सांसद कृष्णकुमार श्रेष्ठ भने यो समयमा पार्टीमा विभिन्न खालको दबाब आउने बताउँछन् । ‘पार्टीको उपयुक्त मूल्याकंन होस् भनेर कार्यकर्ताको दबाब छ । विभिन्न दबाबमध्ये यो पनि आएको छ । यसलाई नेतृत्व गठबन्धनमा कसरी प्रस्तुत हुन्छ र अन्य दलले कसरी लिन्छन्,’ उनले शिलापत्रसँग भने ।

सम्झौता गर्न नेतृत्वलाई दबाब भए पनि उपराष्ट्रपतिको आस राखेकाले जसपाले भने सम्झौता गर्नुअघि उपराष्ट्रपति ग्यारेन्टी गर्न भनेको छ । ‘उपराष्ट्रपतिमा सत्ता साझेदारमध्ये अन्य दलबाट दाबी आएको छैन । हामी दाबेदार छौँ,’ लोसपा नेता राजेन्द्र श्रेष्ठले शिलापत्रसँग भने ।

राष्ट्रपतिको निर्वाचनपछि ३ चैतमा उपराष्ट्रपतिको निर्वाचन हुँदैछ । जसपाले उपराष्ट्रपतिको उम्मेदवार कसलाई बनाउने भनेर निर्णय गर्न बाँकी छ । पार्टीबाट उपराष्ट्रपतिमा रामसहायप्रसाद यादवको चर्चा छ । उनले पार्टीले उपराष्ट्रपतिको उम्मेदवार कसलाई बनाउने भनेर निर्णय नभएको बताए ।

‘गठबन्धनमा उपराष्ट्रपति जसपाले पाउने भन्ने सहमति भएको छ, तर पार्टीले कसलाई उम्मेदवार बनाउने भनेर निर्णय गरेको छैन,’ यादवले भने, ‘मेरो नाममा चर्चा भएको मात्रै हो, म उम्मेदवार भइसकेको होइन ।’

जसपाले ३ मन्त्रालय र एक राज्यमन्त्रीको दाबी गरेको छ । कुन मन्त्रालय भन्ने विषयमा छलफल नभएको सांसद प्रदीप यादवले बताए । ‘राष्ट्रपतिको चुनावपछि मन्त्रालयका बारेमा गठबन्धनमा कुरा हुन्छ,’ यादवले शिलापत्रसँग भने ।

यद्यपि जसपाका नेताहरू भने रामसहायको नाम फाइनजस्तै भएको बताउँछन् । ‘पार्टीले निर्णय गरेको छैन । मिलाएर बुझ्नुहोला,’ जसपाका एक नेताले शिलापत्रसँग भने ।

प्रकाशित मिति: सोमबार, फागुन २२, २०७९ २०:४७