ईभीमा आक्रामक बन्दै चौधरी ग्रुप, सस्तो विद्युतीय ट्याक्सी ल्याउँदै

A+ A A-

सीजी मोटर्सले विद्युतीय ट्याक्सी ल्याउने भएको छ । श्रम, रोजगार तथा यातायात मन्त्रालयले २० वर्ष पुराना ट्याक्सी, नीलो माइक्रो तथा ट्याम्पुको सट्टाभर्ना गर्दा विद्युतीय ट्याक्सी अनिवार्य गरेपछि कम्पनीले विद्युतीय ट्याक्सीमा चासो देखाएको हो ।

हाल नेपालमा उपलब्ध विद्युतीय गाडी महँगो भएकाले सस्तो र ट्याक्सीका लागि छुट्टै ब्रान्ड ल्याउन लागिएको जनाइएको छ । कम्पनीले अबको २/३ महिनाभित्रै धेरैमा २५ लाखसम्म पर्ने गाडी ल्याउन लागेको हो ।

सीजी मोर्टसले चिनियाँ कम्पनी होजोनले उत्पादन गरेको नेटा भी क्रसओभर नेपाल ल्याएर विद्युतीय सवारीसाधन बिक्री वितरण सुरु गरेको थियो । कम्पनीले त्यसपछि भारतीय दुई पाङ्ग्रे ओला इलेक्ट्रिक स्कुटर नेपाली बजारमा ल्यायो ।

सीजी मोटर्सले अब ल्याउन लागेको इलेक्ट्रिक ट्याक्सीको ब्रान्ड, स्पेसिफिकेसन र मूल्य भने गोप्य नै राखेको छ ।

यस्तो छ मन्त्रालयले बनाएको विद्युतीय ट्याक्सीको मापदण्ड

श्रम, रोजगार तथा यातायात मन्त्रालय, बागमतीले सट्टाभर्ना हुने ट्याक्सीलाई साधारण र विशेष प्रकृतिका गरी दुई प्रकारको स्पेसिफिकेसन बनाएको छ ।

साधारण ट्याक्सी ५ सिट क्षमता, अटोमेटिक ट्रान्समिसन, कम्तीमा २ सय लिटरको बुट स्पेस भएको, ३० वा सोभन्दा धेरै किलोवाटको मोटर, २० किलोवाट वा सोभन्दा धेरै क्षमताको लिथियम आयोन ब्याट्री, सेडान बडी टाइप, कम्तीमा १७० मिलिमिटरको ग्राउन्ड क्लियरेन्स, कम्तीमा २१० किलोमिटर रेन्ज, एयर ब्याग, जीपीएस सिस्टम, एबीएस, सेन्ट्रल लकिङ र रेयर भ्यु क्यामरा अनिवार्य हुनुपर्नेछ ।

त्यसैगरी, विशेष प्रकृतिका ट्याक्सीमा ५ देखि ७ सिट क्षमता, अटोमेटिक ट्रान्समिसन, कम्तीमा २५० लिटर बुट स्पेस, कम्तीमा ५० किलोवाटको मोटर, कम्तीमा ४० किलोवाट आवरको लिथियम आयोन ब्याट्री, सेडान वा भ्यान बडी टाइप, कम्तीमा १७५ मिलिमिटरको ग्राउन्ड क्लियरेन्स, डुअल एयर ब्याग, जीपीएस सिस्टम, कम्तीमा २७५ किलोमिटर रेन्ज, हिल असिस्ट, एबीएस र ईबीडी, सेन्ट्रल लकिङ, पार्किङ सेन्सर, रेयर भ्यु क्यामरा, एसी र साउण्ड सिस्टम हुनुपर्नेछ ।

प्रकाशित मिति: बुधबार, माघ १८, २०७९ १८:४१