नबिलले दिन सक्छ ३५ प्रतिशत लाभांश, अरु बैंकले कति देलान् ?

A+ A A-

वाणिज्य बैंकहरुले गत आर्थिक वर्षमा गरेको नाफाको अपरिष्कृत वित्तीय विवरण सार्वजनिक भएको छ । बैंकहरुको अन्तिम लेखापरीक्षण प्रतिवेदन नआएकोले यो बैंकको नाफा यति नै हो भनेर किटान गर्न भने अहिल्यै सकिदैन ।

यो सामाग्री बैंकहरुको गत आर्थिक वर्षको वितरणयोग्य नाफाको आधारमा तयार पारिएको हो । तर, अन्तिम लेखापरीक्षण र अन्य रकम समेतले वास्तिवक लाभांश क्षमता फरक पर्न सक्छ । त्यसैले यसैको आधारमा यति नै लाभांश आउछ भन्नेर यकिन गर्न सकिदैन । केवल पूर्वानुमान मात्र हो ।

वित्तीय विवरण अनुसार गत वर्षको नाफाबाट सबैभन्दा बढी राष्ट्रिय वाणिज्य बैंकले लाभांश दिन सक्छ । तर, सर्वसाधारणको सेयर नभएकोले रावा बैंकको लाभांश पाउने विशेष गरेर सरकारले मात्रै हो ।

रावा बैंकले गत वर्ष ३ अर्ब ६२ करोड रुपैयाँ वितरणयोग्य नाफा गरेको छ । रावा बैंकको चुक्ता पुँजी ९ अर्ब रुपैयाँ छ । रावा बैंकले गत वार्षको नाफाबाट सेयरधनीलाई ४०.१७ प्रतिशत लाभांश दिन सक्छ । यो लाभांश दर गत वर्षको नाफाबाट वाणिज्य बैंकहरुले बाढ्ने लाभांशमा सबैभन्दा धेरै हो ।

सर्वसाधारणको सेयर भएको बैंकहरुमा नविल बैंकले सबैभन्दा बढी लाभांश दिन सक्ने देखिएको छ । नविलले गत वर्ष ३ अर्ब १८ करोड रुपैयाँ खुद नाफा गरेको थियो । उसको चुक्ता पुँजी ९ अर्ब १ करोड रुपैयाँ छ । नविलले गत वर्षको नाफाबाट सेयरधनीलाई ३५.३४ प्रतिशत अर्थात एक कित्ता सेयर हुनेले ३५.३४ प्रतिशत लाभांश पाउन सक्छन् ।

नेपाल बैंकको लाभांश क्षमता पनि ३५.१८ प्रतिशत छ । नेपाल बैंकले गत वर्ष ३ अर्ब ४५ करोड रुपैयाँ वितरणयोग्य नाफा गरेको थियो ।

कृषि विकास बैंकको लाभांश क्षमता पनि ३० प्रतिशतभन्दा माथि नै छ । कृषि विकास बैंकले गत वर्षको नाफाबाट सेयरधनीलाई ३३.११ प्रतिशत लाभांश दिन सक्छ ।

यस्तै एभरेष्टले २७.१९ प्रतिशत, एनआइसी एसिया बैंकले २४.३७ प्रतिशत, ग्लोबल आइएमइले २३.५७ प्रतिशत, हिमालयन बैंकले २३.७४ प्रतिशत, स्ट्याण्डर्ड चार्टर्ड बैंक नेपालले २२.५० प्रतिशत र सानिमा बैंकले २०.३२ प्रतिशत लाभांश दिन सक्ने देखिन्छ ।

गत वर्षको नाफाबाट बैंकहरुले औसतमा १९.१ प्रतिशत लाभांश दिन सक्ने अवस्था देखिन्छ । तर, सेन्चुरी र सिभिल बैंकले भने एक अंक (सिंगल डिजिट) मा मात्रै लाभांश दिन सक्ने उनीहरुले प्रकाशित गरेको वित्तीय विवरणले देखाएको छ ।

सिभिलले ६.९६ प्रतिशत र सेन्चुरीले ६.३६ प्रतिशत लाभांश दिन सक्ने गत वर्षको वितरणयोग्य नाफाले देखाएको हो ।

प्रकाशित मिति: आइतबार, भदौ ८, २०७६ २३:१४