आयल निगमविरुद्ध अख्तियारमा उजुरी, सर्वसाधारणबाट महँगो मूल्य असुलेर कर्मचारीलाई पोसेको आरोप

आयल निगमविरुद्ध अख्तियारमा उजुरी, सर्वसाधारणबाट महँगो मूल्य असुलेर कर्मचारीलाई पोसेको आरोप

A+ A A-

पेट्रोल, मट्टीतेल, ग्यासलगायत पेट्राेलियम पदार्थमा सर्वसाधारणबाट महँगो शुल्क असुली कर्मचारीलाई पोसेको भन्दै नेपाल आयाल निगमविरुद्ध अख्तियार दुरुपयाेग अनुसन्धान आयाेगमा उजुरी परेको छ । उजुरीमा उपभोक्तलाई चर्को मूल्यवृद्धिमा पारेर कर्मचारीलाई नियम विपरीत बढुवाको सुविधा दिएको आरोप लगाइएको छ ।

‘कर्मचारी प्रशासन विनियमावली २०६३ विपरीत आफ्ना कर्मचारीलाई विभिन्न बहानामा सुविधा प्रदान गर्दै नीतिगत रूपमा आर्थिक भ्रष्टाचार आयल निगमले गरेको छ,' बेनामे उजुरीपत्रमा भनिएको छ ।

कर्मचारी विनयमावलीविरुद्ध गएर निगमका र्काकारी निर्देशकले अख्तियारको दुरुपयोग गरी पुरस्कारस्वरुप प्रत्येक कर्मचारीलाई प्रत्येक वर्ष ग्रेड वृद्धि गरी निगमलाई वार्षिक करोडौँ रुपैयाँकाे भार पुर्‍याएको आरोप छ ।

ग्रेड वृद्धिमा भइरहेको भ्रष्टाचारलाई रोक्न अपिल गर्दै अख्तियारमा उजुरी परेको हो । उजुरीबारे निगमका प्रवक्ता विनितमणि उपाध्यायले आफूहरूलाई थाहा नभएको बताए । उनले भने, ‘हामीकहाँ अहिलेसम्म कुनै जानकारी आएको छैन ।’

उनले उजुरीको खण्डन गर्दै निगमको वार्षिक उत्सवमा यो वर्ष चार जनालाई पुरस्कृत गरिए पनि सबै कर्मचारीको ग्रेड भने नबढाइएको बताए । उनले भने, ‘उत्कृष्ट कार्यसम्पादन गरेबापत २-४ जनालाई पुरस्कृत गरिएको हो । ग्रेड बढाउने भन्ने कुरा भएको छैन ।’

उजुरीमा वार्षिक नाफा मनग्य कमाएको निगमले उपभोक्ताबाट चर्को मूल्य असुलेर कर्मचारी पोस्ने गरेको उल्लेख छ ।

साउनयता निगमको नाफा मात्रै २ अर्ब ९ करोड रुपैयाँ पुगेको छ । पेट्रोलमा मात्रै निगमले ३९ करोड ६२ लाख रुपैयाँ नाफा कमाएको हो । तर, सरकारी ऋण र भारतीय आयल निगमलाई तिर्नुपर्ने ऋणका कारण पेट्रोलको मूल्य घटाउन नसकेको निगमले गर्दै डिजेल, पेट्रोल, ग्यासमा मूल्य घटाउन मानिरहेको छैन ।

प्रकाशित मिति: बिहीबार, फागुन ११, २०७९ १५:०५