एमएमआईएचएसको १६औँ वार्षिकोत्सव विविध कार्यक्रमका साथ सम्पन्न

A+ A A-

एमएमआईएचएसको १६औँ वार्षिकोत्सव संस्थाका अध्यक्ष डा. वंशीधर मिश्रको अध्यक्षतामा विविध कार्यक्रम गरी भव्यतापूर्वक सम्पन्न भएको छ । अन्तिम दिनको कार्यक्रमको प्रमुख अतिथि प्रतिनिधिसभा सदस्य एवं बागमती प्रदेशका निवर्तमान मुख्यमन्त्री माननीय राजेन्द्रप्रसाद पाण्डेले क्याम्पस दिवसको सफलताको कामना गर्दै संस्थाले शैक्षिक क्षेत्रमा पुर्‍याएको योगदानको उच्च मूल्यांकन गरे ।

बागमती प्रदेशका कृषि तथा पशुपन्छी विकासमन्त्री माननीय केशव पोखरेलले क्याम्पसका सबै प्रकारका गतिविधिहरू आफूले नजिकबाट नियाल्ने अवसर प्राप्त गरेकाले प्रदेश सरकारले क्याम्पसका सबै प्रकारका प्राज्ञिक कार्यहरूमा सहयोग गर्ने प्रतिबद्धता व्यक्त गरे ।

नेपाल स्वास्थ्य सेवा सहकारी संस्थाका उपाध्यक्ष जीवनप्रकाश शर्माले नेपालको शैक्षिक इतिहासको चित्र प्रस्तुत गर्दै शिक्षालाई उद्योगसँग जोड्न सकिएमा मात्र उत्पादित जनशक्ति बेरोजगार हुनु नपर्ने धारणा व्यक्त राखे । चिकित्सा शिक्षा आयोगका उपाध्यक्ष प्रा.डा. श्रीकृष्ण गिरीले क्याम्पसले उत्पादन गरेको जनशक्तिले रोजगारी प्राप्त गर्न सफल भएको सुन्दा उत्साहित भएको बताए । उनले चिकित्सा शिक्षा आयोगले छोटो समयमा चिकित्सा शिक्षालाई व्यवस्थित गर्न गरेका प्रयासहरूका बारेमा उल्लेख गरे ।

चिकित्साशास्त्र अध्ययन संस्थान महारजगञ्जका निमित्त डिन प्रा.डा. प्रदिप वैद्यले क्याम्पसले प्रदान गरेको गुणस्तरीय शिक्षाको अनुभूति सर्वत्र महसुस गरिएको भन्दै स्वास्थ्य विज्ञानतर्फको अन्तिम परीक्षामा उक्त क्याम्पसले उत्कृष्ट स्थान प्राप्त गर्न सफल भएकोमा अध्यापनरत सबै शिक्षक शिक्षिकालाई बधाई दिए ।

क्याम्पसका संयोजक डा रामकुमार अधिकारीले विद्यार्थीहरूलाई अनुसन्धानको क्षेत्रमा समर्पित हुनुपर्ने सुझाव राख्दै उपस्थित सबै महानुभाबहरूलाई धन्यवाद ज्ञापन गरे । कार्यक्रमको समापन गर्दै अध्यक्ष डा. वंशीधर मिश्रले क्याम्पसले प्रन्ध वर्षको अवधिमा गरेका महत्त्वपूर्ण उपलब्धिहरूको चर्चा गर्दै संस्थालाई उत्कृष्ट शैक्षिक संस्था बनाउन सहयोग पुर्‍याउने सबैलाई धन्यवाद व्यक्त गरे ।

कार्यक्रममा पूर्वक्याम्पस प्रमुख प्राध्यापक विष्णु भट्टराईले आफूले पन्ध्र वर्षसम्म क्याम्पसको प्राध्यापक र क्याम्पस प्रमुखको नाताले गरेका कार्यहरूको संक्षिप्त चर्चा गर्दै आफ्नो कार्यकालमा आफूलाई सहयोग पुर्‍याउनु हुने नेको नेपालका संस्थापक अध्यक्षलगायत पदाधिकारीहरूप्रति आभार व्यक्त गरे । मनमोहन मेमोरियल शिक्षण अस्पतालका प्रमुख कार्यकारी निर्देशक डा. नास्तु शर्मा, नेपाल नर्सिङ परिषद्का अध्यक्ष सरला के.सी., नेपाल स्वास्थ्य अनुसन्धान परिषद्का कार्यकारी प्रमुख डा प्रदिप ज्ञवाली, नेपाल स्वास्थ्य व्यवसायी परिषद् रजिस्ट्रार पुष्पराज खनालले संस्थाको उत्तरोत्तर प्रगतिको शुभकामना व्यक्त गरे ।

