फोर जी सेवा गुणस्तर बनाएपछि मात्रै फाइभ जी लागू गर्नु उपयुक्त : सञ्चारमन्त्री शर्मा

फोर जी सेवा गुणस्तर बनाएपछि मात्रै फाइभ जी लागू गर्नु उपयुक्त : सञ्चारमन्त्री शर्मा

A+ A A-

सञ्चार तथा सूचना प्रविधिमन्त्री रेखा शर्माले फोर जी सेवा गुणस्तर बनाएर आवश्यक पूर्वाधारको निर्माणपछि मात्रै फाइभ जी लागू गर्न उपयुक्त हुने बताएकी छन् । बिहीबार प्रविधि पत्रकार मञ्चले काठमाडौंमा आयोजना गरेको ‘फाइभ जीको चुनौती र आगामी बाटो’ विषयक अन्तर्क्रिया कार्यक्रममा बोल्दै मन्त्री शर्माले फाइभ जी सेवा परीक्षण गर्दै गर्दा देशका धेरै स्थानमा समान्य सूचनाको पहुँचसमेत पुग्न नसकेको अवस्था रहेको बताइन् ।

उनले फोर जी सेवा विस्तार भएको लामो समयसम्म काठमाडौं उपत्यकामा समेत प्रभावकारी हुन नसकेको भन्दै फोर जी सेवालाई व्यवस्थित बनाउन आवश्यक रहेको उल्लेख गरिन् । मन्त्री शर्माले फोर जी सेवा लागू गर्दा लागेको लागतअनुसार प्रतिफल भए/नभएको विषयमा अध्ययन गर्नुपर्नेसमेत बताइन् । उनले विश्वमा आउने नयाँ प्रविधिमा अगाडि बढ्दै जाने र त्यसबाट हुने फाइदाको समीक्षा गर्न सकेनौँ भने लाभभन्दा नोक्सानी बढ्न सक्नेतर्फ सचेत हुन आवश्यक रहेको टिप्पणी गरिन् ।

मन्त्री शर्माले नेपाल भौगोलिक रुपमा कठिन अवस्थामा रहेको भन्दै उच्च हिमाली जिल्लामा समान्य सूचनाको पहुँच नै नपुगेको स्वीकार गरिन् । उनले देशका धेरै भू–भागहरू इन्टरनेटको न्यूनतम सेवासमेत नपुगेको बताइन् । उनले विभिन्न निकुञ्ज र जङ्गलको क्षेत्रसमेत इन्टरनेट र फोनको पहुँचबाहिर रहेको भन्दै जङ्गलको बाटोमा यात्रा गर्दा जनावरको आक्रमण भएमा सूचना दिन फोन नलाग्ने र नेट नै नचल्ने समस्या रहेको बताइन् ।

उनले सम्बन्धित निकायहरूलाई सबैभन्दा पहिला सबै भूभागमा टेलिकमको सामान्य सेवाको पहुँच पुर्‍याउन निर्देशन दिइन् । मन्त्री शर्माले उपत्यकाका धेरै स्थानमा सामान्य सेवासमेत नपुगेको र हाइवेका धेरै ठाउँमा फोन नलाग्ने, टावर नै नआउने अवस्था रहेको बताइन् । उनले फाइभ जीअघि सरकारले ठूलो लगानी गरेर फोर जीको पूर्वाधार तयार गरे पनि त्यो लगानी खेर जाने स्थिति रहेको उनको भनाइ थियो ।

प्रकाशित मिति: बिहीबार, फागुन ११, २०७९ १४:५५