पाँचौँ वर्षमा शिलापत्र– निष्पक्ष र निर्भीक पत्रकारिताप्रति दृढता

A+ A A-

व्यावसायिक पत्रकारिताका चार वर्ष सफलतापूर्वक पूरा गरी शिलापत्र डट कम आजदेखि पाँचौँ वर्षमा प्रवेश गरेको छ । यस उपलक्ष्यमा हामी हाम्रा समस्त पाठक, दर्शक तथा शुभचिन्तकसँग खुसी साट्न चाहन्छौँ ।

बितेका चार वर्ष हाम्रा लागि उत्साहप्रद रहे । सँगै, चुनौतीले पनि पछ्याइरह्यो । खासगरी, कोभिड १९ को विश्वव्यापी महामारी र त्यसले उत्पन्न गरेको मानवीय संकटले बितेका दुई वर्ष आमजनजीवन अस्तव्यस्त रह्यो । अर्थतन्त्र संकटोन्मुख बन्यो, जुन अहिले पनि कायमै छ । यस्ता तमाम बाधा र चुनौतीलाई पन्छाउँदै शिलापत्र अघि बढिरहेको छ ।

हामी निष्पक्ष र निर्भीक पत्रकारिताप्रति दृढ छौँ । सत्य, तथ्य, निष्पक्षसँगै विश्वसनीय एवं सन्तुलित समाचार सामग्री पस्किएर व्यावसायिक पत्रकारितामा टेवा पुर्‍याउने हाम्रो लक्ष्य हो । त्यसैले ताजा समाचार, विविध विचार र वस्तुनिष्ठ विश्लेषणमा हाम्रो जोड छ ।

पछिल्लो समय अनलाइन पत्रकारिता आमसञ्चारको मूलप्रवाह बनिसकेको छ । त्यसैले अबको युग अनलाइन पत्रकारिताकै हो । अक्षर, श्रव्य–दृश्यसहितका मल्टिमिडिया सामग्रीप्रति आमपाठकको रुचि र आकर्षण बढ्दै गइरहेको छ । शिलापत्र अहिले गहन एवं खोजपूर्ण रिपोर्टिङका साथै स्तरीय मल्टिमिडिया सामग्रीमार्फत अनलाइन पत्रकारितालाई नयाँ उचाइमा लैजाने प्रयत्न गर्दैछ ।

विगतमा कोभिड महामारीले उत्पन्न आमनिराशामा पनि आशाका किरण खोज्न शृंखलाबद्ध रूपमा ‘आशाका आधारशिला’ रिपोर्टहरू प्रस्तुत गर्‍यौँ । कृषिक्षेत्रमा युवालाई आकर्षित गर्न ‘कृषि ज्ञान’ मार्फत कृषि व्यवसाय र सफल व्यवसायीबारे सामग्रीहरू दियौँ । 'शिलापत्र उत्खनन'देखि फोटोकारसम्मका स्टोरी पस्कियौँ । पाठकले रुचाएका यी स्तम्भलाई निरन्तरता दिँदै थप विशिष्टिकृत सामग्रीमा हाम्रो जोड रहनेछ । शिलापत्रले राजनीति र अर्थतन्त्रसँगै अब शिक्षा, उद्यमशीलता, स्वास्थ्य, कृषि, पर्यटन तथा श्रम–रोजगारीजस्ता आमसरोकारका मुद्दालाई समेत प्राथमिकतामा राख्नेछ ।

लामो द्वन्द्व र राजनीतिक अस्थिरतापछि मुलुक अहिले संघीय लोकतान्त्रिक गणतन्त्रलाई संस्थागत गर्ने चरणमा छ । यसबीचमा पनि सत्तास्वार्थमा संविधान, लोकतन्त्र र प्रेस स्वतन्त्रतामाथि बलमिच्याइँका प्रयत्न भइरहेका छन् ।

लोकतन्त्र र प्रेस स्वतन्त्रतामाथि कुनै पनि नाममा लगाउन खोजिएको अंकुशविरुद्ध शिलापत्र दृढताका साथ उभिन्छ ।

संघीयता कार्यान्वयनको पहिलो पाँच वर्ष पूरा हुँदा नहुँदै सिंगो संरचनामाथि नै प्रश्न उठ्न थालेका छन् । खासगरी, प्रदेश संरचनाको औचित्यमाथि प्रश्न गर्दै खारेजको माग गर्न थालिएको छ । कार्यान्वयनमा गएको पाँचै वर्षमा कुनै संरचना असफल भयो भन्न मिल्दैन । बरु, त्यसमाथि वैचारिक मन्थन गर्न जरुरी छ । त्यो वैचारिक मन्थनलाई सघाउने गरी शिलापत्रले पाँचौँ वार्षिकोत्सवको अवसरमा प्रदेशकेन्द्रित विशेष सामग्री प्रस्तुत गरेको छ ।

हाम्रो न्युजरुम, मार्केटिङ, प्रशासनलगायत विभागमा रहेका सहकर्मी साथीहरू, हाम्रा विज्ञापनदाता, शुभेच्छुक संस्थाहरूप्रति हृदयदेखि नै कृतज्ञता प्रकट गर्न चाहन्छौँ । यो सहकार्यले निरन्तरता पाइरहोस् । सँगसँगै, हामी रचनात्मक आलोचनालाई पनि स्वागत गर्न चाहन्छौँ । सबैको उत्प्रेरणाले असल पत्रकारिता प्रवर्द्धन गर्न सकिन्छ भन्ने हामी ठान्दछौँ । त्यसले नै व्यावसायिक सञ्चारगृहका रूपमा शिलापत्रले लामो दूरीको यात्रा तय गर्न सक्छ भन्ने हाम्रो विश्वास छ ।

हार्दिक धन्यवाद र शुभेच्छासहित ।

सुरेश सिंखडा
अध्यक्ष, शिलापत्र मिडिया नेटवर्क

प्रकाशित मिति: शुक्रबार, माघ २७, २०७९ ०६:२२