रविको आवेगपूर्ण अभिव्यक्तिले तातियाे सामाजिक सञ्जाल, के भन्दैछन् पत्रकार ?

रविको आवेगपूर्ण अभिव्यक्तिले तातियाे सामाजिक सञ्जाल, के भन्दैछन् पत्रकार ?

A+ A A-

राष्ट्रिय स्वतन्त्र पार्टी (रास्वपा)का सभापति तथा पूर्वपत्रकार रवि लामिछाने नेपाली मिडियामाथि खनिएपछि अहिले धेरै पत्रकारहरू उनको पक्ष र विपक्षमा बहस गरिरहेका छन् । केहीले उनको भनाइमा सहमति जनाएका छन् भने कतिपयले विरोध र केहीले मजाक उडाएका छन् । रविले पत्रकार सम्मेलनमा बोलेका कुरामा आम मानिसमात्रै नभएर पत्रकारका फेसबुक वालसमेत भरिएका छन् ।

आइतबार सरकारबाट बाहिरिने निर्णयबारे जानकारी दिन आयाेजित पत्रकार सम्मेलनमा लामिछानेले नेपाली मिडियाप्रति चरम असन्तुष्टि पोखेका थिए । उनले धेरै मिडियाको नाम नै लिएर आफ्नो आक्रोश पोखे । रविकाे अभिव्यक्तिले पत्रकारहरू पनि आक्राेशित भएका छन् ।

‘हाम्रो पत्रकारिता नै हो जसले लोकतन्त्र धानेको छ । यस्तो उन्नत मिडियाका जुम्रा हुन् रवि लामिछाने । जुम्राले रगत चुस्ने हो, चुस्न नपाए रविलेझैँ गर्ने हो', कञ्चनपुरका पत्रकार खेम भण्डारी लेख्छन् । अर्का पत्रकार प्रकाश पार्की लेख्छन्, ‘पत्रकार हुँदा नेतालाई गाली गरे, अहिले आफू नेता भएपछि पत्रकारलाई गाली गर्दैछन् भौमान ।'

रविले १२ भाइ सम्पादकले चौतर्फी प्रहार गरे भन्दै केही मिडिया र सम्पादकको नाम लिँदै क्षमता भए आफूविरुद्ध चितवनमा चुनाव लड्न आउन चुनौति पनि दिए । बझाङका पत्रकार मकरराज धामी लेख्छन्, ‘कसम पत्रकारिताको धर्म यही हो । जहाँ आफ्नै विरोध हुँदा पनि लाइभ चलिरहेको थियो ।'

उनले थपेका छन्, 'हाे नेपाली मिडियामा बेथिति छ । तर रविको शैली ठीक छैन ।' कञ्चनपुरकी पत्रकार ऐश्वर्या कुँवर लेख्छिन्, 'निवर्तमान गृहमन्त्री र उपप्रधानमन्त्री रवि लामिछानेजी हिजो तपाईं मिडियामा हुँदा १२ भाइका काण्डमा किन मौन बस्नुभएकाे ? अनि पद जाँदा भुभुभुभु किन ? भागवण्डा नमिलेर हो कि?'

'पत्रकारितामा हुँदा सरकारको विरोध, सरकारमा हुँदा पत्रकारिताको विरोध धरातल बिस्रेपछि यस्तै हो', बाजुराकी पत्रकार संगिता तिमिल्सिनाले लेखेकी छन् । कैलालीकी पत्रकार रमा चन्दले ‘रवि लामिछानेको सबै कुरा ठीक तर उनले यो कुरा आज आएर भन्दा उनी ठीक होइनन्', लेखेकी छन् ।

'२ सय ४० वर्ष शासन गरेको राजतन्त्र अन्त हुँदा कसैलाई आरोप तथा तुच्छ नबोलर बाहिरिएको इतिहास छ । तर अहिले राजनीतिक दलहरू भने सत्तामा हुँदा सबै राम्रो सत्ता बाहिर हुँदा पुरै पो...!',बाजुराका पत्रकार प्रकाश सिंहले लेखेका छन् । कञ्चनपुरका पत्रकार राजेन्द्र नाथ लेख्छन्, 'यक्ष प्रश्न रविको । १२ भाइदेखि समग्रमा यो विषयलाई विषयान्तर नगरौँ । वास्तविकता के हो ? को कहाँबाट कसरी परिचालित छ ? आत्म मूल्याङ्कन र समीक्षा जरुरी छ ।'

