‘जनयुद्ध’ दिवसका नाममा सार्वजनिक बिदा दिएको भन्दै विरोध प्रदर्शन (फोटो फिचर)

‘जनयुद्ध’ दिवसका नाममा सार्वजनिक बिदा दिएको भन्दै विरोध प्रदर्शन (फोटो फिचर)

A+ A A-

सरकारले फागुन १ गतेलाई 'जनयुद्ध' दिवसका नाममा सार्वजनिक बिदा दिएकोप्रति विरोध प्रदर्शन भएको छ । सरकारले 'जनयुद्ध' दिवस भन्दै सोमबार सार्वजनिक बिदा दिएकोप्रति द्वन्द्वपीडित समुदाय र नागरिक समाजले विरोध प्रदर्शन गरेका हुन् ।

काठमाडौं जिल्ला अदालत अगाडि भेला भएर नागरिक समाज, मानवअधिकारवादी संघसंस्थासँग आवद्ध व्यक्ति र द्वन्द्वपीडितहरूले सरकारको निर्णयको विरोध गरेका हुन् । उनीहरूले 'जनयुद्ध' दिवसका नाममा दिइएको सार्वजनिक बिदा खारेज गर्नुपर्ने र द्वन्द्वपीडितलाई न्याय दिनुपर्ने माग राखेका छन् ।

फागुन १ गते नेपाल र नेपालीका लागि कालो दिनका रूपमा रहेको उनीहरूले टिप्पणी गरेका छन् । विरोध प्रदर्शन कार्यक्रममा सञ्चारकर्मीहरूसँग कुराकानी गर्दै मानवअधिकारवादी सुशील प्याकुरेलले 'जनयुद्ध' दिवस भनेर बिदा दिनु ज्यादती भएको बताए । उनले प्रधानमन्त्री पुष्पकमल दाहाल प्रचण्डले 'जनयुद्ध' दिवसको बिदा दिँदा पनि अन्य लोकतान्त्रिक भनिने पार्टीहरू नबोलको भन्दै लोकतान्त्रिक पार्टीहरूको निरीहता दिवसका रूपमा मनाउनुपर्ने टिप्पणी गरे ।

मानवअधिकारवादी चरण प्रसाईंले वर्तमान सरकार पीडितको पक्षमा नभई पीडकको पक्षमा उभिएको बताए । उनले हत्या, हिंसा गरेको दिनलाई दिवसका रूपमा मनाउनु नाजायज भएको भन्दै आफूहरूले त्यसको घोर विरोध गरेको बताए । त्यस्तै, अर्का मानवअधिकारवादी महामुनिश्वर आचार्यले फागुन १ गतेलाई 'जनयुद्ध' दिवसको रूपमा स्वीकार्न नसकिने बताए । उनले 'जनयुद्ध' नभई सशस्त्र हिंसात्मक विद्रोह भएको बताए ।

द्वन्द्वपीडित परिवारले आफूहरूले अझै न्याय नपाएको बताएका छन् । 'जनयुद्ध'को नाममा भएको युद्धमा अझै पनि हजारौँ बेपत्ता भएको भन्दै उनीहरूको खोजी सरकारले नगरेको बताएका छन् । विरोध प्रदर्शनका क्रममा द्वन्द्वपीडितलाई ‘न्याय दे’, ‘बेपत्ता आन्दोलन जारी छ’, ‘अदालतको फैसला लागू गर’, ‘दण्डहिनताको अन्त्य गर’, ‘हुकुमी शासन बन्द गर’, ‘लुटिएको सम्पत्ति फिर्ता गर’, ‘हत्यारालाई फाँसी दे’लगायतका नाराबाजीसमेत गरिएकाे थियाे ।