नागरिकतासँगै राजनीतिमा सक्रिय बने रवि, गुमेका पद ल्याऊलान् फिर्ता ?

A+ A A-

शुक्रबार सर्वाेच्च अदालतकाे आदेशपछि एकाएक सबै पद गुमाएका राष्ट्रिय स्वतन्त्र पार्टीका सभापति रवि लामिछाने आइतबार पुनः राजनीतिमा सक्रिय भएका छन् । आइतबार जिल्ला प्रशासन कार्यालय काठमाडौंबाट उनी आफ्नो पुरानो नागरिकता सक्रिय बनाएर पार्टी काममा फर्किएका हुन् ।

शुक्रबार सर्वोच्च अदालतले अमेरिकी नागरिकता त्यागेपछि नेपाली नागरिकता सक्रिय नगरेकोमा दोषी ठहर गर्दै उनी सांसद हुन अयोग्य रहेको फैसला गरेपछि उनले सबै पद गुमाएका थिए । तर, आइतबार उनले पार्टीको सभापति पद भने फिर्ता ल्याएका छन् । अब उपप्रधानमन्त्री तथा गृहमन्त्रीमा पनि उनको दाबी कायमै देखिन्छ । यसबारे निर्णय गर्ने अधिकार रास्वपाले स्वयम् सभापति लामिछानेलाई नै दिएको छ ।

‘सरकारको सहभागिताबारे उहाँलाई नै निर्णय गर्ने अधिकार छ,’ रास्वपाका एक केन्द्रीय सदस्यले भने । यसबारे सत्ता साझेदार एमाले र माओवादी केन्द्रसँग छलफल गर्ने निर्णय रास्वपाले गरेको छ । सभापति लामिछाने मन्त्री नभएको खण्डमा पनि रास्वपाको भागमा परेको गृह मन्त्रालय नछोड्ने अडान रास्वपाको छ ।

‘दलीय संयन्त्रमा छलफल गर्छौं । गृहमा दाबी रहन्छ,’ सह–महामन्त्री कवीन्द्र बुर्लाकोटीले भने, ‘सरकारमा निरन्तरता रहन्छ ।’

गैरसांसद पनि ६ महिना मन्त्री हुन पाउने व्यवस्था नेपालको संविधानमा भएकाले लामिछाने मन्त्री बन्ने सम्भावना छ । संविधानको धारा ७८ को उपधारा १ मा भनिएको छ, ‘राष्ट्रपतिले प्रधानमन्त्रीको सिफारिसमा संघीय संसद्को सदस्य नभएको कुनै व्यक्तिलाई मन्त्री पदमा नियुक्त गर्न सक्नेछ ।’ तर शपथग्रहण गरेको मितिले ६ महिनाभित्र संसदको सदस्य हुनुपर्ने हुन्छ ।

लामिछाने चितवन २ बाट निर्वाचित भएका थिए । उनी सोही क्षेत्रबाट ६ महिनाभित्र उपनिर्वाचन गराएर सांसद बनेर आउने योजनामा छन् । यदि सांसद नभएमा गैरव्यक्ति ६ महिनापछि मन्त्री हुन अयोग्य हुने संविधानमा उल्लेख छ ।

राहदानी फिर्ता

पुनः नागरिकता लिएसँगै उनले राहदानी विभाग पुगेर फिर्ता गरेका छन् । निष्क्रिय रहेको नागरकिताबाट २०७३ सालमा लामिछानेले राहदानी लिएका थिए । राहदानी ऐन, २०७६ को दफा २१(क)मा झुटा विवरण दिई राहदानी लिन नपाइने उल्लेख छ । झुटा विवरणबाट राहदानी लिएमा २ देखि ५ लाख जरिवानाका साथै १ देखि ३ वर्षसम्म कैद वा दुवै सजाय हुने व्यवस्था छ । त्यसैले उनले निष्क्रिय भएको नागरिकतालाई सक्रिय बनाएसँगै राहदानी फिर्ता गरेका हुन् ।

326666966_581249866782759_1363561095793012577_n1674991877.jpg
तीन बैठक, तीन निर्णय

रविले नागरिकता सक्रिय बनाएसँगै रास्वपाकाे आज तीन चरणमा बैठक बस्यो । पहिलो कार्यवाहक सभापति डोलप्रसाद अर्यालको अध्यक्षतामा बसेको बैठकले लामिछानेलाई केन्द्रीय सदस्य बनाएको थियो । दोस्रो बैठकले उनलाई सभापति चयन गरेको थियो । तेस्रो बैठक सभापति लामिछानेको अध्यक्षतामा बसेको थियो । उनको अध्यक्षतामा बसेको बैठकले पार्टी विस्तारको कामलाई निरन्तरता दिने निर्णय गर्‍यो । शुक्रबार उनको सबै पद गएपछि पार्टीको काम स्थगित गरिएको थियो । ‘संगठन विस्तार रोकिएको थियो, यसलाई खुल्ला गरिएको छ,’ बुर्लाकोटीले भने ।

सम्बन्धित समाचार

प्रकाशित मिति: आइतबार, माघ १५, २०७९ १९:३२