संघीय सरकारले कटौती गर्‍यो मधेस सरकारको ४ अर्ब बजेट

A+ A A-

संघीय सरकारले मधेस प्रदेश सरकारलाई दिने ससर्त तर्फको ४ अर्ब बजेट कटौती गरेको छ ।

मधेस प्रदेश सरकारको चालु आर्थिक वर्ष २०७९/८० मा कुल ४६ अर्ब ८८ करोड ९ लाख ४६ हजार बजेट छ । चालुतर्फ २१ अर्ब ७६ करोड ६७ लाख ९५ हजार अर्थात कुल बजेटको ४६ दशमल ४४ प्रतिशत र पुँजीगततर्फ २५ अर्ब ८२ करोड २० लाख ८० हजार अर्थात् ५३ दशमल २१ प्रतिशत रकम छुट्याएको छ ।

तर, संघीय सरकारले ससर्ततर्फको ४ अर्ब रकम कटौती गरेपछि प्रदेश सरकारको बजेट ४२ अर्ब ८८ करोड ९ लाख ४६ हजार मात्रै हुनु पुगेको प्रदेशको अर्थ मन्त्रालयका सचिव गजेन्द्र ठाकुरले जानकारी दिए ।

चालु आर्थिक वर्षको बजेटमा ससर्त योजनाको लागि संघीय सरकारले १० अर्ब ६ करोड ५१ लाख अनुदानमा दिने भनेर स्रोत उल्लेख गरिएको थियो । तर, मुलुकमा आर्थिक मन्दी तथा राजस्व संकलनमा समस्या देखिएपछि संघीय सरकारले मधेस प्रदेशको ४ अर्ब बजेट कटौती गरेको ठाकुरले बताए ।

प्रदेश कोष तथा लेखा नियन्त्रक कार्यालयका अनुसार पुस मसान्तसम्म प्रदेश सरकारले कुल बजेटको झण्डै ११ प्रतिशत रकम खर्च गरेको छ । चालुतर्फ ११ दशमलव ७२ प्रतिशत र पुँजिगत तर्फ १० दशमलव २४ प्रतिशत बजेट खर्च भएको प्रदेश कोष लेखा नियन्त्रक कार्यालयले जनाएको छ ।

यसैबीच, संघीय सरकारले समयमा आवश्यक बजेट निकासा नदिँदा प्रदेश सरकारको कामकाज समेत प्रभावित भएको अधिकारीहरूले बताएका छन् । अहिलेसम्म दोस्रो चौमासिकको बजेट आउनुपर्नेमा केही दिनअघि पहिलो चौमासिकको बजेट पठाएको ठाकुरले बताए ।

चालु आर्थिक वर्षमा संघीय सरकारले राजस्व बाँडफाँट, समानीकरण अनुदान, विशेष अनुदान, समपुरक अनुदान तथा ससर्तलगायतका विभिन्न शीर्षकमा २६ अर्ब रुपैयाँ प्रदेश सरकारले पाउने छ । तर, चालु आर्थिक वर्षको ६ महिनाभन्दा बढी समय बितिसक्दा पनि अहिलेसम्म ६ अर्व रुपैयाँ मात्रै प्रदेश सरकारलाई उपलब्ध गराइएको ठाकुरले बताए ।

संघीय सरकारले तोकिएको समयमा बजेट उपलब्ध नगराउदाँ प्रदेश सरकारको योजना कार्यान्वयमा ढिलाइ हुने गरेको उनी बताउँछन् ।

प्रकाशित मिति: बिहीबार, माघ १९, २०७९ २१:१५