गाडी किन्ने हो ? यस्ता गाडी आउँछन् २५ लाखसम्ममा

A+ A A-

१० भदौदेखि काठमाडौंमा नाडा अटो शो हुदैछ । दशैं र तिहारको अवसरमा आयोजना गरिने अटो शोमा विभिन्न कम्पनीहरुले विभिन्न योजना र छुट समेतको स्कीम ल्याउने गरेका हुन्छन् ।

यसपाली पनि विभिन्न ब्राण्डका गाडीमा यस्तै योजना र छुट आउन सक्छ । यहाँ हामीले नाडा अटो मोवाइल्स डिलर्स एसोसिएसनले प्रकाशित गरेको मूल्य सुची अनुसार २५ लाख रुपैयाँसम्ममा आउने नयाँ गाडी बारे जानकारी दिने प्रयास गरेका छौं ।

नेपालमा विक्री हुने ६ वटा कम्पनीका गाडी २५ लाख रुपैयाँसम्ममा किन्न पाइन्छ । यस्ता कम्पनीका ड्याट्सन/निसान, ह्युण्डाई, रेनोल्ट, फोर्ड, टाटा र मारुती सुजुकी हुन् ।

ड्याटसन/निसान

ड्याटसन र निसान अहिले एउटै कम्पनी भएको छ । यो कम्पनीले उत्पादन गर्ने गाडीको नेपाली आधिकारिक वितरक पायोनियर मोटो कर्प हो ।

यो कम्पनीका दुइटा मोडल मात्रै २५ लाख रुपैयाँसम्ममा आउँछन् । भारतमा बनेको ७९९ सीसी इन्जिन क्षमताको ड्याटसन रेडी गो ह्याचब्याक गाडीको अधिकतम खुद्रा मूल्य १९ लाख ९९ हजार रुपैयाँ छ ।

यस्तै भारतमा बनेको ड्याटसनकै ९९९ सीसी इन्जिन क्षमताको रेडी गो गाडीको मूल्य २१ लाख ९९ हजार रुपैयाँ छ ।

ह्युण्डाई

ह्युण्डाई गाडीको नेपाली आधिकारिक वितरक लक्ष्मी इन्टरकन्टिनेन्टल हो । यो कम्पनीको २५ लाख रुपैयाँसम्मको एउटा मोडल छ भने २५ लाख ५६ हजार रुपैयाँ मूल्यको अर्काे मोडल छ ।

ह्युण्डाईको १०८६ सीसी इन्जिन क्षमताको स्यान्ट्रो एरा गाडीको मूल्य २२ लाख ९६ हजार रुपैयाँ छ । यस्तै १०८६ सीसी इन्जिन क्षमताकै स्यान्ट्रो मग्न गाडीको मूल्य २५ लाख ५६ हजार रुपैयाँ छ । यी दुबै गाडी भारतमा बनेका हुन् ।

रेनोल्ट

रेनोल्ट कम्पनीका ६ वटा मोडलका कार २५ लाख रुपैयाँभन्दा सस्तोमा पाइन्छन् । रेनोल्टका गाडीको नेपाली आधिकारिक वितरक एड्भान्स अटोमोबाइल्स हो ।

२५ लाख रुपैयाँभन्दा सस्तोमा पाइने रेनोल्टको क्वीड कार हो । यी ६ वटा सबै मोडलको इन्जिन क्षमता ९९९ सीसी छ ।

नेपालमा रेनोल्ट क्वीड आरएक्सटीको मूल्य २२ लाख २४ हजार ५३३ रुपैयाँ, रेनोल्ट क्वीड आरएक्सटी ‘ओ’को मूल्य २२ लाख ७३ हजार ६४५ रुपैयाँ र रेनोल्ट क्वीड आरएक्सएल एएमटीको मूल्य २१ लाख ९६ हजार ६१३ रुपैयाँ छ ।

यस्तै रेनोल्ट क्वीड आरएक्सटी ‘ओ’ एएमटीको मूल्य २४ लाख ११ हजार ६६३ रुपैयाँ, न्यू क्वीड आरएक्सटी ‘ओ’ (एमटी) को मूल्य २३ लाख ३० हजार ७३० रुपैयाँ र न्यू क्वीड आरएक्सटी ‘ओ’ (एएमटी) को मूल्य २४ लाख ५८ हजार ५५६ रुपैयाँ छ । यसका ६ वटै मोडल भारतमा बनेका हुन् ।

फोर्ड

नेपालमा २५ लाख रुपैयाँसम्ममा फोर्डको एउटा मोडल मात्रै आउँछ । फोर्ड गाडीको नेपाली आधिकारिक वितरक गो अटोमोवाइल्स हो ।

फोर्डको ११९४ सीसी इन्जिन क्षमताको एम्बियन्त गाडीको मूल्य २४ लाख ९९ हजार रुपैयाँ छ ।

टाटा

टाटाको कार २५ लाख रुपैयाँभन्दा सस्तोमा एउटा मोडल मात्रै छ । र, २५ लाख ५० हजार रुपैयाँमा पाइने अर्काे मोडल भने छ ।

टाटाको नेपाली आधिकारिक वितरक सिप्रदी ट्रेडिङ हो । टाटाको ११९९ सीसी इन्जिन क्षमताको टिएगो एक्सइको मूल्य २१ लाख ५५ हजार रुपैयाँ छ । यस्तै ११९९ सीसी इन्जिन क्षमताकै टिगर आरटीएक्सइको मूल्य २५ लाख ५० हजार रुपैयाँ छ ।

मारुती सुजुकी

मारुती सुजुकी कम्पनीका ४ मोडलका कार २५ लाख रुपैयाँसम्ममा पाइन्छन् । मारुती सुजुकीको नेपाली आधिकारिक वितरक केएमसी अटोमोवाइल्स हो ।

मारुती सुजुकीको ७९६ सीसी इन्जिन क्षमताको अल्टो ८०० एलएक्सआइ गाडी २० लाख ९९ हजार रुपैयाँमा पाइन्छ । यस्तै ७९६ सीसी इन्जिन क्षमताकै अल्टो ८०० एसटीडी गाडीको मूल्य १८ लाख ९९ हजार रुपैयाँ छ ।

मारुती सुजुकीको ९९८ सीसी इन्जिन क्षमताको अल्टो के १० को मूल्य २२ लाख ८९ हजार रुपैयाँ छ । यस्तै, ९९८ सीसी इन्जिन क्षमताकै वागनर गाडीको मूल्य २४ लाख ९९ हजार रुपैयाँ छ ।

प्रकाशित मिति: शनिबार, भदौ ७, २०७६ ०४:२०