सुदूरपश्चिमका मुख्यमन्त्री शाहलाई माओवादी केन्द्रले यथास्थितिमा विश्वासको मत नदिने

सुदूरपश्चिमका मुख्यमन्त्री शाहलाई माओवादी केन्द्रले यथास्थितिमा विश्वासको मत नदिने

मुख्यमन्त्री कमलबहादुर शाह ।

A+ A A-

सुदूरपश्चिम प्रदेशका मुख्यमन्त्री कमलबहादुर शाहलाई नेकपा माओवादी केन्द्रले यथास्थितिमा विश्वासको मत नदिने भएको छ ।

मुख्यमन्त्री शाहलाई भेटेर फर्किएपछि यथास्थितिमा सरकारलाई विश्वासको मत नदिने निर्णय गरेको माओवादी केन्द्रका संसदीय दलका नेता खगराज भट्टले बताएका छन् ।

‘हिजोको सहमति अनुसार माओवादी केन्द्रले मुख्यमन्त्री पाउनुपर्छ,’ भट्टले भने, ‘यसमै पूरक निर्णयका रूपमा यथास्थितिमा विश्वासको मत नदिने निर्णय गरेका छौँ ।’ यसअघि कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डले सुदूरपश्चिम प्रदेशको मुख्यमन्त्री माओवादीलाई दिने बताएको उनको भनाइ छ ।

नेता भट्टले भने अहिले माओवादीलाई नेतृत्व दिन मुख्यमन्त्री शाहलाई पनि आग्रह गरेका थिए । यसअघि विश्वासको मत पाउन नसकेर एमालेका राजेन्द्रसिंह रावलले मुख्यमन्त्री पदबाट एक महिनामै राजीनामा दिएका थिए ।

संविधानको धारा १६८ को उपधार २ अनुसार बनेको सरकार माघ २६ मा ढलेपछि सोही दिन उपधारा ३ अनुसार सबैभन्दा ठूलो दलको हैसियतमा कांग्रेस संसदीय दलका नेता शाह मुख्यमन्त्रीमा नियुक्त भएका थिए ।

उनले पनि ३० दिनभित्र विश्वासको मत लिनु पर्ने हुन्छ । सोही अनुसार शाहले भोलि अर्थात् फागुन २१ गते विश्वासको मत लिने तयारी गरेका छन् । शाहले प्रदेशसभामा आइतबार विश्वासको मतसम्बन्धी प्रस्ताव पेस गर्ने तयारी गरेका छन् । सो प्रयोजनका लागि आइतबार दिउँसो १ बजे बस्ने गरी प्रदेशसभा बैठक बोलाइएको छ ।

प्रदेशसभा सचिव देवबहादुर बोगटीका अनुसार मुख्यमन्त्री शाहले विश्वासको मत लिने व्यवस्था मिलाइदिन सभामुखलाई पत्र पठाएअनुसार बैठक आह्वान गरिएको हो । शाह मुख्यमन्त्री बनेपछि केन्द्रमा राजनीतिक समीकरण फेरिएसँगै प्रदेशसभामा सोही अनुसारको राजनीतिक समीकरण बन्ने आकलन गरिएको थियो ।

तर, माओवादीको पत्रले थप अन्योल सिर्जना गरेको छ । प्रदेशका मुख्यमन्त्री कमल शाहलाई भेटेर फर्किएपछि भट्टले आफ्नो पार्टीले गरेको निर्णयबारे जानकारी गराएका थिए ।

नागरिक उन्मुक्तिले के गर्छ ?

नागरिक उन्मुक्ति पार्टीले लिखित सहमतिबिना सुदूरपश्चिम प्रदेशका मुख्यमन्त्रीलाई विश्वासको मत नदिने बताएको छ ।

अध्यक्ष रन्जिता श्रेष्ठले पनि मुख्यमन्त्री शाहलाई विश्वासको मत दिन नसकिने बताइन् । दलीय सहमतिको लिखित हस्ताक्षरबिना विश्वासको मत दिन नसकिने उनले बताइन् । आइतबार सुदूरपश्चिम सरकारले लिन लागेको विश्वासको मततिर संकेत गर्दै दलीय सहमतिको लिखित हस्ताक्षरविना विश्वासको मत दिन नसकिने प्रष्ट पारेकी हुन् ।

सामाजिक सञ्जालमा अध्यक्ष श्रेष्ठले लेखेकी छिन्, ‘दलीय सहमतिको लिखित हस्ताक्षरबिना विश्वासको मत दिन सकिँदैन ।’ उन्मुक्ति पार्टीले लिखित सहमतिबिना सुदूरपश्चिम प्रदेशका मुख्यमन्त्रीलाई विश्वासको मत नदिने बताएपछि सुदूरपश्चिम सरकार फेरि संकटमा पर्ने संकेत देखिएको छ । यसअघि नागरिक उन्मुक्तिले विश्वासको मत नदिँदा एमाले नेतृत्वको सरकार एक महिनामै ढलेको थियो ।

प्रकाशित मिति: शनिबार, फागुन २०, २०७९ १९:४१