क्याम्पस प्रमुख डा. धर्मप्रसाद खनालले क्याम्पसको वार्षिकोत्सवमा उपस्थित प्रमुख अतिथि विशिष्ट अतिथिलगायत शिक्षक, कर्मचारी तथा विद्यार्थीहरूको स्वागत गर्दै क्याम्पसको शैक्षिक गतिविधिको संक्षेपमा चर्चा गरे ।

त्यस्तै, नेको नेपालका संस्थापक अध्यक्ष राजेन्द्रप्रसाद पाण्डे प्रतिनिधिसभा सदस्यमा निर्वाचनमा विजयी भएकोमा र क्याम्पस व्यवस्थापन समितिका सदस्य माननीय केशवप्रसाद पोखरेल बागमती प्रदेश सरकारको कृषि तथा पशुपक्षीमन्त्रीमा नियुक्त भएकोमा क्याम्पस व्यवस्थापन समितिको तर्फबाट सम्मान गर्दै हार्दिक बधाई ज्ञापन गरियो ।

कार्यक्रममा पन्ध्र वर्षसम्म संस्थाको शैक्षिक प्राज्ञिक उन्नयनमा महत्त्वपूर्ण योगदान पुर्‍याउने पूर्वसंयोजक सह–प्राध्यापक जीवनप्रकाश शर्मा र पूर्वक्याम्पस प्रमुख प्राध्यापक विष्णु भट्टराईलाई अभिनन्दन गरियो । त्यस्तै, यस वर्षको वर्ष शिक्षकको रूपमा प्राध्यापक डा. सुजनबाबु मरहट्टा र वर्ष कर्मचारीको रूपमा बेदकुमारी पौडेल (पार्वती) र पूर्वकर्मचारी रेशम तिवारीलाई सम्मानित गरियो । सोही अवसरमा वार्षिक परीक्षामा उत्कृष्ट विद्यार्थीहरूलाई समेत प्रमाणपत्र प्रदान गरिएको थियो ।

त्यस्तै, सोही अवसरमा क्याम्पसको वार्षिक रुपमा प्रकाशित हुने क्याम्पसको सोभिनियर पुस्तकको पनि विमोचन गरियो । वार्षिकोत्सवको अवसरमा क्याम्पसले सप्ताह व्यापी खेलकुद ररक्तदान कार्यक्रम पनि आयोजना गर्‍यो । विद्यार्थीहरूले उत्साहपूर्वक सांस्कृतिक कायक्रम पनि गरेका थिए भने मनमोहन मेमोरियल छात्रवृत्ति तथा हरिदेउसा राई छात्रवृत्ति बाट समेत विद्यार्थीहरूलाई छात्रवृत्ति प्रदान गरिएको थियो ।

सो अवसरमा आगामी वर्षदेखि नर्सिङ विभागमा अध्ययनरत विद्यार्थीहरूको पठनपठनमा सहयोग पुर्‍याउने उद्देश्यले श्रीमान् र श्रीमती विष्णु भट्टराईको तर्फबाट ५ लाख रुपैयाँबराबरको अक्षयकोषको समेत घोषणा गरियो ।

कार्यक्रममा नेपाल स्वास्थ्य सेवा सहकारी सस्थाका उपाध्यक्ष ई. गम्भीरलाल श्रेष्ठ, सहसचिव हरिकुमार श्रेष्ठ, सदस्य हरिहर कार्की, नर्सिङ परिषद्का रजिष्ट्रार शकुन्तला प्रजापति, नेपाल स्वास्थ्य व्यवसायी परिषद्का अध्यक्ष डा मोहनकृष्ण श्रेष्ठ, क्याम्पस व्यवस्थापन समितिका सदस्यहरू डा रामराज पन्थी, वरिष्ठ अधिवक्ता विष्णु भट्टराई, चिकित्साशास्त्र अध्ययन सस्थान फार्मेसी विभागका प्रमुख अर्जुन बुढ थापा, विभागीय प्रमुखहरू प्रा बिनु विष्ट, डा खड्गबहादुर श्रेष्ठ, मिजला वज्राचार्यको समेत आतिथ्यता रहेको थियो ।

प्रकाशित मिति: मंगलबार, फागुन ९, २०७९ १४:२४