देखिने मतभारमा नेम्वाङभन्दा अगाडि रहेका पौडेलको भोट तान्ने रणनीति- एसएमएसदेखि चिठीसम्म

प्रतिनिधिसभा र राष्ट्रियसभाका सांसदहरूलाई अभिमुखीकरण दिन आयोजना गरेको कार्यक्रममा कांग्रेस सभापति शेरबहादुर देउवाले करिब ३ मिनेट सम्बोधन गरे । प्राय:जसो हप्काउने र छोटो बोल्ने देउवा प्रशन्न मुद्रामा प्रस्तुत भए ।

प्रशिक्षणमा बोल्दै देउवाले पौडेल आफ्ना पुराना साथी भए पनि केही दिएन भन्ने गुनासो सुनिने गरेको बताए । ‘रामचन्द्रलाई केही दिएन, केही दिएन भन्ने गुनासो सुनिन्थ्यो,’ देउवाले भने, ‘अब उहाँलाई हामीले राष्ट्रपति बनाउँदै छौँ ।’

राष्ट्रपतिका उम्मेदवार रामचन्द्र पौडेलले संविधानको बचाउ र रक्षामा लागिपर्ने भन्दै सांसदहरूलाई आश्वस्त पार्न खोजे । देशमा अन्योल सिर्जना गर्ने प्रयास भैरहेको र त्यसलाई चिर्न सांसहरू विज्ञ भएको पौडेलले बताए ।

‘लोकतन्त्रमा मूल्य र मान्यतामा आधारित समाजवाद भनेर संविधानको परिभाषित गरिएको छ, त्यसका आधारमा निमुखाले न्याय पाउनुपर्छ, विपन्नले न्याय पाउनुपर्छ, समाजवादको सार यही नै हो,’ पौडेलले कार्यक्रममा भने, ‘वैचारिक रूपमा राष्ट्रिय एकता कायम गर्न यो सूत्रले काम गर्छ भन्ने मलाई लाग्छ ।’

संविधानको पालक र रक्षकको रूपमा राष्ट्रपति रहेको संविधानले व्याख्या गरेको उनले बताए । आफू कसरी राष्ट्रपतिका लागि योग्य रहेको समेत उनले बताए । ‘६० वर्ष यसका लागि समर्पण गरेको छु,’ पौडेलले भने, ‘संविधान निर्माणको क्रममा ६ वर्ष अथक प्रयास गरेको छु । माधव प्रचण्डजीहरूसँग अथक प्रयास गरेको छु ।’

संविधानको प्रत्येक शब्द त्यसको अर्थ र भावसँग परिचित रहेको उनले बताए । संविधानलाई जिम्मेवारी पाएमा प्रश्न उठ्न नदिने दाबी गरे । दक्षिण एसियामा र अन्य मुलुकमा जनतालाई अधिकार दिने संविधान सायदै बनेको उनले बताए ।

उम्मेदवार पौडेलले राष्ट्रपतिमा निर्वाचित भएमा भूमिकामा प्रश्न उठ्ने काम नगर्ने बताए । ‘संविधानको हैसियतले काम गर्न कुनै कसर बाँकी राख्ने छैन,’ उनले भने, ‘प्रधानमन्त्रीको सुझावअनुसार नै राष्ट्रपतिको हैसियतले काम गर्ने हो ।’

राष्ट्रवादलाई लोकतन्त्रविरुद्ध दुरुपयोग हुनु दुर्भाग्य रहेको पौडेलले बताए । उनले राष्ट्रपतिमा आफूलाई सर्वसम्मत बनाउन एमाले अध्यक्ष केपी शर्मा ओलीलाई आग्रह गरेका प्रसंग सुनाए । ‘राष्ट्रपति पदलाई सबैको साझा बनाउँदा ठीक होला नि म पनि तपाईंसँग जेलमा बसेको चिन्नुभएको छ, मेरो आनीबानी सबै थाहा छ भनेँ, उहाँले चुनावलगत्तै छलफल गर्ने भनेको त्यस्तै भयो भन्नुभयो,’ पौडेलले भने ।

उनले औपचारिक संवाद गरेका छैनन् । पौडेल अहिले बोहोराटारस्थित निवासमै नेता कार्यकर्तासँग भेटघाटमा व्यस्त छन् । पछिल्लो समय पार्टीका नेता कार्यकर्ताहरू उनलाई भेट्न निवासमै पुग्ने गरेका छन् ।

पौडेलले टेलिफोनमार्फत भने नेताहरूसँग सम्पर्क गरिरहेका छन् । पौडेलले राष्ट्रपतिको मनोनयनअघि भने राष्ट्रिय स्वतन्त्र पार्टीका सभापति रवि लामिछानेलाई उनकै निवासमा पुगेर सघाउन आग्रह गरेका थिए । त्यसबाहेक पौडेलले ठूला नेतालाई भेटेका छैनन् । सार्वजनिक कार्यक्रममा बिहीबार देखिए ।

