जयनगर-कुर्था रेल सेवाः न रेल सुरक्षित न यात्रु

A+ A A-

नेपालको एक मात्र रेल सेवा जयनगर–कुर्था नियमित सञ्चालनमा आएको झण्डै एक वर्ष पूरा हुन लाग्यो । तर, बजेट अभावमा दुईवटै रेलको अहिलेसम्म नेपाल रेल्वेे कम्पनीले बीमा गराउन सकेको छैन ।

अघिल्लो वर्षको चैत १२ गतेदेखि रेल नियमित रूपमा सञ्चालनमा छ । भारतीय बजार जयनगरदेखि कुर्थासम्म ३५ किलोमिटर दूरीमा दैनिक सञ्चालन हुँदै आएका दुईवटा रेलको बजेट अभावमा बीमा गर्न नसकिएको नेपाल रेल्वे कम्पनीका इन्जिनियर रविन्द्र साहले बताए ।

दुवै रेलको बीमाका लागि चालु आर्थिक वर्षमा १५ लाख र गत आर्थिक वर्षमा ३० लाख रकम विनियोजन गरिएको थियो । तर, एउटै रेलको बीमा गर्न ९० लाख रुपैयाँ चाहिन्छ । यो हिसाबले दुवै रेलको बीमका लागि १ करोड ८० लाख रुपैयाँ खर्च हुन्छ ।

‘बीमाका लागि गत आर्थिक वर्षमा ३० लाख र यो वर्ष १५ लाख रुपैयाँ विनियोजन गरिएको थियो, ’ इन्जिनियर साहले भने, ‘रकम अपुग भएपछि बीमा गर्न सकिएन । हामीले थप बजेट माग गरेका छौँ । थप बजेटको व्यवस्था भए यही आर्थिक वर्षमा दुवै रेलको बीमा गर्छौं ।’

नेपाल रेल्वे कम्पनीका महाप्रबन्धक निरञ्जन झाले भने बीमा कम्पनीहरू रेलको बीमा गर्न तयार नभएको बताउँछन् । ‘रेलको नभए पनि यात्रुहरूको पनि बीमा गर्न सकिन्थ्यो । तर, त्यसको प्रक्रिया पनि जटिल छ । सँगसँगै बीमाका लागि बजेट पनि अभाव छ,’ झाले भने ।

जयनगर–कुर्था रेल नेपाल रेल्वे कम्पनीले नियमित रुपमा चलाए पनि दुवै रेल अहिलेसम्म नेपाल रेल्वे विभागकै नाममा छन् । नेपाल रेल्वे विभागले अझै पनि दुवै रेलको स्वामित्व नेपाल रेल्वे कम्पनीलाई हस्तातरण गर्न नसकेको झाले बताए ।

गत पुसमा वैदेही स्टेशनमा नेपाली रेलमै किचिएर यात्रुको मृत्यु भएको थियो । टिकट नै नलिई रेलमा चढ्ने क्रममा रेलबाट लड्दा किचिएर धनुषा नगराईन नगरपालिकाका ३५ वर्षीय पूर्ण सदाको मुत्यु भएको थियो । उक्त घटनाको छानबिन गर्न र मृतकका परिवारलाई क्षतिपूर्ति उपलब्ध गराउन नेपाल रेल्वे कम्पनीले छानबिन समिति गठन गरेको थियो ।

तर, छानबिन समितिले टिकट नलिएको भन्दै मृतक परिवारलाई क्षतिपूर्ति दिन सिफारिस गरेन । दैनिक हजारभन्दा बढी यात्रु रेलमार्फत ओहोरदोहर गरे पनि रेलको बीमा नहुँदा यात्रुहरू पनि असुरक्षित छन् ।

प्रकाशित मिति: शनिबार, फागुन २०, २०७९ २१:१८