सुदूरपश्चिमका सरकारी अस्पतालमा चिकित्सकको अभावले सेवा प्रभावित

A+ A A-

कर्मचारी समायोजनपछि सुदूरपश्चिम प्रदेशभरका ठूला सरकारी अस्पतालमा चिकित्सकको अभाव देखिन थालेको छ ।

समायोजनपछि स्वास्थ्य मन्त्रालयले चिकित्सकको पदस्थापन गरेसँगै सुदूरपश्चिमका सरकारी अस्पतालको उपचार सेवा नै प्रभावित हुने अवस्था आएको छ । विशेषज्ञ चिकित्सकको अभाव हुँदा विरामी उपचारका लागि भारत जान बाध्य भएको छन्।

सामान्य उपचारका लागि पनि विरामीहरु भारतका अस्पतालको भर पर्नुपरेको छ । सुदूरपश्चिम प्रदेशबाट ११ जना विशेषज्ञ चिकित्सकको अन्य प्रदेशमा पदस्थापन भएपनि अन्यत्रबाट एक जना मात्रै विशेषज्ञ चिकित्सकको पदस्थापन हुने सूचि प्रकाशित भएको छ । प्रदेशकै सबैभन्दा ठुलो डडेल्धुरा अस्पताल डडेल्धुरामा विशेषज्ञ डाक्टरको दरबन्दी भएपनि सबै रिक्त छ।

यस अस्पतालमा १९ जना विशेषज्ञ चिकित्सकको दरबन्दी रहेकोमा १३ जना मात्र मेडिकल अफिसर थिए। तरसमायोजनपछि दरबन्दीका तीन जना मेडिकल अफिसर र २ जना करारमा रहेका चिकित्सक मात्र रहेको अस्पतालको मेसुको जिम्मेवारी पाएका डाक्टर जीतेन्द्र कंडेलले जानकारी दिए।

‘भएका चिकित्सक समायोजन पछि गइँसके, अस्पताल सञ्चालन गर्न नै मुस्किल भएको छ’ उनले दुखेसो पोखे, ’अब त अल्ट्रासाउण्ड र अपरेशन थिएटरको सेवा नै ठप्प होला जस्तो छ।

त्यस्तै प्रदेश मातहतका रहेका सेती अस्पताल र महाकाली अस्पतालमा पनि ९ औँ तहभन्दा माथिका अर्थात विशेषज्ञ डाक्टरहरु समायोजनपछि प्रदेश बाहिरका अस्पताल गएका छन् । समायोजनपछि सेती अस्पतालमा अब तीन जना विशेषज्ञ डाक्टर मात्रै छन् । सोही क्रममा सेती अस्पतालमा नाक, कान र घाँटी (इएनटी) उपचार सेवा ठप्प भइसकेको छ ।

अस्पतालमा नाक कान घाँटी विभाग हेर्दै आएका डा. अशोक श्रीपाईलीको भेरी अस्पतालमा पदस्थापन भएपछि साउन १५ गतेदेखि नै उक्त विभाग बन्द अवस्थामा रहेको छ। उता महाकाली अस्पतालमा भने तीन जना विशेषज्ञ डाक्टर कार्यरत रहेकोमा दुई जनाको प्रदेश बाहिरका अस्पतालमा पदस्थापन सेवा संचालनमै मुस्किल भइरहेको अस्पतालका मेडिकल सुपरिटेन्डेन्ट डा. हरिकुमार श्रेष्ठले बताउँछन्।

त्यस्तै कर्मचारी समायोजन भएसंगै जिल्ला अस्पताल बैतडी पनि चिकित्सक विहिन हुने भएको छ। अस्पतालका प्रमुख डा. जगदीशचन्द्र बिष्टको संघमा समायोजन भएपछि जिल्ला अस्पताल चिकित्सविहिन हुने अवस्थामा पुगेको हो।

दुईजना करारका मेडिकल अधिकृतको पनि समयावधि सकिन लागेको र आफ्नो पनि संघमा समायोजन हुनेभएपछि जिल्ला अस्पतालमा समस्या आउने डा. बिष्टले बताए । करिब एक बर्ष यता जिल्ला अस्पतालमा दरबन्दीका स्टाफ नर्स छैनन्। तीनजना स्टाफ नर्सको दरबन्दी भएपनि पदपूर्ती नहुँदा करारमा राखेर काम सञ्चालन गर्नुपरिरहेको डा. बिष्टले बताए।

सुदूरपश्चिम प्रदेशको सामाजिक विकास मन्त्रालयका सचिव गोगनवहादुर हमालले अर्को विकल्प नहुँदासम्म यस क्षेत्रबाट अन्यत्र डाक्टर नलैजान स्वास्थ्य मन्त्रालयलाई आग्रह गरिएको बताए। चिकित्सकहरुको समायोजनपछि सामान्य सेवाका लागि पनि अन्यत्र धाउनुपर्ने बाध्यता आउन सक्ने सम्भावना बढेको भन्दै यहाँका स्थानीय चिन्तित बनेका छन्।

प्रकाशित मिति: बिहीबार, भदौ ५, २०७६ १८:४९