माया हराएको सूचना (कविता)

A+ A A-

मायाले मायालाई
पहिलोचोटि नजर जुधाउँदा
सुकेधारामा भेटेको थियो
तातो घाममा चिसो आइसक्रिम
चाट्दैचाट्दै
मायाले मायालाई
आई लभ यु भनेको पनि हो ।

आई लभ यु भनेपछि
माया खुसीले बुरुक्क उफ्रँदै
फुरुक्क परेको पनि हो
त्यसपछि मायाले मायालाई
सिधै मालिगाउँतिर लिएर गएको थियो
हाँडीगाउँको जात्रा छलेर
मायाले मायालाई
गहना पोखरीसम्म सँगै ल्याएको पनि हो ।

गहना पोखरीले गहना सम्झाइदिएपछि
अलिअलि गलफती पनि चलेकै हो
सुकेधाराबाट सँगै आएको माया
गैरीधारामा आइनपुग्दै
कता बेपत्ता भयो कता, बेपत्ता भयो
लौ न मायाको माया हरायो ।

यतिखेर मायालाई ठूलो आपत् परेको छ
अरु कुरा जे-जे भयो-भयो
तपाईंले कतै
मायाको मायालाई देख्नुभएको भए
मायाको तर्फबाट मायालाई
सत्रचोटि आई लभ यु सुनाइदिनुपर्‍यो ।

हिजोआज मायालाई मायाको
सारै झलझल्को लागेको छ
मायालाई भेट्न पाए
मुटुभित्र लुकाउनुजस्तो भएको छ
सपनामा पनि माया कतै नुहाइरहेको देख्छ
त्यही भएर माया
मायालाई खोज्दै
कहिले गैरीधारा पुग्छ,
कहिले बाइसधारा पुग्छ,
कहिले ढुंगेधारा, कहिले धोवीधारा
कतै नभेटिएपछि माया
साह्रै विरक्त भएर सुन्धारामा आइपुग्छ ।

घण्टाघरदेखि माइतीघरसम्म
खोज्दा पनि छैन माया
तारथलीदेखि थापाथलीसम्म
खोज्दा पनि छैन माया ।

ज्ञानेश्वरदेखि बानेश्वरसम्म
खोज्दा पनि छैन माया
नारायणटारदेखि बालुवाटारसम्म
खोज्दा पनि छैन माया
शङ्ख पार्कतिर पनि छैन माया
भूगोल पार्कतिर पनि छैन माया
यतिखेर मायालाई साह्रै आपत् परेको छ
उमेर बासेर, बैँस कराएर
मायाको आँखामा निद्रा हराएको छ ।

अस्तिदेखि हातमा बोकेको
एक थुङ्गो गुलाब
मायाको हातको हातै छ
मायालाई भेट्न पाए
मायाको हातमा हालिदिएर
मायाको मुटुको कुनो भेट्ने गरी
मायालाई एकफेरि आई लभ यु भन्न मन लागेको छ ।
आज यत्रो दिन बितिसक्यो
माया नै हरायो
मायाको घाँटीमा बसेको आई लभ यु
घँटीमै अड्केलाजस्तो भा'को छ
त्यसैले कोही कसैले
मायाको माया भेटेमा भनिदिनू
मायाको घाँटीमा आई लभ यु अड्किएर
हिजोआज किक्लिककिक्लिक परेको छ ।

मायाको मायालाई चिन्नका निम्ति
हुलिया यस्तो छ
मायाको अनुहारलाई हेर्नु भो भने साह्रै सुन्दर छ
एकछिन तपाईंले बोली सुन्नुभो भने
नरिसाउञ्जेल ठीकै बोल्छ
अलिअलि रिसाउन लागेपछि
नेपाली वर्णमाला सबै फलाक्छ
आँखा हेर्नुभो भने
आँखा यस्तो छ
मुखले बोलिरहनै पर्दैन
मायाको आँखाले नै बोली सिध्याउँछ
बानी व्यहोरालाई याद गर्नुपर्‍यो भने
मौका पर्नेबित्तिक्कै
मायाले जतातिर पनि माया लगाइदिन्छ
मायाको ‌ओठमा अर्को कुरा थेगो पनि छ
आफूलाई अलिकति फाइदा आउने देख्यो भने
झुसिलकीरालाई पनि
आई लभ यु बक्साइदिन्छ
हो यही माया हराएको छ ।