पोखरामा उच्च घरानियाँ युवाको पटके 'आतंक', गाडीले ठक्कर दिँदा प्रहरीकै हात भाँचियो

पोखरामा उच्च घरानियाँ युवाको पटके 'आतंक', गाडीले ठक्कर दिँदा प्रहरीकै हात भाँचियो

A+ A A-

मान्छेलाई शक्तिको कतिसम्म घमण्ड हुन्छ ? पोखरामा एक युवाले बेलाबखत मच्चाइरहने 'आतंक' यो प्रश्नको एउटा गतिलो उदाहरण हो ।

पोखराका २५ वर्षीय सौरभ थापाले मादक पदार्थ सेवन गरी सवारी चलाएर निम्त्याएका दुर्घटनाले प्रहरी आजित छ । पछिल्लोपटक प्रहरी हवल्दार चित्रबहादुर वलीलाई ठक्कर दिएपछि सौरभ अहिले प्रहरी हिरासतमा छन् । पक्राउ पर्ने र शक्तिको आडमा छुट्दै आएका सौरभ १२ माघमा फेरि समातिएका छन् । सार्वजनिक सेवामा खटिएको व्यक्तिमाथि जाइलागेका उनीमाथि अभद्र व्यवहारको मुद्दा चलाइएको छ ।

अभद्र व्यवहारसम्बन्धी मुद्दामा पाँच दिनको म्याद थपेर अनुसन्धान भइरहेको कास्की प्रहरीका निमित्त सूचना अधिकारी इन्स्पेक्टर सुवास तिमिल्सिनाले जानकारी दिए । सौरभ अहिले हिरासतमा पर्नुको पछिल्लो घटना १२ माघ बिहान ३ बजेतिरको हो । उनले पोखरा–१५ रामबजार पेन्सन क्याम्पमा ड्युटीमा खटिएका प्रहरी हवल्दारलाई गाडीले ठक्कर दिएका थिए । ‘गाडीको स्पिड देखेपछि प्रहरीले रोक्न खोज्दा अघि पुगेछन् । त्यसपछि फर्केर प्रहरीकै आडमा रोकेर ढोका खोल्दा हात भाँचिएको छ,’ प्रहरी स्रोतले भन्यो ।

सौरभ अटोमोबाइल्स एसोसिएसन अफ नेपाल (नाडा) केन्द्रीय अध्यक्ष ध्रुवबहादुर थापाका छोरा हुन् । उनका ठूलाबुवा विन्दुकुमार थापा कांग्रेसबाट प्रदेशसभा सांसद छन् । पछिल्लोपटक सौरभ समातिँदा विन्दुकुमार प्रदेशको कानुनमन्त्री थिए । उनकै दबाबपछि सौरभ त्यही दिन मादक पदार्थ सेवन गरेको कसुरमा सामान्य जरिवाना तिरेर छुटेका थिए ।

सौरभले आफ्नो जन्मदिन २२ पुसमा लेकसाइडको क्याट वाक नामक नाइट क्लबका संचालकको पार्किङमा भएको गाडीलाई ठक्कर दिएका थिए । त्यसपछि त्यहाँ सम्झाइबुझाइ गरेर पठाउँदा झनै उग्र रूपमा प्रस्तुत हुँदै दोस्रोपटक पार्किङमा भएको गाडीलाई ठक्कर दिएर त्यहाँबाट निस्किएका थिए ।

‘गाडी ठोक्काएपछि बनाइदिने सर्तमा पठाउन खोजिएको थियो । तर, उनले को हो यहाँको साहुजी भन्दै फेरि लगेर गाडी ठोक्काए,’ स्रोतले भन्यो, ‘त्यसपछि त्यहाँबाट निस्केर सडकमा चलाएको गति देखेर पुलिस नजिक पर्न सकेन ।’ यो घटना २२ पुस बिहान ३ बजेतिरको हो ।

प्रहरीले बोलाएपछि २२ पुस बिहान उनी आफैँ वडा प्रहरी कार्यालय बैदाम पुगेका थिए । त्यहाँ दुई-तीन घण्टा राखेर उनलाई प्रहरीले छाडेको थियो । पोखराको अमरसिंह चोकको आइल्यान्डमा मध्यराति पटकपटक फन्को लगाएको घटना प्रहरी अधिकारीहरूभित्र बेलाबखत चर्चा भइरहन्छ । त्यति मात्रै होइन, उनले आफ्नो गाडीलाई बाटो नछोडेको भन्दै पैदलयात्री महिलाकै अगाडि लगेर गाडी रोकेको घटना पनि प्रहरीमाझ चर्चामा छ ।

प्रकाशित मिति: सोमबार, माघ १६, २०७९ १७:००