हाइड्रोमा लगानी गरे ३ करोड जनतालाई महिनाको २–३ लाख भत्ता दिएर राख्न सकिन्छ : राज्यमन्त्री सिंह

हाइड्रोमा लगानी गरे ३ करोड जनतालाई महिनाको २–३ लाख भत्ता दिएर राख्न सकिन्छ : राज्यमन्त्री सिंह

A+ A A-

ऊर्जा जलस्रोत तथा सिँचाइ राज्यमन्त्री दीपकबहादुर सिंहले हाइड्रोमा लगानी गरे ३ करोड नेपालीलाई महिनाको २–३ लाख भत्ता दिएर राख्न सकिने बताएका छन् ।

स्वतन्त्र ऊर्जा उत्पदकहरूको संस्था (इप्पान)ले आयोजना गरेको बागमती प्रदेशको दिगो विकासका लागि ऊर्जा नामक अन्तर्क्रियात्मक कार्यक्रममा सिंहले खाडी मुलुक तेल बेचेर विकसित भएको उदाहरण दिँदै नेपालमा हाइड्रोमा लगानी गर्न सके मुलुक सम्पन्न हुने र जनतालाई महिनाकै २–३ लाख दिएर आनन्दसँग राख्न सकिने बताए ।

उनले ऊर्जा व्यवसायीलाई हाइड्रोमा लगानी बढाउन आग्रह गर्दै सरकार सघाउन तयार रहेको बताए । ‘हामी काम गर्ने प्रण गरेर सरकारमा गएका हौँ । काम गरेर देखाउँछौँ । हाइड्रोमा लगानी बढाउन जस्तोसुकै सहयोग गर्न तयार छौँ,’ सिंहले भने । मुलुकलाई व्यापारघाटाको दलदलबाट बाहिर निकाल्ने एक मात्र सूत्र जलविद्युत् मात्र रहेको उनले बताए ।

‘निजीक्षेत्र, स्थानीय निकाय, प्रदेश सरकार र संघीय सरकार मिलेर हाइड्रोमा काम गर्न सके समृद्धि टाढा छैन,’ उनले भने ।

देशको सबैभन्दा धेरै पैसा डिजेल र पेट्रोलमार्फत ऊर्जामै खर्च हुने भएकाले त्यो खर्च घटाउने एक मात्र विकल्प जलविद्युत् भएको बागमती प्रदेशका खानेपानी, सिँचाइ तथा ऊर्जामन्त्री उद्धव थापाले बताए । अरब मुलुकले जस्तो सुख पाउनु छ भने हाइड्रोमा लगानी र बिजुलीको प्रयोग बढाउनुपर्ने उनले बताए ।

‘सरकारले एउटा ग्यास सिलिन्डरमा ५०० अनुदान दिनुभन्दा बिजुलीको प्रयोग बढाउन प्रोत्साहन गर्नुपर्छ । यसले खर्च पनि कम गर्छ, खतरा पनि कम हुन्छ । बिजुलीको प्रयोग बढाउन मैले हाम्रो प्रदेशका मठ, मन्दिरलाई रातभरि झिलीमिली बनाउने सोचमा छु,’ उनले भने ।

विगत ४ वर्षदेखि रोकिएको विद्युत् खरिदबिक्री सम्झौता (पीपीए) खुल्दा विद्युत् उत्पादकहरू उत्साहित बनेको इप्पानका अध्यक्ष कृष्णप्रसाद आचार्यले बताए ।

नेपालमा विद्युतीय ऊर्जाबिना कुनै पनि विकास असम्भव नभएको उनले स्पष्ट पारे । ‘प्रकृतिले हामीलाई धनी बनाएको छ तर त्यो धन हामीले प्रयोग गर्न सकेका छैनौँ । हामीले प्रयोग गरेको ऊर्जामा ५ प्रतिशत हिस्सा मात्र विद्युत्‌को छ,’ उनले भने ।

विद्युत् उत्पादन गर्न नीतिगत झन्झट भएकाले व्यवसायीलाई समस्या परेको इप्पानका कर्यसमिति सदस्य प्रकाश दुलालले बताए । ‘पहिलो कुरा त नेपाल विद्युत् प्राधिकरणले वर्षामा हाम्रो विद्युत् किन्दैन । त्यस्तै प्रसारण लाइन बनाउन स्थानीयको समस्या छ । लगानीमैत्री वातावरण छैन । सरकारले यी समस्याको समाधान गरिदेओस् भन्ने हाम्रो आग्रह हो,’ उनले भने ।

हाइड्रोबाट विदेशी मुद्रा आर्जन गर्ने मात्र नभई विदेशी लगनी भित्र्याउन पनि सकिने योजना आयोग, बगमती प्रदेशका उपाध्यक्ष डा होमनाथ चालिसेले बताए ।

हाइड्रोमा लगानी र समय धेरै लाग्ने भएकाले बिजुलीको प्रयोग व्यापक बढाउनुपर्ने विद्युत् विकास विभागका उपमहानिर्देशक सञ्जय ढुङ्गेलले बताए ।

प्रकाशित मिति: बिहीबार, फागुन ४, २०७९ १७:३१