यी हुन् सांसदले पालना गर्नुपर्ने १० नियम

A+ A A-

संसद् भवन बानेश्वरमा नयाँ सांसदहरूका लागि ‘संसदीय प्रक्रिया र अभ्याससम्बन्धी अभिमुखीकरण कार्यक्रम’ चलिरहेको छ । बिहीबारदेखि सुरु भएको यो कार्यक्रम शुक्रबारसम्म चल्नेछ ।

बिहीबारको अभिमुखीकरण कार्यक्रममा तीनवटा सेसन भए । पहिलो सेसनमा संविधानसभा अध्यक्ष एवं प्रतिनिधिसभा सदस्य सुवासचन्द्र नेम्वाङले संसदीय मर्यादा र सांसदको भूमिका विषयमा प्रस्तुति दिए । उनले समग्रमा संसद्‌को काम कारबाही र कानुनी पाटोमा प्रस्तुति दिए ।

दोस्रो सेसनमा पूर्वउपसभामुख पुष्पा भुसालले संसदीय प्रक्रिया र अभ्यासका बारेमा प्रस्तुति दिइन् । सभाको शून्य समय र विशेष समयको उपयोग, प्रश्नोत्तर कार्यक्रम, सभामा प्रस्तुत हुने विषयहरू संसदीय सुनुवाइ, अन्तर्राष्ट्रिय सन्धि सम्झौता अनुमोदन र सुनुवाइ निर्णय गर्ने प्रक्रियालगायतका विषयवस्तु उनले समेटिन् ।

तेस्रो सेसनमा संविधानसभा सदस्य तथा वरिष्ठ अधिवक्ता खिमलाल देवकोटाले संसदीय समिति प्रणाली, अभ्यास र संसदीय निगरानी विषयमा प्रस्तुति दिए । उनले सैद्धान्तिक पक्ष, कार्यक्षेत्र र अभ्यास, समिति र संसद्‌को अन्तर्सम्बन्ध, समितिको निर्देशन र प्रभावकारिता, संसदीय अनुगमनको विषयमा प्रस्तुति दिए ।

शुक्रबार चारवटा सेसन चल्ने संसद् सचिवालयका प्रवक्ता एकराम गिरीले जानकारी दिए । उनका अनुसार शुक्रबार पहिलो सेसनमा पूर्वअर्थमन्त्री युवराज खतिवडाले योजना तर्जुमा, बजेट निर्माण प्रक्रिया, आर्थिक कार्यविधि र संसदीय भूमिकाका बारेमा प्रस्तुति दिनेछन् ।

दोस्रो सेसनमा कानुन आयोगका पूर्वअध्यक्ष माधव पौडेलले कानुन निर्माणका प्रक्रियाका बारेमा प्रस्तुति दिनेछन् ।

त्यस्तै, नीति अनुसन्धान प्रतिष्ठानका कार्यकारी अध्यक्ष विष्णुराज उप्रेतीले सार्वजनिक नीति र निर्देशनका सम्बन्धनमा प्रस्तुति दिनेछन् ।

संसद् सचिवालयका सचिव रोजनाथ पाण्डेले सचिवालयको सांगठनिक संरचना र सेवा प्रवाहको सम्बन्धमा प्रस्तुति दिने तालिका छ ।

प्रतिनिधिसभा २०७९ को नियमावली बनाउन मस्यौदा समिति गठन भई समितिले आफ्नो काम गरिरहेको छ ।

प्रतिनिधिसभा नियमावली २०७५ को नियम २० अनुसार सांसदहरूले पालना गर्नुपर्ने १० नियमहरूः

(क) सभामुख बैठक कक्षमा प्रवेश गर्दा सबैले उठेर सम्मान प्रकट गर्नुपर्ने,
(ख) सभामुखले बैठकप्रति सम्मान प्रकट गरी आफ्नो आसन ग्रहण गर्नुपर्ने,
(ग) बैठक स्थगित भई सभामुख बैठकबाट बाहिर निस्केपछि मात्र सदस्यले बैठक कक्ष छाड्नुपर्ने,
(घ) सभामुखले समय दिएपछि मात्र बोल्नुपर्ने,
(ङ) बैठकमा भाग लिने सदस्यले बोल्दा सभामुखलाई सम्बोधन गरेर बोल्नुपर्ने र सभामुखले अन्यथा आदेश दिएमा बाहेक उभिएर बोल्नुपर्ने,
(च) सभामुखले बैठकलाई सम्बोधन गरिरहेको समयमा कुनै पनि सदस्यले स्थान छाड्न नहुने र सभामुखले बोलेको कुरा ध्यानपूर्वक सुन्नुपर्ने,
(छ) सभामुखको आसन तथा बोलिरहेको सदस्यको बीचबाट हिँड्न र सभामुखको आसनतर्फ पिठ्युँ फर्काएर बस्न नहुने,
(ज) कुनै सदस्यले बोलिरहेको समयमा बाधा पुग्ने वा बैठकको मर्यादा भंग हुने वा अव्यवस्था उत्पन्न हुने कुनै काम गर्न नहुने,
(झ) बैठकको कार्यसँग प्रत्यक्ष रूपले सम्बन्धित विषयबाहेक अन्य विषयको पुस्तक, समाचारपत्र वा अन्य कागजपत्र पढ्न नहुने, र
(ञ) बैठक कक्षमा फोनमा कुरा गर्न र रेकर्ड गर्न नहुने ।

प्रकाशित मिति: बिहीबार, माघ १९, २०७९ १८:१८