मल र सिँचाइका कारण धान रोप्दैनन् किसान, धनुषामा मात्रै ९७ करोडले उत्पादनमा कमी

मल र सिँचाइका कारण धान रोप्दैनन् किसान, धनुषामा मात्रै ९७ करोडले उत्पादनमा कमी

A+ A A-

धान उत्पादनको लागि प्रसिद्ध धनुषा जिल्लामा धान खेती गर्ने क्षेत्रफल घटेको छ । समयमा मल खाद नपाउने र सिँचाइको पनि राम्रो व्यवस्था हुन नसक्दा किसानहरू धान रोप्न छाडेर अन्य खेतीतर्फ आकर्षित भएका छन् । जसका कारण उत्पादनमा पनि कमी आएको छ ।

कृषि ज्ञान केन्द्र धनुषाका अनुसार यस वर्ष धनुषामा मात्रै ९७ करोड मूल्य बराबरको धान उत्पादनमा ह्रास आएको छ । केन्द्रका अनुसार यस वर्ष ४८ हजार ७ सय ६० हेक्टर क्षेत्रफलमा धान रोपिएको थियो । त्यसमा १ लाख ४६ हजार २ सय ८० मेट्रिकटन उत्पादन भएको छ । अघिल्लो वर्ष धनुषामा ५५ हजार ८ सय ६ हेक्टर क्षेत्रफल धान खेती हुँदा १ लाख ७९ हजार मेट्रिकटन धान उत्पादन भएको थियो ।

यस वर्ष गत वर्षको तुलनामा ३२ हजार ७ सय ६० मेट्रिकटनले धान उत्पादनमा कमी आएको केन्द्रले जनाएको छ । सरकारले तोकेको धानको मूल्यअनुसार यस वर्ष अघिल्लो वर्षको तुलनामा ९७ करोड १९ लाख ८९ हजार २ सय रुपैयाँ बराबरको धान उत्पादनमा ह्रास आएको केन्द्रका बागवानी अधिकृत प्रदीप कुमार यादवले जानकारी दिए ।

dhan- (2)1677078609.jpg

जिल्लाका गणेशमान चारनाथ नगरपालिका, मिथला नगरपालिका, बटेश्वर गाउँपालिका र क्षीरेश्वरनाथ नगरपालिकाबाहेक १४ स्थानीय तहका किसानहरूले मुख्य रूपमा धान खेती गर्दै आएको उनी बताउँछन् ।

किन घट्यो उत्पादन ?

धान उत्पादनमा कमी आउनुका विभिन्न कारण रहेको कृषि ज्ञानकेन्द्र धनुषाले जनाएको छ । गत वर्षको तुलनामा कम क्षेत्रफलमा धान रोपिएकोले मुख्य रूपमा उत्पादनमा कमी आएको यादवको भनाइ छ ।

dhan- (3)1677078609.jpg

त्यस्तै समयमा मल खाद उपलब्ध नहुनु, सिँचाइको अभाव जस्ता कारणले पनि किसानहरू धान खेतीतर्फ आकर्षित हुन नसकेको यादव बताउँछन् । किसानहरू माछापालनतर्फ आकर्षित हुने गरेकोले पनि धान उत्पादनमा कमी आएको उनले बताए ।

जिल्लामा ७ लाख किसानहरूले धान खेती गर्दै आएको यादव बताउँछन् । ‘यहाँका अधिकांश किसानको आयस्रोत भनेको धान खेती हो,' उनले भने, 'तर, समयमा मल खाद नपाएर लगानीअनुसार प्रतिफल किसानले पाउँदैनन् । त्यसकारण किसानहरू माछापालन तथा तराकारी खेतीलगायतमा आकर्षित भएका छन् ।’

प्रकाशित मिति: बुधबार, फागुन १०, २०७९ २०:५५