उपसभामुख र राष्ट्रियसभा उपाध्यक्षको सैनिक अंगरक्षक खोसिएको हो ?

A+ A A-

गत शुक्रबार प्रतिनिधिसभाकी उपसभामुख इन्दिरा राना मगरले राज्यबाट पाउने सेवा सुविधा नपाएको गुनासो पोखिन् । ‘पहिला उपसभामुख हुँदाचाहिँ आर्मी दिन्थ्यो रे । उहाँहरूलाई मन्त्रीसरह सुविधा हुन्थ्यो रे,’ उनले भनेकी थिइन् ।

सरकारको वरीयताक्रममा प्रतिनिधिसभाको उपसभामुख र राष्ट्रियसभाको उपाध्यक्ष आठौँ नम्बरमा छन् । त्यसैगरी, आठौँ नम्बरमै संघका मन्त्री, मुख्यमन्त्रीलगायतका पनि पर्छन् । तर, एउटै नम्बरमा रहेका उपसभामुख र उपाध्यक्षको सैनिक बडिगार्ड हटाइएको छ भने मन्त्री र मुख्यमन्त्रीको कायमै छ ।

तत्कालीन प्रधानमन्त्री केपी ओलीले सुरक्षासम्बन्धी कार्यविधि परिमार्जन गर्दै उपसभामुख र उपाध्यक्षको सुरक्षामा सेना हटाएर सशस्त्रमा झारेको पाइएको छ । यसअघि उपसभामुख र उपाध्यक्षको अंगरक्षक एवं निवास सुरक्षामा सेना पनि खटिने गरेको थियो ।

संविधानसभा अध्यक्ष सुवास नेम्वाङले आफ्नो कार्यकालमा उपसभामुख पूर्णाकुमारी सुवेदीलाई सैनिक अंगरक्षक दिलाएका थिए । त्यसपछि उपसभामुख बनेकी शिवमाया तुम्बाहाम्फेलाई पनि अंगरक्षक सेना दिइएको थियो ।

‘त्यतिबेला उपसभामुख र उपाध्यक्षलाई सेनाको अंगरक्षक दिएको थियो । ऐनमा जे छ, त्यसमा जानुपर्छ,’ तुम्बाहाम्फेले भनिन् । उपसभामुखबाट तुम्बाहाम्फेले राजीनामा दिएपछि गृह मन्त्रालयले कार्यविधि परिवर्तन गरेर उपसभामुख र उपाध्यक्षको अंगरक्षक सशस्त्रमा झारेको हो ।

राष्ट्रियसभाकी उपाध्यक्ष उर्मिला अर्याल पनि आफूले सैनिक अंगरक्षक नपाएकी बताउँछिन् । ‘आर्मी दिनुपर्ने हो दिएको छैन । एउटा पीएसओ दिएको छ,’ उनले भनिन्, ‘सुरक्षाका लागि सशस्त्र दिने भनेको छ ।' गृह मन्त्रालयले विशिष्ट व्यक्तिको सुरक्षासम्बन्धी कार्यविधि २०७७ अनुसार कार्यान्वयन भइरहेको जनाएको छ । ‘कार्यविधिअनुसार जसले जे सुविधा पाउनुपर्ने हो, त्यो पाउनुभएको छ,’ मन्त्रालयका प्रवक्ता जितेन्द्र बस्नेतले भने ।

आवास पनि छैन

उपसभामुख र उपाध्यक्षले सरकारी निवास पनि नपाएको गुनासो गरेका छन् । मन्त्रीका लागि भन्दै शहरी विकास मन्त्रालयले क्वार्टर खाली राखेर आफूहरूलाई नदिएको उनीहरूको गुनासो छ । ‘क्वार्टर खाली छ तर दिइएको छैन । आवास दिने सरकारी नीति भएपछि दिनुपर्ने हो,’ राष्ट्रियसभाकी उपाध्यक्ष अर्यालले भनिन्, ‘आवासबापत ३४ हजार आउँछ । ६५ हजार रुपैयाँमा घर भाडामा लिएकी छु ।’

उपसभामुख राना पनि घर भाडामा लिएर बसिरहेकी छिन् । ‘उपसभामुखलाई घर दिने भनिएको छ । दिइएको छैन । ३६ हजार रुपैयाँ निवास भाडा दिइएको छ । ४४ हजार तिरेर बस्नुपरेको छ,’ उनले भनिन् ।

आवास उपलब्ध गराउने शहरी विकास मन्त्रालयले भने नयाँ भवन बनिरहेकाले हाललाई समस्या देखिएको जनाएको छ । ‘नयाँ भवन बन्दै छ । निर्माण सम्पन्न भएपछि छिट्टै समस्या हल हुन्छ,’ मन्त्रालयका प्रवक्ता प्रदीप परियारले भने । प्रदेशका मुख्यमन्त्री, मन्त्री, राष्ट्रियसभा अध्यक्ष, उपसभामुख, उपाध्यक्षलगायतका लागि ललितपुरस्थित भैँसेपाटीमा भवन बनाउने काम भइरहेको छ ।

यसअघि उपसभामुख र राष्ट्रियसभा उपाध्यक्षको सरकारी निवास मन्त्री क्वार्टरसँगै पुल्चोकमै थियो । तत्कालीन उपसभामुख तुम्बाहाम्फे र उपाध्यक्ष शशिकला दाहाललाई पुल्चोकमै निवास दिइएको थियो । तुम्बाहाम्फेपछि उपसभामुख भएकी पुष्पा भुसाललले क्वार्टर नपाएपछि आफ्नै निवासमा बसेकी थिइन् ।

सम्बन्धित समाचार