नेप्से सुधारिँदा पनि लगानीकर्तामा देखिएन उत्साह, जम्मा १ अर्ब ७६ करोडको कारोबार

नेप्से सुधारिँदा पनि लगानीकर्तामा देखिएन उत्साह, जम्मा १ अर्ब ७६ करोडको कारोबार

A+ A A-

आइतबारदेखि निरन्तर घटेको नेप्से बुधबार सुधारिएको छ । न्यून अंकले भए पनि नेप्से बढेर शेयरबजार हरियाली भए पनि कारोबार रकम भने सुधारिनुको साटो झन् संकुचित बन्दै गएको छ ।

बुधबार नेप्से सूचक ४.९७ अंकले बढेर २१२६.६५ अंकमा बन्द हुँदा २ सय ६१ कम्पनीको ५० लाख कित्ता शेयर १ अर्ब ७६ करोडमा मात्रै किनबेच भएको छ । यो पछिल्लो ११ पुुसयताकै थोरै कारोबार हो । यसअघि पुुुस ७ पुसमा १ अर्ब १२ लाख रुपैयाँको शेयर कारोबार भएको थियो । त्यसयता नेप्से सूचकसँगै कारोबार रकमले पनि बजार उचाइलिएको थियो । नेप्से सूचकले २२ सय अंक छुँदा कारोबार रकमले पनि ५ अर्ब छोएको थियो । तर, पछिल्लो ४ कारोबार दिनबाटै बजारघट्न सुरु गरेसँगै कारोबार रकम पनि तीव्र रूपमा ओरालो लाग्न थालेको छ ।

बुधबार बजारले घट्ने क्रमलाई तोड्दै थोरै माथि जान सफल भएको छ । कारोबार सुरु भएबाटै उतारचढावपूर्ण बनेको नेप्सेमा १४.४५ बजेसम्म लगानीकर्ता शेयर बिक्रीमा झुम्मिएका थिए भने त्यसपछिको समयमा लगानीकर्ताले खरिदलाई बढाएका थिए ।

बुधबार अन्तिम समयमा खरिद चाप बढ्दा समग्र बजार न्यून अंकले नै भए पनि नेप्से हरियाली बन्न पुुग्यो, जसको फाइदा आज कारोबारमा आएका कम्पनीमध्ये १ सय १० कम्पनीलाई भयो । यस दिन शेयरमूल्य बढाउने कम्पनीमध्ये आदर्श लघुवित्तको सर्किट लेबलमा शेयरमूल्य बढ्न पुुग्यो भने सिद्धार्थ इन्स्योरेन्स, इस्टर्न हाइड्रोलगायतका कम्पनीले आज सर्वाधिक कमाए । आदर्श लघुवित्तले भने पछिल्लो समय घटेको बजारमा पनि निरन्तर सर्किट ब्रेक गरिरहेको छ, जुन आज पनि दोहोरिन पुग्यो ।

यस्तै, कारोबारमा उति उत्साहित नबनेका लगानीकर्ताहरूले यस दिन कारोबार पनि निकै कम मात्रै गरेका छन् । आज लगानीकर्ताले नेपाल बैंकको शेयर सबैभन्दा धेरै किनबेच गरेका छन् । यो बैंकको आज ५९ करोडको शेयर कारोबार गर्दा रिडी हाइड्रोमा लगानीकर्ताले ४९ करोडको कारोबार गर्न पुगे ।

समग्रमा बजार सुरुको केही समय तनावपूर्ण रहे पनि अन्तिम समयमा भने नेप्सेको वृद्धिले लगानीकर्तालाई राहत दिएको छ । कारोबार खस्किए पनि सूचक सुधारिँदा भोलिको कारोबार सुखद हुने अपेक्षा लगानीकर्ताहरूको छ । यद्यपि, कारोबारले भने लगानीकर्ता अझै पर्ख र हेरकै अवस्थामा रहेको इंगित गरेको छ ।

प्रकाशित मिति: बुधबार, माघ १८, २०७९ १५:५२