लघुवित्त आतंककाे प्रभाव शेयरबजारमा, लगानीकर्ता बेच्न हतारिँदा शेयरमूल्यमा गिरावट

लघुवित्त आतंककाे प्रभाव शेयरबजारमा, लगानीकर्ता बेच्न हतारिँदा शेयरमूल्यमा गिरावट

A+ A A-

एकपछि अर्को लघुवित्त समस्याग्रस्त बनेसँगै यसको असर धितोपत्रको दोस्रो बजारमा देखिन थालेको छ । लघुवित्तहरू कर्जा उठाउन नसकी धमाधम समस्याग्रस्त बनेको सूचना फैलिएसँगै दोस्रो बजारमा लघुवित्त कम्पनीहरूको शेयरमूल्यमा गिरावट आउन थालेको हो ।

शेयर लगानीकर्ताको लगानीको प्रमुख विन्दु बन्दै आएको लघुवित्त समूहकाे शेयर केही दिनदेखि निरन्तर बिक्रीमा देखिएकाे छ । लघुवित्त समूहको शेयर किन्न लाग्ने लगानीकर्ताको भिड यतिबेला बेच्ने भिडमा परिणत हुँदा त्यसको असर शेयरमूल्यमा परेको हो ।

बुधबार लगानीका लागि आकर्षक मानिँदै आएका जीवन विकास,आदर्श, महिला, नेस्डोलगायत लघुवित्तमा पनि लघुवित्त आतंकले असर गर्दा लगानीकर्ता प्रिमियम भनिएका कम्पनीको शेयर पनि बेच्न हतारिरहेका देखिन्छन् । जसले गर्दा आज लघुवित्त समूहको सूचकसँगै शेयरमूल्यमा पनि भारी मात्रामा गिरावट आइरहेकाे छ । बजार बन्द हुने समयसम्म सूचक सुधारिएन भने साेमबारकै जस्ताे लघुवित्त समूहले ठूलाे मात्रा शेयरमूल्य गुमाउने देखिन्छ ।

धमाधम लघुवित्तका ऋणीहरू ऋण तिर्न नसकेर भाग्न थालेपछि लघुवित्तहरू समस्याग्रस्त बन्न थालेका छन् । गाउँगाँउमा लघुवित्त आतंक फैलिन थालेपछि राष्ट्र बैंकले ऋण प्रवाहमा लघुवित्तलाई कडाइ गर्ने गृहकार्य सुरु गरेसँगै शेयरबजारमा यो क्षेत्रलाई लिएर शंका उपशंका उब्जिन थालेको छ । समस्याग्रस्त बन्ने समाचारले त्रसित लगानीकर्ता लघुवित्तमा भएको शेयर धमाधम बिक्री गर्ने मनसायमा पुगेका हुन् । जसको असर गएकाे ४ काराेबार दिनकाे बजारमा देखिएकाे छ ।

साेमबार नै आत‌ंकित बनेका लघुवित्तका लगानीकर्ताले २४ करोड रुपैयाँको कारोबार गरेका थिए भने साे दिनभर किन्नेभन्दा बेच्ने लगानीकर्ताकाे भिड बढी थियाे । लगातार शेयरमूल्य घटेपछि लगानीकर्ता संयमित नबन्दा त्यसले बुधबारकाे बजारमा पनि निरन्तरता पाइरहेकाे छ । बुधबार याे समाचार तयार पार्दासम्म ५२ कम्पनीमध्ये ३८ कम्पनीकाे शेयरमूल्य घटिसकेकाे छ भने अधिका‌ंश लगानिकर्ताले बजारमा बिक्री चाप बढाइरहेका छन् ।

यतिबेलासम्म आदर्श लघुवित्तकाे शेयरमूल्यमा नकारात्मक सर्किट लागिसकेकाे छ भने किसान र जीवन विकास लघुवित्त सर्किटकै लयमा देखिएका छन् । लगानिकर्ताले जीवन विकास, किसान र आदर्श लघुवित्तमा बिक्रीचाप बढाउँदा यसकाे मूल्य अन्यकाे तुलनामा धेरैले घट्न पुगेकाे हाे ।

सर्वाधिक घट्नेमा अगाडि आएको आदर्श लघुवित्तले याे समाचार तयार पार्दासम्म कित्तामा 2 सय १३ रुपैयाँ मूल्य गुमाइसक्दा जीवन विकास लघुवित्तले कित्तामा १ सय ३ रुपैयाँ मूल्य गुमाइसकेकाे अवस्था छ ।

