सुदूरपश्चिम प्रदेशका मुख्यमन्त्री शाहले पाए विश्वासको मत

A+ A A-

सुदूरपश्चिम प्रदेशका मुख्यमन्त्री कमलबहादुर शाहले विश्वासको मत पाएका छन् ।

आइतबार प्रदेशसभा बैठकमा विश्वासको मत मागेका मुख्यमन्त्री शाहलाई कांग्रेस, माओवादी केन्द्र, नेकपा एकीकृत समाजवादी र नागरिक उन्मुक्ति पार्टीले विश्वासको मत दिएका हुन् ।

प्रदेशसभा बैठकमा उपस्थित ५२ सांसदमध्ये ४१ जना सांसदले मुख्यमन्त्री शाहलाई विश्वासको मत दिएका छन् । विश्वासको मत दिइयोस् भन्ने प्रस्तावको विपक्षमा जम्मा ११ मत परेको छ । संविधानको धारा १६८ को उपधारा ३ अनुसार मुख्यमन्त्री शाहले प्रदेशसभाबाट विश्वासको मत लिएका हुन् ।

५३ सदस्यीय सुदूरपश्चिम प्रदेशसभामा मुख्यमन्त्रीले विश्वासकाे मत पाउन २७ सांसदकाे समर्थन आवश्यक हुन्थ्यो । कांग्रेसका १९, माओवादी केन्द्रका १० (सभामुखबाहेक), नागरिक उन्मुक्तिका ७, नेकपा एकीकृत समाजवादीका ४ र स्वतन्त्र सांसद डा. तारा जोशीले मुख्यमन्त्री शाहलाई विश्वासको मत दिएका हुन् ।

एमालेका १० र राप्रपाका एक जना सांसदले भने विपक्षीमा मतदान गरे । यसअघि नागरिक उन्मुक्ति पार्टीले एमाले नेतृत्वको सरकारलाई विश्वासको मत नदिने निर्णय गर्दै प्रदेशसभा बैठकमा उपस्थित नभएपछि एक महिनामै सरकार ढलेको थियो ।

माओवादी केन्द्र, नाउपा र राप्रपाको समर्थनमा एमालेबाट मुख्यमन्त्री राजेन्द्र रावलले संसदमा विश्वासको मतको प्रस्तावमाथि छलफल होस् भनेर राखेको प्रस्ताव नै बहुमतले अस्वीकृत भएको थियो । त्यसपछि प्रदेशसभाको सबैभन्दा ठूलो दलको नेताको हैसियतमा कांग्रेस संसदीय दलका नेता शाह मुख्यमन्त्रीमा नियुक्त भएका थिए ।

प्रकाशित मिति: आइतबार, फागुन २१, २०७९ १५:४९