आइडिया स्टुडियो : भोगटेका बोक्राको क्यान्डीदेखि ह्याचरी मेसिनसम्म

A+ A A-

मुलुक चरम व्यापारघाटामा छ । यस्तो अवस्थामा सरकारको आयात घटाउने नीति उल्लेख्य प्रभावकारी हुन सकेको छैन । यसको मुख्य कारण हो, हामीले स्वदेशी उत्पादन प्रवर्द्धन गर्न नसक्नु । एकातर्फ व्यापारघाटा बढ्दो क्रममा छ, अर्कोतर्फ किसानले आफ्नो उत्पादनले मूल्य नपाउँदा सडकमा फाल्नुपर्ने अवस्था छ ।

यस्तै, समस्यालाई मध्यनजर गर्दै सन् २०१४ देखि सुरु भएको थियो आइडिया स्टुडियो । ‘सोचदेखि उद्योगसम्म’ स्लोगन रहेको आइडिया स्टुडियोको हाल छैटौँ सिजन चलिरहेको छ । यो सिजनमा पनि आइडिया स्छटुडियोमा विभिन्न आइडियाहरू आएका छन् ।

टोम्याटो प्युरी

विशेषत: होटल, रेस्टुरेन्ट तथा भोजमा प्रयोग हुने टमाटर प्युरी नेपालमा त्यति उत्पादन हुँदैन । आनन्दकुमार श्रेष्ठ र सुलोचना श्रेष्ठले यही टोम्याटो प्युरीमा व्यापार र पैसा देखे । अनि उनीहरू यही सोच बोकेर आइडियो स्टुडियो पुगे । हाल उनीहरूले उत्पादन पनि सुरु गरिसकेका छन् । उनीहरूले छोटो समयमा २ हजार बोतल बजारमा पठाइसकेका छन् ।

टमाटर प्युरी नेपालमै उत्पादन गर्न सके सिजनका किसानको टमाटर किनेर प्युरी बनाई एक वर्षसम्म बेच्न सकिने श्रेष्ठ बताउँछन् ।

‘यसले गर्दा किसानले आफ्नो उत्पादन फाल्नुपर्दैन र होटल रेस्टुरेन्टहरूले पनि सस्तोमा राम्रो गुणस्तरको प्युरी किन्न पाउँछन्,’ उनले भने ।

ह्याचिङ मेसिन

नेपाल कखुरा र अण्डामा आत्मनिर्भर मानिन्छ । तर, यो उत्पादनका लागि चाहिने मेसिन भने महँगो शुल्कमा विदेशबाट आयात गर्नुपर्ने अवस्था छ । यही समस्याको समाधान र्दै ह्याचिङ मेसिन उत्पादन गर्न सके व्यवसाय राम्ररी गर्न सकिने मनन गरे र दोस्रो लकडाउनमा अशोककुमार चौधरी र सुस्मा रानाले व्यवसाय गर्ने सोच बनाए ।

धेरै रिसर्च गरे र अविराम एग्रो टेक नामक कम्पनी नै खोले । यस कम्पनीले विभिन्न प्रकारका ह्याचिङ मेसिन बनाउँछ । उनीहरूको मेसिनको मूल्य ४ हजारबाट सुरु हुन्छ । उनीहरूले ग्राहकको अर्डरअनुसार मेसिन बनाइदिन्छन् ।

यो मेसिनले चल्ला कोरल्ने मात्र नभई सुकुटी बनाउने, दही बनाउनेलगायत काम पनि गर्न सक्छ ।

उचित जैविक प्रालि

२५ लाख रुपैयाँको लगानीमा २०६९ सालमा सुरु भएको उचित जैविक प्रालिले जैविक मल, उचित ग्रिन पावर र पशुपालनका लागि जैविक पौष्टिक आहार बनाउँछ । यो कम्पनीमा हाल ५ करोड लगानी भइसकेको र वार्षिक १ करोडको व्यापार भइरहेको कम्पनीकी सञ्चालक उचिता महर्जनले जानकारी दिइन् ।

झ्यम्भल कृषि फार्म लघु उद्यम

कमला लामाले सन् २००६ देखि काभ्रेको बनेपामा सुरु गरेको झ्यम्भल कृषि फार्म लघु उद्यमले क्यान्डी, जाम, हर्वल चिया, ड्राई तरकारी, अचारलगायतका खाद्य पदार्थ उत्पादन गरिरहेको छ ।

यस कम्पनीले भोगटेको फालिने ब्रोक्रालाई सदुपयोग गरेर क्यान्डी बनाउँछ । झ्यम्भलले हाल १२/१५ वटा खाद्यवस्तु उत्पादन गरिरहेको छ । त्यसैगरी, कम्पनीमा सिजनमा २० जना र अफसिजनमा कम्तीमा १० जनाले रोजगारी पाइरहेका छन् ।