कैलालीका पत्रकार तेजराज भट्ट भन्छन्, ‘रवि लामिछानेले आफूले विगतमा के गरे बहसको विषय होला । तर नेपाली मिडियाका बारेमा बोलेका कतिपय कुरा धेरै हदसम्म यथार्थपरक र जायज छन् ।' अछामका पत्रकार तपेन्द्र कुँवर लेख्छन्, 'एउटा कुरा चाहिँ रविले सही बोले । काठमाडौंमा त थाहा भएन मोफसलमा पनि पत्रकारितालाई माध्यम बनाएर धम्क्याउने, थर्काउने जुन अभियान सुरु भएको छ त्यसको अन्य भएको छ ।'

कैलालीका पत्रकार अंकुश कुँवरले यस्तो लेखेका छन्, ‘आफूले भनेअनुसार नभएपछि रवि आक्रोशित हुनु आफ्नो ठाउँमा होला । तर पत्रकारिताका बारेमा जे बोले सही बोले ।' कैलालीका पत्रकार दीपक उपाध्याय भन्छन्, 'सत्य सुरुमा तितो लाग्छ । रविले आज जे बोले त्यो बेथितिविरुद्ध बोलेको हो । कमसेकम कसैले त केही बोल्यो ।'

काठमाडौंमा कार्यरत पत्रकार गीता चिमोरियाले लेखेकी छन्, 'रवि लामिछानेले पत्रकारिता सिकाउने दिन आए । हाय ! यही दिन देख्न बाँकी थियो ।'

यस्तै कान्तिपुरमा कार्यरत पत्रकार कौशल काफ्लेले आफ्नो फेसबुक वालमा यस्तो लेखेका छन्, 'रविले मिडियालाई भन्नु/नभन्नु भने ! सम्पादकहरूलाई नै अनेक खालका आरोप लगाए । ’सम्पादक्नी भाउजू’लाई दाइको मेसेजबक्स चेक गर्न भन्दै अर्काको व्यक्तिगत जीवनबारे पोल खोलिदिने कुरो गरे ! खै केके जातीको कट्टु/सट्टु नि भने ! ठीकै छ, उनले आफ्नो हैसियतअनुसारको भाषा चयन गरे। तर बिर्सन नहुने कुरा के हो भने रविले कान्तिपुरलाई गाली गरिरहँदा त्यही कान्तिपुरले उनको कुरा ’लाइभ’ गरिराखेको थियो । त्यही सेतोपाटी र अनलाइन खबरले प्रत्यक्ष प्रसारण काटेका थिएनन् । बाह्रखरी, रातोपाटी अनि शिलापत्रलगायत अरु मिडियामा पनि रविकै गाली/कुण्ठा बजिरहेका थिए । आफैँले गाली खाइरहँदा पनि सम्पादकहरूले उनको कुरो पब्लिकमा पुग्नुहुन्न भनेनन् । यसले पनि धेरै कुरा बुझाउला– मिडिया के हो, के मात्र हैन भनेर...! अनि रवि लामिछानेले बुझ्नुपर्ने कुरो, समाचारमा असन्तुष्टि भए उजुरी गर्न प्रेस काउन्सिलमा जाने हो । त्यसको पनि प्रक्रिया छ। त्यसै बर्बराएर मात्र हुन्न । हुन त उनको लागि प्रक्रिया/सक्रिया– छु मतलब । बाहिर आयो, भावुक कुरो गर्‍याे, मान्छे उचाल्यो– सक्किगो । यो भन्दा केटाकेटी पारा अरु के हुन्छ ?'

पत्रकार भानुभक्त आर्चाय लेख्छन्, 'पहिले सिधा कुरा प्रधानमन्त्रीसँग । त्यसपछि सिधा कुरा जनतासँग । अहिले सिधा कुरा १२ भाइसँग ।'

तस्वीरहरू: सुशील श्रेष्ठ/शिलापत्र

प्रकाशित मिति: सोमबार, माघ २३, २०७९ ०८:४९