'सातौँ युवा वैज्ञानिक शिखर सम्मेलन २०२३' काठमाडौंमा सुरु

A+ A A-

नेपाल पोलिमर इन्स्टिच्युट र युनिग्लोब एसएस/कलेजको संयुक्त आयोजनामा भइरहेको दुईदिने 'सातौँ युवा वैज्ञानिक शिखर सम्मेलन २०२३' आइतबारदेखि युनिग्लोब कलेज, कमलादी काठमाडौँमा सुरु भएको छ ।

नेपाल सरकार, शिक्षा, विज्ञान तथा प्रविधि मन्त्रालय, नेपाल विज्ञान तथा प्रविधि प्रज्ञा प्रतिष्ठान, राष्ट्रिय आविष्कार केन्द्र, नेपाल युवा परिषद्, युनेस्को नेपाल, अनुसन्धान तथा विकास सोसाइटी नेपाल र नेपाल विज्ञान शिक्षक समाजसँगको सहकार्यमा उक्त कार्यक्रम आयोजना गरिएको हो ।

सम्मेलनमा प्रदेश १, २, बागमती, गण्डकी र लुम्बिनी प्रदेशबाट कक्षा ८ देखि १२ सम्मका युवा वैज्ञानिकहरूले सम्मेलनको पहिलो दिनमा उत्साहपूर्वक उपस्थिति जनाए । सम्मेलनमा ३१ विद्यालयका ५६ वटा अनुसन्धान प्रोजेक्टहरूबीच प्रतिस्पर्धात्मक प्रतियोगिता हुँदैछ ।

uniglobe college (2)1676888386.jpg

सम्मेलनमा युवा वैज्ञानिकहरूले इन्जिनियरिङ तथा रोबोटिक्स, जीव विज्ञान, रसायन तथा पर्यावरण विज्ञान, भौतिक विज्ञान, गणित र कम्प्युटर विज्ञानमध्येको (आर्टिफिसियल इन्टेलिजेन्ससमेत) कुनै एक विधामा आफ्नो प्रस्तुति दिएका थिए । हरेक विधामा युवा अनुसन्धाताले आफ्नो अनुसन्धानलाई संक्षिप्त लिखित सारांश, छोटो भिडियो, पोस्टर तथा मौखिक प्रवचनको रूपमा प्रस्तुत गरेका थिए ।

युवा वैज्ञानिकको अनुसन्धान कार्यको नवीनता पुरस्कार तथा पदक लागि छनोटको मुख्य मापदण्ड हुनेछ । यसबाहेक संक्षिप्त लिखित सारांश, छोटो भिडियो, पोस्टर तथा मौखिक प्रवचनको रूपमा अनुसन्धाताले गरेको प्रस्तुतिका आधारमा पनि मूल्यांकन गरिनेछ ।

सम्मेलनका विजेताहरूलाई पाँच विभिन्न विधामा प्रमाणपत्र र पदकसहित सम्मान गरिनेछ । शीर्ष विजेताहरू सन् २०२३ सेप्टेम्बर २७ देखि अक्टोबर १ सम्म मेक्सिकोको सोनोरामा आयोजना हुने १२औँ एसिया प्यासिफिक युवा वैज्ञानिक सम्मेलनमा सहभागी हुनेछन् ।

uniglobe college (3)1676888405.JPG

युनिग्लोब एसएस/कलेजका अध्यक्ष डा. खगेन्द्रप्रसाद ओझाको अध्यक्षतामा हुने समापन समारोहमा विजेताहरूको घोषणा गरिनेछ । कार्यक्रमको समापन समारोहको शोभा बढाउनका निम्ति नेपाल विद्युत् प्राधिकरणका कार्यकारी निर्देशक कुलमान घिसिङ, डा. भगवान् कोइराला र डा.नन्दबहादुर सिंहको समेत उपस्थिति रहनेछ ।

प्रकाशित मिति: सोमबार, फागुन ८, २०७९ १६:०५