जाँदाजाँदै बन्दीपुर पुग्यो, रुँदारुँदै कलिलो जिउ सुक्यो : ६७ वर्षीया गायिका युट्युब ट्रेन्डिङमा

जाँदाजाँदै बन्दीपुर पुग्यो, रुँदारुँदै कलिलो जिउ सुक्यो : ६७ वर्षीया गायिका युट्युब ट्रेन्डिङमा

A+ A A-

'जाँदाजाँदै बन्दीपुर पुग्यो
रुँदारुँदै कलिलो जिउ सुक्यो...।'

टिकटकदेखि फेसबुक, इन्स्टाग्राम, रिल्ससम्म माथिको अन्तरा खुबै चर्चित छ । आइरहेका गीतहरूमा भन्दा फरक भाका, स्वर र शैली भएकाले ‘लैलै बरै’ बोलको गीतले नयाँ/पुराना दुवै पुस्ताको ध्यान खिचेको छ ।

यतिसम्म कि विदेशी टिकटकरले समेत यो गीतमा भिडियो बनाइरहेका छन् । दक्षिण कोरियाली टिकटकर पार्क जिमिन (टिकटकमा d0d_x ) का १० मिलियन फलाेअर्स छन् । उनले बेलाबेलामा चर्चित नेपाली गीतहरूमा पनि टिकटक बनाउँछिन् ।

@d0d_x ??#nepalitiktok #?? #kejimin #okejimin #kefreesun #케지민 #viral #fyp #lucu #soonent #korean #케프리썬 ♬ original sound - ??? ??✅

६७ वर्षीया नन्दा पन्तले गाएको यो गीत अहिले युट्युबमा पनि ट्रेन्डिङ ५ मा छ । तीन हप्ताभित्रै १२ लाखभन्दा बढी पल्ट हेरिसकिएको गीतको भिडियो गायक भूपू पाण्डेको युट्युब च्यानलमा छ ।

ठेट लोकभाकामा रहेको गीतको शब्द र गायन शैलीलाई धेरैले रुचाएका छन् । अचेल युट्युबमा मौलिक खालका गीतसंगीतले राम्रै प्रोत्साहन पाइरहेका छन् । नेपाली गजल ‘के लत बस्यो’ को चर्चा सेलाउँदा नसेलाउँदै नन्दाले नेपाली दर्शकलाई आफूतिर तानेकी छन् । यस्ता सिर्जनाको चर्चा हुनु, तारिफ पाउनु नेपाली मौलिक कला, संस्कृतिकै लागि सुखद पक्ष भएको संगीतकर्मीहरू बताउँछन् ।

६७ वर्षको उमेरमा नन्दाको जोस गज्जबको लाग्छ । भिडियोमा उनी नाच्दै गाइरहेकी देखिन्छिन् । गीतको शब्द नन्दाले नै लेखेकी हुन् भने लय पनि उनैले हालेकी हुन् । एरेन्जर भूपू पाण्डे नै हुन् । गीतको कोरसमा भूपूसहित श्याम ढकाल, रमेश कडरिया, भुवन खत्री, नरेन्द्र वियोगी, लक्ष्मी कार्की र तिलस्मी खड्काको स्वर छ ।

नन्दाको पहिलाको घर गाेरखा हो । अहिले उनी काठमाडाैं रानीबारीस्थित घरमा बस्छिन् । उनले गाएको गीतचाहिँ उतै गाउँबेँसीको भाकामा छ ।

खासगरी गण्डकी प्रदेशको पहाडी जिल्लामा यस्तो भाकाको गीत गाउने गरिन्छ । जे होस्, 'लैलै बरी' बाट मूलतः दुई सन्देश निकाल्न सकिन्छ- पहिलो, नेपाली मौलिक गीतसंगीत अन्य कुनै पनि संगीतभन्दा कमजोर छैन । दोस्रो, सपना पूरा गर्न उमेरले छेक्दैन ।