यसबीचमा उनले मतदातालाई एसएमएस गरेका छन् ।

ramchandras sms1677761378.jpg

यस्तो छ पौडेलले पठाएको एसएमएसः

मा..... ज्यू,

नेपालको संविधानको पालना र संरक्षण गर्दै सङ्घीय लोकतान्त्रिक गणतन्त्र संस्थागत गर्न, राष्ट्रिय स्वाधीनताको रक्षार्थ, दिगो शान्ति, स्थिरता र सुशासनसहित नेपाली जनताको समुन्नतिको चाहना र भावनामा सहयोगी भै अभिभावककीय भूमिका निर्वाह गर्ने अठोटका साथ राष्ट्रपतिको गरिमामय पदमा उम्मेदवारी प्रस्तुत गरेको छु ।

म रामचन्द्र पौडेललाई आफ्नो अमूल्य मत दिई विजयी गराउन हुन हार्दिक अनुरोध गर्दछु ।

जय नेपाल !

बिहीबारको अभिमुखीकरण कार्यक्रममा उनले सांसदहरूलाई भोटको अपिल गर्दे चिट्ठी बाँडे । पौडेलले आफूलाई समर्थन गरेका ८ दलबाहेक एमाले, रास्वपा, राप्रपा र नेपाल मजदुर किसान पार्टीका सांसदहरूलाई पनि पत्र पठाएका छन् ।

संविधानको अक्षर र मर्मको परिपालना गर्दै परिवर्तनको जगेर्ना गर्ने अठोटका साथ राष्ट्रपतिका लागि उम्मेदवार बनेको भन्दै पौडेलले आफूले अमूल्य मतको आशा गरेको बताएका छन् । ‘नेपाली जनतामा खुसीयाली ल्याउने विकास हासिल गर्ने मुख्य आधार भनेकै स्थायित्व र सुशासन हो भन्ने मेरो अटल विश्वास छ,’ उनले भनेका छन् ।

पौडेले पठाएको चिट्ठी

ब्यालेट फिक्स्ड !

२६ हजार ३१५ मतभार हुँदा जितिनेमा प्रस्तावक र समर्थक बसेका राजनीतिक दलको मतभार हेर्दा ३२ हजार १२३ मतभार पौडेलको पक्षमा देखिन्छ ।

कांग्रेससँग १६ हजार १ सय ४२, माओवादी केन्द्रसँग ७ हजार ७ सय ४५ मतभार छ । यसैगरी, नेकपा एकीकृत समाजवादीसँग २ हजार ५ सय ७४, जनता समाजवादीसँग २ हजार १ सय ४५, जनमत पार्टीसँग १ हजार २ सय ४२, लोकतान्त्रिक समाजवादी पार्टीसँग ९ सय ७१ मत छ । यस्तै, नागरिक उन्मुक्ति पार्टीसँग ८ सय ९२ र जनमोर्चा २ सय ६ मतभार छ । यी सबै पार्टीले मत दिएको अवस्थामा पौडेलको जित पक्का छ ।

एमाले उम्मेदवार सुवास नेम्वाङको ब्यालेटमा भने जितका लागि नपुग्ने देखिन्छ । एमालेसँग १५ हजार ३ सय १२ मतभार छ भने राप्रपासँग २ हजार ४ सय ५० र राष्ट्रिय स्वतन्त्र पार्टीको १ हजार ५ सय १ मतभार छ । कतै पनि नखुलेको नेपाल मजदुर किसान पार्टीको २ सय २३ र स्वतन्त्र सांसदहरूको १ सय ९४ मतभार छ । यी सबैको जोड्दा १९ हजार ६ सय ८० मतभार हुन्छ, जुन जितका लागि पर्याप्त होइन ।

बिहीबारको अभिमुखीकरण कार्यक्रममा प्रधानमन्त्री पुष्पकमल दाहाल 'प्रचण्ड'ले राष्ट्रपतिमा रामचन्द्र पौडेललाई ८ नभएर १० दलको समर्थन रहेको बताए । ‘रामचन्द्रजीलाई आठ दलको मात्र होइन, १० दलको समर्थन छ । गठबन्धनमा रहेका दलका साथै आमआदमी र नेपाल समाजवादी पार्टीको पनि समर्थन छ । स्वतन्त्र सांसदहरूको पनि समर्थन छ । उहाँले निर्वाचन जितिसक्नुभएको छ । यो लोकतन्त्र र संविधानको हितमा छ,’ प्रधानमन्त्री प्रचण्डले भने ।

प्रकाशित मिति: बिहीबार, फागुन १८, २०७९ २१:२३