पोखरा विमान दुर्घटनापछि उडान/अवतरणसम्बन्धी नियम परिवर्तन गर्दै प्राधिकरण, व्यवसायी असन्तुष्ट

पोखरा विमान दुर्घटनापछि उडान/अवतरणसम्बन्धी नियम परिवर्तन गर्दै प्राधिकरण, व्यवसायी असन्तुष्ट

A+ A A-

१ माघमा पोखरामा यती एयरलाइन्सको विमान दुर्घटना भएपछि हवाई सुरक्षाको बहस चलिरहेका बेला नेपालको हवाई सेवा नियामक निकाय नागरिक उड्डयन प्राधिकरणले विमान अवतर र उडानसम्बन्धी यसअघि कार्यान्वयनमा रहेका नियमहरू परिवर्तन गर्ने भएको छ । प्राधिकरणले अवतरण, उडान, पाइलटको ड्युटी समयलगायतका हवाई सुरक्षासम्बन्धी नियम परिवर्तन गरी कार्यान्वयनमा ल्याउने अन्तिम तयारी गरेको छ ।

प्र्राधिकरणका प्रवक्ता जगन्नाथ निरौलाले केही नियमहरू परिवर्तन गर्ने तयारी भए पनि निर्णय भने भइनसकेको जानकारी दिए ।

प्राधिकरणले नयाँ नियम लागू गर्ने तयारीका लागि मंगलबार वायु सेवा सञ्चालक कम्पनीहरूसँग छलफल गरेको थियो । सो छलफलमा प्राधिकरणले जमिनबाट १ हजार फिटमाथिको उचाइमा विमान आए रनवे परिवर्तन गर्न नपाउने नियम लागू गर्ने जनाएको छ । पोखरा विमान दुर्घटना हुनुअघि सो विमानका पाइलटले रनवे परिवर्तन गरेको सार्वजनिक भइसकेको छ । रनवे परिवर्तन गर्दा विमान अस्वभाविक मोडिएकाले सो दुर्घटना भएको केही विज्ञहरूले अनुमान गर्दै आएका छन् । यद्यपि पोखरा विमान दुर्घटनाको जाँचबुझ गर्न सरकारले बनाएको समितिले प्रतिवेदन भने दिइसकेको छैन ।

पोखरा विमान दुर्घटनाको प्रतिवेदन नआउँदै प्राधिकरणले नियम परिवर्तन गर्न लागेपछि वायु सेवा सञ्चालकहरूले भने असन्तुष्टि जनाएका छन् । वायु सेवा सञ्चालक संघका प्रवक्ता योगराज कँडेल पोखरा विमान दुर्घटनाको प्रारम्भिक प्रतिवेदन पनि नआएको बेला सुरक्षाका नाममा प्राधिकरणले कम्पहरूको क्षमताको ख्यालै नगरी नियम परिवर्तन गर्नु जायज नभएको बताएका छन् । उनले प्राधिकरणले लागू गर्न खोजेको नियम लागू गर्न वायु सेवा सञ्चालक कम्पनीहरू कत्तिको क्षमतावान् छन् भन्ने कुरा पनि महत्त्वपूर्ण हुने बताए ।

प्राधिकरणले पाइलटको ड्युटी सयम पनि घटाउने भएको छ । हिमाली जिल्लाहरूमा उडान गर्ने पाइलटको ड्युटी समय अब ८ घण्टामा झारिन लागेको हो । यसअघि १० घण्टाको समय थियो । यस्तै प्राधिकरणले आईएफआर (इन्स्ट्रुमेन्ट फ्लाइट रुल) प्रणाली जडान भएका विमानस्थलमा अब भीएफआर (भिज्युअल फ्लाइट रुल) प्रणालीअनुसार विमान अतवरण वा उडान गर्न नपाउने नियम लागू गर्ने तयारी गरेको छ ।