गृहमा रविबाहेक अर्को व्यक्ति पठाउन रास्वपा तयार, के गर्लान् प्रधानमन्त्री प्रचण्ड ?

गृहमा रविबाहेक अर्को व्यक्ति पठाउन रास्वपा तयार, के गर्लान् प्रधानमन्त्री प्रचण्ड ?

A+ A A-

राष्ट्रिय स्वतन्त्र पार्टीका सभापति रवि लामिछानेले मंगलबार बिहान प्रधानमन्त्री पुष्पकमल दाहाल प्रचण्डलाई भेटेर गृह मन्त्रालय नपाए साँझसम्म सरकारबाट बाहिरिने सन्देश दिए । प्रधानमन्त्री प्रचण्डले रास्वपालाई गृह मन्त्रालय नदिने संकेत गरेपछि लामिछाने बालुवाटार पुगेका थिए । तर, बालुवाटार सकारात्मक नभएको छनक पाएपछि उनी अल्टिमेटम दिएर बाहिरिएका छन् ।

‘प्रधानमन्त्री सकारात्मक देखिनुभएन । प्रधानमन्त्रीलाई साँझसम्मको समय दिएका छौँ,’ सभापति लामिछानेको सचिवालयका एक सदस्यले शिलापत्रसँग भने, ‘गृह नदिए सरकारबाट बाहिरिने सम्भावना छ ।’ यतिबेला रास्वपा प्रधानमन्त्री प्रचण्डको निर्णयको प्रतीक्षामा छ । साँझसम्म प्रधानमन्त्रीले गृह मन्त्रालय नदिए रास्वपा सरकारबाट बाहिरिने सम्भावना बढेकाे छ ।

गृह मन्त्रालय नपाए साँझ पत्रकार सम्मेलन गरेर सरकार छाेडेकाे जानकारी सार्वजनिक गर्ने तयारी रास्वपाकाे छ । रास्वपामा सरकारबाट बाहिरिएमा गठबन्धनमा खटपट र अदलबदल आउनेछ । तर, गृह पाए सरकारबाट रास्वपा बाहिरिने छैन । सरकारमा रहेको अर्को ठूलो दल एमाले पनि पूर्वसहमतिअनुसारै रास्वपालाई गृह दिन तयार छ । स्रोतका अनुसार, एमाले अध्यक्ष ओलीले गृह रास्वपालाई नै दिन प्रधानमन्त्री प्रचण्डलाई दबाब दिएका छन् ।

सरकारबाट बाहिरिने रास्वपाकाे तयारी, प्रचण्डलाई साँझसम्मको अल्टिमेटम

नागरिकता विवादमा सांसद पद गुमेपछि रविले गृह मन्त्रालय पनि गुमाउन पुगेका थिए । गत आइतबार रविले जिल्ला प्रशासन कार्यालयबाट पुरानो नागरिकता सक्रिय बनाएपछि उनी पार्टी सभापतिमा चयन भए । र, उनी नै सरकारमा सहभागी हुन लागेको चर्चा चल्यो । नेपालको संविधानमा गैरसांसद पनि ६ महिनासम्म मन्त्री हुन पाउने प्रावधान छ ।

संविधानको धारा ७८ को उपधारा १ मा भनिएको छ, ‘राष्ट्रपतिले प्रधानमन्त्रीको सिफारिसमा संघीय संसद्को सदस्य नभएको कुनै व्यक्तिलाई मन्त्री पदमा नियुक्त गर्न सक्नेछ ।’ तर, शपथग्रहण गरेको मितिले ६ महिनाभित्र संसदको सदस्य हुनुपर्ने हुन्छ । लामिछाने चितवन २ बाट निर्वाचित भएका थिए । उनी सोही क्षेत्रबाट ६ महिनाभित्र उपनिर्वाचन गराएर सांसद बनेर आउने योजनामा छन् ।

तर, रास्वपाका सह-महामन्त्री कवीन्द्र बुर्लाकोटी पार्टी सभापति लामिछाने तत्काल सरकारमा सहभागी नहुने दाबी गर्छन् । ‘सभापतिलाई पठाउन खोजेको होइन । पार्टीको अर्को सदस्यलाई पठाउने हो,’ उनले भने, ‘योग्य पात्रलाई गृहमा पठाउँछौँ ।’

सभापति लामिछानेबाहेक अर्कोको व्यक्तिलाई गृहमा पठाउने भन्ने रास्वपाले निर्णय गरेको छैन । प्रधानमन्त्री प्रचण्डबाट खबर आएपछि रास्वपाले गृहमन्त्रीको नाम छनोट गर्नेछ । ‘गृह मन्त्रालयमा कसलाई पठाउने भन्ने निर्णय गर्न बाँकी छ,’ बुर्लाकोटीले भने ।

तर, प्रधानमन्त्री प्रचण्ड रास्वपालाई गृह दिने मुडमा देखिएका छैनन् । उनकाे पार्टीमा पनि गृह आफैँले राख्नुपर्ने दबाब छ । त्यसैले प्रधानमन्त्री गृहबाहेक अर्को मन्त्रालय दिएर रास्वपालाई मनाउन चाहन्छन् । तर, यसमा रास्वपा सहमत छैन । सरकार गठन प्रक्रियामा आफ्नो भागमा परेकाले रास्वपाले गृहमा दाबी गरेको हो । ‘सहमति भइसकेकाे मन्त्रालय खोस्न लागेको देखियो,’ बुर्लाकोटीले भने । गृह मन्त्रालय पाएमा भने रास्वपा आजै अर्को व्यक्ति पठाउने योजनामा छ ।

नागरिकतासँगै राजनीतिमा सक्रिय बने रवि, गुमेका पद ल्याऊलान् फिर्ता ?

किन ब्याक भए रवि ?

गत शुक्रबार सर्वोच्च अदालतले पुरानो नागरिकताबाट सांसद बन्न अयोग्य रहेको फैसला गरेपछि उनले सबै पद गुमाएका थिए । यो विवादमा सरकारमा सहभागी कोही कसैले चलखेल गरेको रविनिकट रास्वपाका नेताहरू बताउँछन् ।

‘अस्तिको नागरिकता मुद्दामा चलखेल भएको सुनिन्छ,’ रास्वपाका एक नेताले भने । तर, उनले कसले कस्तो चलखेल गरे भन्ने खुलाउन चाहेनन् । अदालतको फैसलासँगै रविको नागरिकता विवाद टुंगिए पनि राहदानीको मुद्दा सुल्झिएको छैन ।

निष्क्रिय रहेको नागरिकताबाट २०७२ सालमा लामिछानेले राहदानी लिएका थिए । पुनः नागरिकता लिएसँगै उनले राहदानी विभाग पुगेर फिर्ता त गरे । तर, झुटा विवरण पेस गरेर राहदानी लिएको मुद्दा पेचिलो बन्ने देखिन्छ । राहदानी ऐन, २०७६ को दफा २१ (क) मा झुटा विवरण दिई राहदानी लिन नपाइने उल्लेख छ ।

झुटा विवरणबाट राहदानी लिएमा २ देखि ५ लाख जरिवानाका साथै १ देखि ३ वर्षसम्म कैद वा दुवै सजाय हुने व्यवस्था छ । उनी आफैँ सरकारमा जाँदा स्वार्थ बाझिने भएकाले पनि बाहिरै बस्न चाहेको रास्वपाका नेताहरूको दाबी छ ।

सम्बन्धित समाचार

प्रकाशित मिति: मंगलबार, माघ १७, २०७९ १२:५४