साेमबार भने सबैभन्दा धेरै जीवन विकास लघुिवत्तकाे शेयरमूल्य घटेकाे थियाे । साे दिन नकारात्मक सर्किट लेबलमा घटेको यो कम्पनीको शेयरमूल्यमा प्रतिकित्ता २ सय ४८ रुपैयाँको गिरावट आयाे । बुधबार पनि घट्ने क्रमले निरन्तरता पाउँदा १३ महिना यताकै न्यून मूल्यमा आइपुगेकाे हाे ।

सञ्चारमाध्यममा महिला लघुवित्त, जीवन विकास, स्वावलम्बनलगायत लघुवित्तका ऋणीहरू ऋण तिर्न नसकेर भागेको समाचार आउन थालेपछि सो कम्पनीका शेयर लगानीकर्ताले बिक्रीमा जोड दिन पुग्दा समग्र लघवित्त समूहकै सूचक घट्न पुग्यो ।

जीवन विकासकाे हकमा याे नै १३ महिना यताकै न्यून मूल्य हाे । अर्थात् गएको माघमा २३ सय प्रतिकित्ताको दरमा खरिदबिक्री भएको उक्त कम्पनीको शेयर त्यसपछिका दिनहरूमा भने २५ सयभन्दा माथि नै किनबेच भएको थियो । मंगलबार सो कम्पनीले लगानीकर्तालाई ३७ प्रतिशत लाभांश दिने घोषणा गरेकै भाेलिपल्ट आज शेयरमूल्य बढ्नुकाे साटाे उल्टाे आज पनि मूल्य घटिरहँदा १३ महिना अघिकै अवस्थामा आइपुगेकाे हाे ।

सामान्यतया कम्पनीले लाभांश वितरण गर्ने घोषणाबाटै लगानीकर्ता उक्त कम्पनीको शेयर किन्न उत्साहित हुने गर्छन् । जसले गर्दा घोषणा भएकै दिनदेखि बजारमा शेयरमूल्य बढ्ने प्रवृत्ति देखिने गर्छ । तर, आज जीवन विकास लघुवित्तले लगानीकर्तालाई राम्रो लाभांश दिने घोषणा गर्दा पनि शेयरमूल्यमा भारी गिरावट आउने क्रम राेकिएकाे छैन । तसर्थ कम्पनीको लाभांश घोषणाले शेयरमूल्य गिरावटलाई रोक्न सकेन । लगानीकर्ता त्रसित अवस्थामै बजारबाट निस्किन खाेजिरहेका छन् ।

यसरी लगानीकर्ता जीवन विकास मात्रै नभएर अधिकांश लघुवित्तका शेयर बिक्री गर्न आतुर देखिँदा कारोबारमा आएका ९० प्रतिशत कम्पनीकाे मूल्यमा गिरावट आइरहेकाे छ।

सर्वाधिक घट्नेमा आदर्श स‌गै जीवन विकास,किसान,उपकार, विन नेपाल, खप्तड र सबैको लघुवित्त कम्पनीहरू अग्रस्थानमा देखिएका छन् ।

समग्रमा आजको बजारमा लघुवित्त कम्पनीका शेयरमूल्यमा देखिएको ह्रासले लगानीकर्ता लघुवित्त कम्पनीलाई लिएर सशंकित अवस्थामा पुगेको अनुमान गर्न सकिन्छ । साथै, लगानीकर्ताको मनोविज्ञान लघुवित्त कम्पनीको शेयर बेचेर सम्भावित दुर्घटनाबाट बच्नेतर्फ लागेको देखिन्छ ।

यद्यपि, शेयरबजार जानकारहरू भने केही लघुवित्त समस्याग्रस्त बन्नेबित्तिकै लगानीकर्ताले शेयर बेचेरै भाग्नुपर्ने अवस्था भने नआएको तर्क गर्छन् । तर, बजारमा फैलिएको सूचनाका आधारमा बजारमा लगानीकर्ताको मनोविज्ञान घटबढ हुने शेयरको प्रवृत्ति भएकै कारण पनि लघुवित्त आतंक शेयरबजार क्षेत्रमा देखिन थालेको हो ।

प्रकाशित मिति: बुधबार, फागुन १०, २०७९ १४:३४