दीक्षित विद्यार्थीको प्रधानमन्त्रीसँग आक्रोशः जागिर छैन, एउटा लेपन दिँदैमा हुन्छ ?

दीक्षित विद्यार्थीको प्रधानमन्त्रीसँग आक्रोशः जागिर छैन, एउटा लेपन दिँदैमा हुन्छ ?

A+ A A-

अक्सफोर्ड कलेज चितवनबाट इन्ञ्जिनियरिङ म्यानेजमेन्ट पढेर दीक्षित हुन आदर्श सुवेदी पोखरा आएका थिए । उनी पढेको कलेजले पोखरा विश्वविद्यालयबाट सम्बन्धन लिएको छ । त्यही भएर विश्वविद्यालयमा सोमबार १८औँ दीक्षान्त समारोहमा सहभागी हुन पोखरा आएका थिए ।

विश्वविद्यालयका कुलपतिसमेत रहेका प्रधानमन्त्री पुष्पकमल दाहाल ‘प्रचण्ड’ले सम्बोधन गरिरहँदा आदर्श एकाएक ठूलो स्वरमा बोले । कुलपति प्रचण्डको सम्बोधनको अन्तिमतिर आउँदा आदर्शले भने- 'प्रधानमन्त्रीज्यू, मलाई मेरो प्रश्नको जवाफ चाहिन्छ है ।’

उनी चिच्याएपछि सुरक्षाकर्मीले अघि बढ्न नदिने गरी रोके । प्रधानमन्त्री गएपछि आफ्नो बोलीको मूल्य नहुने भन्दै आदर्श रोकिन मानेन् । उनले दुःखेसो पोख्दै भने, ‘यहाँ गोल्डमेडल पाए पनि लास्टमा थन्क्याउने मात्रै हो । मेरो दाइले पनि पढेर गोल्ड मेडल पाएर अहिले थन्काएर बस्नुभा’को छ ।’

दीक्षान्त समारोहको भीडले प्रधानमन्त्रीको राजीनामासमेत माग्यो । आदर्शसहितका विद्यार्थी चिच्याइरहँदा प्रधानमन्त्री कार्यक्रम स्थलबाट बाहिरिए । ‘यसरी भाग्नै छ भने राजीनामा दिए भयो नि,’ आदर्शले थपे, ‘भाग्ने हो भने राजीनामा चाहियो ।’

पढाइका सर्टिफिकेट पाएपछिको दुःख पनि उनले सुनाइहाले । जागिर नपाउने, पाए पनि १५/२० हजार रूपैयाँ तलब हुने समस्याबारे आदर्शले प्रधानमन्त्रीलाई प्रश्न राख्न चाहेका थिए । ‘एउटा कुल्लीले ३०/३५ हजार खान्छ । यहाँ गफ लगाएर मात्रै हुन्छ ?’ प्रधानमन्त्री निस्किँदै गर्दा उनी चिच्याइरहे, ‘यहाँको कुलपति, उपकुलपति सबैले गफ लगाएर हुन्छ ? के–के नै गोल्ड मेडल ! एउटा लेपन दिँदैमा हुन्छ ?’ आदर्शले आफू पार्टीसँग आबद्ध नभएको र विद्यार्थीका समस्या बोलेको बताए ।

सम्बोधनमा प्रधानमन्त्रीले मुलुकका लागि योगदान गर्ने समय आएको बताएका थिए । तर, विद्यार्थीमा कतिसम्म निराशा छ भन्ने विश्वविद्यालयको दीक्षित समारोहमा आदर्शसहित विद्यार्थीको भनाइले प्रमाणित गर्छ । समारोहमा विश्वविद्यालय, त्यसअन्तर्गतका आंगिक क्याम्पसका करिब ९ हजार विद्यार्थी दीक्षित भएका छन् ।

प्रकाशित मिति: सोमबार, फागुन ८, २०७९ २०:४७