गण्डकीका मुख्यमन्त्रीले बुझ्छन् महिनाको करिब सवा लाख, मन्त्रीले कति ?

A+ A A-

गण्डकी प्रदेशमा गत ४ मंसिरको चुनाव जितेकामध्येबाट नेकपा एमाले संसदीय दलका नेता खगराज अधिकारी मुख्यमन्त्री बनेका छन् । उनीसहित प्रदेशमा अहिले सात जना मन्त्री छन् ।

मुख्यमन्त्री र मन्त्रीको मासिक सेवा सुविधा कति हुन्छ त ? मुख्यमन्त्री र मन्त्रीहरूको पारिश्रमिक तथा सुविधासम्बन्धी ऐन, २०७४ ले गण्डकी प्रदेशका मुख्यमन्त्री, मन्त्री, राज्यमन्त्री र सहायकमन्त्रीले पाउने सुविधाबारे व्यवस्था गरेको छ । प्रदेश स्थापनायता मुख्यमन्त्री र मन्त्री भए पनि राज्यमन्त्री र सहायकमन्त्री नियुक्त भएका छैनन् ।

पारिश्रमिक, सञ्चार सुविधा र अतिथि सत्कार हिसाब गर्दा मुख्यमन्त्रीले मासिक १ लाख १५ हजार ७३० रुपैयाँ सरकारी कोषबाट बुझ्छन् । मुख्यमन्त्री र मन्त्रीले आवास, सवारी, इन्धन, मोबिल सुविधा पाउँछन् नै । त्योबाहेक पानी बिजुलीको बिल भुक्तानी पनि सरकारी कोषबाट हुन्छ । मुख्यमन्त्रीले पाउने सुविधामध्ये सरकारी आवासको भान्सामा चाहिने सामान भने आफैँ किन्नुपर्छ । अर्थात् मुख्यमन्त्रीको भान्सामा पाक्ने खाद्यान्न र तरकारीबाहेक सबै खर्च सरकारले नै व्यहोर्छ ।

मुख्यमन्त्रीको पारिश्रमिक मासिक ७० हजार ७३० रुपैयाँ हुन्छ । उनले आवास सुविधा पनि पाउँछन् । मासिक २५० लिटर इन्धन, त्रैमासिक १० लिटर मोबिल, प्रति महिना ५ हजार रुपैयाँ सञ्चार सुविधा, प्रतिमहिना ४० हजार रुपैयाँ अतिथि सत्कार खर्च मुख्यमन्त्रीले सरकारी कोषबाट पाउँछन् । बिजुलीपानीको खर्च पनि बिलअनुसार सरकारी कोषबाटै भुक्तानी हुन्छ ।

स्वदेश भ्रमण गर्दा दैनिक भत्ता ३ हजार रुपैयाँ र विदेश भ्रमण गर्दा पाउने भत्ता प्रतिदिन २५० अमेरिकी डलर (३२ हजार ५०० रुपैयाँ) पाउने व्यवस्था सुविधा ऐनले गरेको छ । मुख्यमन्त्रीको यात्रा बीमा प्रतिभ्रमण १० लाख रुपैयाँको हुन्छ ।

मुख्यमन्त्रीले पाँच जनालाई सचिवालयमा नियुक्त गर्न पाउँछन् । एक जना उपसचिवसरहको, एक जना शाखा अधिकृतसरहको, एक जना नासुसरहको र दुई जना कार्यालय सहयोगी तहको व्यक्तिलाई मुख्यमन्त्रीले सचिवालयमा राख्न पाउने व्यवस्था सुविधा ऐनले गरेको छ ।

मन्त्रीको सुविधा के–कति ?

मन्त्रीले पारिश्रमिक, सञ्चार सुविधा र अतिथि सत्कार हिसाब गर्दा मासिक ७७ हजार ३२० रुपैयाँ पाउँछन् । मन्त्रीको पारिश्रमिक मासिक ६० हजार ३२० रुपैयाँ हुन्छ । उनीहरूले आवास पनि पाउँछन् । मन्त्रीहरू निजी आवासमा बस्न चाहेमा एकमुस्ट १ लाख ५० हजार रुपैयाँ घर मर्मत खर्च शीर्षकमा पाउँछन् । सरकारले फर्निचरको व्यवस्था नगरेमा मन्त्रीले थप एक लाख रुपैयाँ पाउने व्यवस्था ऐनले गरेको छ ।

मन्त्रीहरूले मासिक १५० लिटर इन्धन, त्रैमासिक ५ लिटर मोबिल, प्रति महिना २ हजार रुपैयाँ सञ्चार सुविधा पाउँछन् । मन्त्रीहरूले अतिथि सत्कार शीर्षकमा प्रति महिना १५ हजार रुपैयाँ पाउने व्यवस्था ऐनले गरेको छ । त्यस्तै, बिजुलीपानीको बिल पनि सरकारी कोषबाटैै भुक्तानी हुन्छ ।

स्वदेश भ्रमण गर्दा मन्त्रीले २ हजार ५ सय रुपैयाँ दैनिक भत्ता र विदेश भ्रमण गर्दा प्रतिदिन १७५ अमेरिकी डलर (२२ हजार ७ सय रुपैयाँ) भत्ता पाउँछन् । मन्त्रीको यात्रा बीमा पनि प्रतिभ्रमण १० लाख रुपैयाँकै हुन्छ ।

मन्त्रीले दुई स्वकीय सचिवसहित ३ जनालाई सचिवालयमा नियुक्त गर्न पाउँछन् । मन्त्रीले एक जना शाखा अधिकृत, एक जना नासु वा सो सरह र एक जना कार्यालय सहयोगी तहको व्यक्ति नियुक्त गर्न पाउने व्यवस्था छ ।

मुख्यमन्त्री र मन्त्रीले विदेश भ्रमण गर्दा भारतको चेन्नाइ, हैदराबाद, बैंगलोर, मम्बई, दिल्ली, कोलकाता र बंगलादेशको ढाका र चटगाउँबाहेक अन्य स्थानमा रात बिताउनुपर्दा सरकारी कोषबाट ५० प्रतिशत रकम मात्र पाउँछन् । विदेश भ्रमण गर्दा आमन्त्रण गर्ने राष्ट्रको सरकारी कुनै संस्थाबाट दैनिक भत्ताबापतको रकम उपलब्ध गराइएको अवस्थामा प्रदेश सरकारको कोषबाट दैनिक भत्ताबापतको रकम लिन नपाउने व्यवस्था छ ।

प्रकाशित मिति: आइतबार, माघ १५, २०७९ १७:३६