गल्ती गर्ने यातायात कार्यालय, दु:ख पाउने सेवाग्राही ? (भिडियो)

A+ A A-

कलंकीका उमेश पाण्डे यातायात व्यवस्था कार्यालय एकान्तकुनाको ‘कोठा नम्बर १’ मा भेटिए । लाइसेन्स नवीकरण गरेर १० महिनापछि लिन जाँदा लाइसेन्स छापिएको त रहेछ तर लाइसेन्समा फोटो नै रहेनछ ।

‘फोटो नभएपछि त धेरै समस्या पर्छ नि । त्यही भएर लाइसेन्स लिएको ठाउँमा के गर्ने भनेर सोधेको, एक नम्बर कोठामा हाकिमसा'बलाई भेट्नुस् भन्नुभयो । त्यसैले यहाँ आएँ,’ पाण्डेले भने ।

सातदोबाटोका करण लामिछानेले लाइसेन्स लिएको २० वर्ष पुग्यो । उनले ५ वर्षअघि नवीकरण गरेर स्मार्ट लाइसेन्स लिए । उनले लाइसेन्समा लेखिएको विवरण राम्रोसँग हेरेका रहेनछन् । योपटक नवीकरण गर्दा सिस्टममा भेरिफाइ नै भएन ।

कागजी लाइसेन्सबाट परिवर्तन गरी स्मार्ट लाइसेन्स लिँदा कार्यालयले लामिछानेको जन्ममिति र ठेगाना फरक पारिदिएको रहेछ । विवरण सच्याउन पुगेका उनी सबै प्रक्रिया पूरा गरेर तोक लगाउनका लागि कार्यालय प्रमुखको पर्खाइमा थिए । ‘मानवीय त्रुटि हुन्छ भन्ने थाहा छ तर यो सच्याउने प्रक्रिया झञ्झटिलो भयो,' लामिछाने भन्छन्, 'सबै प्रक्रिया पुर्‍याएर कार्यालय प्रमुखकोमा तोक लगाउन पर्खेको पनि १ घण्टा भयो ।’

यातायात कार्यालयले यस्ता सानातिना काम तलैबाट सच्याउन मिल्ने व्यवस्था गरिदेओस् भन्ने लामिछानेको सुझाव छ । त्यसो हुन सके सेवाग्राहीले थप सास्ती भोग्नु नपर्ने उनी बताउँछन् ।

ललितपुरका सञ्जीव श्रेष्ठले लाइसेन्स निकालेको ६ महिना भयो । उनले वर्ग थप्न फारम भर्न लाग्दा लाइसेन्स भेरिफाइ भएन । उनको लाइसेन्समा जन्ममिति फरक परेको रहेछ ।

सोही समस्या लिएर यातायात कार्यालय पुगेका श्रेष्ठ पनि ३ घण्टादेखि कार्यालय प्रमुखको पर्खाइमा रहेछन् । ‘यस्तो सानोतिनो समस्या समाधान गर्न आएको पनि ३ घण्टा भइसक्यो । प्रक्रिया अलि सजिलो गरिदिए सबैलाई राम्रो हुन्थ्यो,’ उनले शिलापत्रसँग भने ।

यी तीन जना प्रतिनिधि पात्र मात्र हुन् । यातायात कार्यालयहरूमा यस्तो समस्या बोकेर दैनिक सयौँ सेवाग्राही आउँछन् । कार्यालयले गरेको त्रुटिका कारण आफूहरूले दुःख पाउनुपरेको सेवाग्राहीको गुनासो छ ।

एकातर्फ कार्यालयले गरेको त्रुटिमा आफूहरूले दुःख पाउनुपर्ने र अर्कातर्फ विवरण सच्याउन आउँदा घण्टौँ पर्खनुपर्दा आफूहरूलाई थप समस्या भएको उनीहरू बताउँछन् । यस्ताखाले समस्याहरू छिटो समाधान हुने उपाय खोज्नुपर्ने उनीहरूको सुझाव छ ।

तर, यातायात व्यवस्था कार्यालय भने विभिन्न समयमा भएको सिस्टम परिवर्तनका कारण यस्ता समस्या देखिएको बताउँछन् । यातायात व्यवस्था कार्यालयका अधिकृत (छैटौँ) कृष्ण दाहाल सिस्टम परिवर्तन गर्दा डाटा माइग्रेसनमा प्रणालीगत त्रुटि हुँदा यस्ता समस्या देखिएको बताउँछन् ।

‘यस्ता समस्या २/३ तरिकाले भइरहेको छ । सवारीचालक अनुमतिपत्र पहिले डीएलआरएस सिस्टममा थियो । पछि ईडीएल भीआरएस सिस्टममा आयो । डीएलआरएस सिस्टमबाट ईडीएल भीआरएस सिस्टममा डाटा माइग्रेसन गर्दा प्रणालीगत त्रुटिका कारण कसैको बिग्रिन्छ,’ उनले भने ।

त्यस्तै, ढड्डाबाट सिस्टममा ल्याउँदा टाइप बिग्रिँदा पनि यस्तो समस्या आउने दाहालले बताए । यस्ता मानवीय त्रुटिका कारण समस्या देखिएको उनको भनाइ छ । तर, विकृति फैलिने डरले सच्याउने काममा कार्यालय प्रमुखले नै तोक लगाउनुपर्ने व्यवस्था गरिएको उनको भनाइ छ ।

‘तलैबाट विवरण सच्याउँदा एउटाको लाइसेन्समा अर्काको विवरण हालेर लाइसेन्स दिने विकृति हुने देखियो । यो विकृति शिलापत्रले नै सार्वजनिक गरेको थियो । विकृति रोक्न खोज्दा सेवाग्राहीलाई केही झञ्झट भएको हो । तर, उहाँहरूले पनि झञ्झट मानिदिनुभएन,' उनले भने ।

विवरण सच्याउने 'युजरको एक्सेस' सबैलाई दिँदा विकृति हुन सक्ने देखेर त्यसमा सीमित व्यक्तिको मात्र पहुँच दिएको उनको भनाइ छ । एउटाको विवरणमा अर्कोले लाइसेन्स नपाओस् भनेर यस्तो व्यवस्था गरिएको दाहाल बताउँछन् ।

'सच्याउने भनेको विभागले हो । विभागले एक जना या दुई जनाबाहेक अरुलाई युजर दिँदैन,' दाहालले भने, 'जुन हाम्रो घटना घट्यो, जुन विकृति विसंगतिहरू देखिए त्यसलाई नियन्त्रण गर्न अहिले विभागबाट आधिकारिक व्यक्तिलाई युजर दिएर मात्रै एक जना या दुई जनाले हो सच्याउने, अरुले सच्याउन मिल्दैन । त्यो कारणले गर्दा अलिकति भिडभाड बढेको हो ।'

यसका कारण सेवाग्राहीलाई समस्या परेको उनी पनि स्वीकार्छन् । तर, विकृति नियन्त्रणका लागि आफूहरूले यो कार्य गरेकाले सेवाग्रहीले पनि झञ्झट मानिदिनु नहुने उनको भनाइ छ ।

अर्कातर्फ कर्मचारीको अभावका कारण पनि समस्या भएको उनले बताए । २०७२ सालमा कायम रहेको दरबन्दी अहिलेसम्म पनि कायमै रहेकाले सेवा प्रवाहमा समस्या रहेको उनी स्वीकार्छन् । तर, आफूहरूले सकेसम्म छिटोछरितो सेवा प्रवाहको प्रयास गरिरहेको उनले बताए ।

प्रकाशित मिति: आइतबार, फागुन ७, २०७९ १८:५४